Read Khumi Chin DANIELA 9 Bible Online

DANIELA 9 - Khumi Chin bible

DANIELA 9

¹Medi khumi Asuiru i chapo Dari ly Babulon pri y peang nai ne.

²Ni i peang angchei nai saneng y kai, Daniela ly baibul leusaichi amtiu i, amo Jeremia teng y ARENG my leu pei nai kamta, saneng vui saryh tym pa-rei, Jerusalem mary phra ai nai satangchi adawn pasym bo.

³Naibaly kai ly biu hai naimy paisiu kanih akhiu iy, maidym theung y ateh i, Areng Tameuh teng y chiu sa hnei takeng nai ne.

⁴Kai ly kaimy i ARENG Tameuh teng y chiu sa iy, kaimy khumichi i kamngochi ahui pi bo. Kaimy, “Aw Areng Tameuh, nang ly nang parai nai ne i, kaichi my nang ai tahm kang pasang u bo. Nang ly nangmy i Leu Maikawm khaw hai iy nangmy ai tamen i, Reita leu pei naichi sa patawm nai khumichi teng y, khaw parai nai tamen naira patei pi nai ne.

⁵“Kaichi ly kamngo sa tamang u. Teng y naichi kasa u lawh. Amso ngai naichi ne iy ka-awi sa u lawh bo. Kaichi ly nang i leu pei naichi khai su iy, nang i sa pi nai reitachira i nai en vui lawh bo.

⁶Kaichi ly kaimychi i samrangchi, samrang i cho chanauchi, amsi pajochi dengdairei mipui bawibawichi i tlang tleaung y, nang i miseaung amochi my nang i amyn y thui pi naichi kaichi ly tangai u y nai ne.

⁷Aw Areng, nang ly kateng sa jojo nai ne. Na i py kaichi ly kaimychi ai kangji nga hai bo. Juda pri y py, Jerusalem mary y py, awm nai khumichi hawi nang i leu tangai y nai deaungkho y, kamlo kang sa prichi mang y ahei akyhkyh nai Israela cheng bawibawichi py, huna nai kamta mymychi ai mychi naimy tahm anem hai u bo.

⁸Aw Areng, kaichi i samrangchi, samrang i cho chanauchi hawi amsi pajochi ly angji ngai nairachi sa naimy, nang i tlang tleaung y kamngo sa u bo.

⁹Kaichi ly nang i leu tangai y teu i py, nang ly kaichi ai pahen iy kaichi i kamngochi pahen pi bo.

¹⁰Aw kaichi i ARENG Tameuh, nang ly kaichi ai nangmy i miseaung amochi dengdairei pei nai reitachi kamta, tangai ai nai leu pei teu i py, kaichi ly tangai u y nai ne.

¹¹Israela cheng verei malawn py nang i reitachi ai tangai y i, leu pei naichi khai u su bo. Kaichi ly nang i tlang tleaung y kamngo sa u nai ne i, nang i miseaung Mosi i reita theung y tajiu nai vainengchi ly kaichi teng y lawi hai bo.

¹²Nang ly nangmy i leu pei nai kamta, kaichi hawi kaichi ai peang nai khumichi ai kamngo pajeng bo. Jerusalem mary ai khaileaung pri i takhra marychi tleaung y, khri pa-rei kamngo pajeng nai ne.

¹³Kaichi ly Mosi i reitara y awm nai kamngo pajeng naira bawibawi ly avum u bo. Na i py kaichi i ARENG Tameuh awi, vaimy kaichi ly nang i kangai mang y atho sa iy, kamngora i nai en vui ai nai hawi leu meitang lam mang y abang ai nai py, atho kaso u y rai.

¹⁴Kaichi i ARENG Tameuh awi, nang ly kaichi ai pajeng ai nai angveirym nai kamta pajeng ba. Ati mana nai mo na baly nang ly kahawi sa jojo nai ne teu i py, kaichi ly nang i leu tangai u y nai deaungkho y ne.

¹⁵“Aw kaichi i ARENG Tameuh, nang ly nangmy i khumichi ai Aikupta pri i dengdairei pahawi iy, sa thai naira patei pi bo. Kaichi ly nang i sa thai naira ai vai khrairei, pany pi jo nai ne. Kaichi ly kamngo sa u bo, hawi y naira kasa u lawh bo.

¹⁶Aw Areng, nang ly vaichi khala y kaichi ai kry nai ne. Hunai deaungkho y Jerusalem mary ai kado theu hai bi moh kyh ba. Huni mary ly nang i mary, nang i mawi kachai ne. Kaichi i kamngochi hawi amsi pajochi i sa tamang nai molam y, saleaung deaungpa prichira i khumi bawibawichi ly Jerusalem mary hawi nang i khumichi ai khen nau nai ne.

¹⁷Aw kaichi i Tameuh, nang i miseaungchi i chiu sa nai hawi hnei takeng nai tangai pi kyh ba. Nang ly Tameuh ne, nanai khumi luteng pany u ai nai, taphra vui nai nang i Achura yhm ai palum pi teang kyh ba.

¹⁸Aw Tameuh, kaichi i hnei takeng nai tangai pi kyh ba. Kaichi ai khen ly nang i amyn hawi sa nai huni mary i patang nai ai, pany pi kyh ba. Kaichi ly kaimychi i hawi nai, kateng sa nai molam y ny y naimy, nang i pahen naira len parai nai saho y chiu kang sa.

¹⁹Aw Areng, tangai pi kyh ba. Aw Areng, kaichi i kamngo pahen pi kyh ba. Aw Areng, kaichi i hnei takeng nai tangai iy, kawn pi kyh ba. Aw kaichi i Areng, paniu moh ba. Huna khala y nang ly Tameuh ne nanai khumi luteng my pany u ai. Hini mary hawi hini khumichi ai nangmy peang nai ne,” nanai chiu sa bo.

²⁰Kai ly chiu sa bi i, kaimy i kamngochi py, kaimy i khumi Israela chengchi i kamngochi py, ahui naimy nang i chai parai nai Achura yhm sa palum teang ai nai, kai i ARENG Tameuh teng y hnei takeng nai ne.

²¹Kai ly huna nai kamta chiu sa nai thym khala y, vaichi khala amteng hai naira y niu nai Kabriela ly kai i awm naira y angkheang kathiu bo. Huni neng ly dym mang i apathyp nai neng ne.

²²Kabriela my, “Daniela awi, kai ly amo leu nang pany thai ai nai molam y sabawm ai nai hini meingtym y kang tym nai ne.

²³Nang ly Tameuh teng y hnei takeng amteaung nai khala, mymy ly nang i chiu sa nai pathang pi bo. Mymy ly nang ai tamen nai deaungkho y, mymy i pathang nai leu nang teng y thui pi ai nai, kai ai pato nai ne. Vai ly amteng hai nai leu thui pi pachai nai thym khala y, hawihai palai tangai ba.

²⁴“Saneng vui saryh nai meingtym saryhrei nai neng ly nang i chengchi hawi nang i chai parai nai mary ai kamngo hawi, hawi y naira i nai, lawi hai ai nai Tameuh my khai pi takhra nai neng ne. Amteng hai nai hawi amo leu teng khyp nai sai pany hai ai nai hawi, chai parai nai Achura yhm[9] khai takhra teang ai nai molam, Tameuh ly nichi i kamngochi pahen iy, deungtasarei leu meitang adyh adawi nai deung tym ai.

²⁵Vai, kang thui pi nai ly hawihai palai tangai ba. Jerusalem mary sa palum teang ai nai leu pei nai dengdairei, Tameuh my vawi nai miteaung keh tym nai neng ryrei, saneng vui saryh nai meingtym saryhrei awm ai. Jerusalem mary ly lamchi, khaw parai nai mary apaichi hawi sa palum teang ai. Sa palum nai saneng vui tariu saryh nyhrei nai meingtym saryhrei tym pa-rei kra ai. Na i py huni neng ly patang nai neng ne ai.

²⁶Naibaly neng kani dym nai khala y, Tameuh my vawi nai miteaung keh ai ly khumi hawi y naimy padei vui ai. Kangkhym y tym iy atho awm nai samrang leaungrei i tavaimichi ly Jerusalem mary hawi Achura yhm taphra u vui ai. Kangkhym y ly Tameuh my sa yb nai kamta, tavai atiu nai hawi taphra naira ly tym iy, tuibai theu nai kamta kangkhym i neng ang tym ai.

²⁷Huni samrang ly khumi neangneangchi hawi, saneng saryh ryrei khaw parai nai ka-dyh ka-dawi asa ai. Saneng thomrei bo y lo tariurei tym nai khala y ni ly kapathypra hawi katalamrachi anawn hai ai. Naibaly ka-jei awm nai amso ngai naira ai ly[10]Achura yhm khumichi niu thai nai ka-sangra y banghau ai. Huni ly bang nai khumi i vui, Tameuh my sa yb nai phra nai neng tym pa-rei, Achura yhm y awm jo ai,” napi.