Read Khumi Chin HOSEA 13 Bible Online

HOSEA 13 - Khumi Chin bible

HOSEA 13

¹Vaichi khala Ephraim cheng theaungchi i thui nai leu ai, takhra Israela cheng theaungchi ly jei hyn u bo. Takhra Israela cheng theaungchi ly Ephraim cheng theaungchi ai tahm khai u nai ne. Na i py nichi ly Bala tameuh ai chiu u nai kamngo molam y dei u ai.

²Nichi ly tau cheng nai khumichi i kasabawm hawi, tangka mynchi chiu iy kamngo sa ra sa ra nai ne. Naibaly nichi my, “Hini mynchi teng y apathyp u!” nanai thui u. Khumi ly huni si katai mynchi ai pachawm ai nai avo na a!

³Hunai deaungkho y hini khumichi ly khawn mang y tla reng nai kadam kamta py, khawn angthodyh y tama reng nai kadam amai kamta py, tama u ai. Nichi ly choh ati nai meingtym i ali my hm iy akheang nai choh ali kamta py, paheung mang theu nai maikhyh kamta py tama u ai.

⁴ARENG my, “Kai ly nangchi ai Aikupta pri dengdairei pahawi nai, nangchi i ARENG Tameuh ne. Nangchi ly kai ny y baly Tameuh takhra by y, kai leaungrei naini nangchi i atleu keung ne.

⁵Kai ly jengha iy bi parai nai daichi ka-vymra y, nangchi ai kang kry nai ne.

⁶Na i py nangchi ly tlamsa naira angym nai pri y tym iy, teicha teinei kajeu kawi pa-rei cha ai nai nga nai deaungkho y, paleung tuinem nai khala, paleung len i, kai ai tami u bo.

⁷Hunai deaungkho y khrangsi kamta, nangchi ai ka-jo hau ai. Nangchi i chei nai lam jeungrei y, takaikheng kamta kang-oh ai.

⁸Cho tama nai tavym kamta, nangchi ai kang be puipa ai. Khrangsi kamta avum nai meingtym y kei iy, daichi mawi kasi kamta theng piupa ai.

⁹“Israela khumichi awi, kai ly nangchi ai tamyh vui ai. Nangchi ai ami my sabawm pajau ai mo?

¹⁰Nangchi ly samrang hawi lu sa nai keungchi ai, kaichi ai pei ba, nanai hnei u bo. Na i py hini khumichi ly pri atleu pajau na a?

¹¹Kai ly kado theu naimy nangchi teng y samrangchi pei pi bo. Kai ly kado katheu hawimy, huni samrangchi ai la teang vui bo.

¹²“Israela chengchi i kamngo sa nai ai record khai iy, huni recordchi ai kryme nai ne.

¹³Israela chengchi ly tlang heng ai nai nga nai ly lo kawp y nai deaungkho y, khri pa-rei tamang na bo. Nichi ly tapen ai nai neng tym i py, tapen ai ngai y nai deaungdicho hawi atawm.

¹⁴Kai ly hini khumichi ai tavau pri i nai py, dei areng i sa thai naira i nai py, atleu ai ny y. Aw dei areng, nang teng i no kanghawi tym hai ba. Aw tavau pri, nang teng i phra naira tym hai ba. Kai ly hini khumichi ai pahen y, tamen y leang bo.

¹⁵Israela chengchi ly acha keungchi kamta angvai i py, kai ly khutaha daichi ka-vym mang dengdairei, nisi mang i ali kabi aho hai nai deaungkho y, nichi i tavo micheaungchi hawi tuikanchi kang hai iy, vang kateng vawnsai ngiereichi chau pawn ai.

¹⁶Samari mary i khumichi ly kai ai tiu nai deaungkho y, pajeng naira avum ai. Samari khumichi ly tavai molam y dei u ai. Deaungdichochi ly khaileaung y athyh iy, padei nai avum u ai. Neampachy jeubomchi i kajeu py, phokra nai avum ai.