Read Khumi Chin HOSEA 2 Bible Online

HOSEA 2 - Khumi Chin bible

HOSEA 2

¹Hunai deaungkho y nangchi ly Israela cheng tengtawi teng y, “Tameuh i khumichi” nanai py, “Areng my tamen nai khumichi” nanai py amyn pathi iy palau u.

²Kai i cho chanauchi awi, nangchi i amhm teng y takeng u. Ni ly kai i aju ny y leang bo. Kai py ni i juvo ny y leang bo. Na i py bima hawi kamleaung sa nai kalopchi anawn vui ai nai, nangchi i amhm teng y takeng u.

³Huni kalopchi anawn y baly, kai ly ni i ateaung leng vui iy, ni ai tapen nai kani khala i kamta, tlang ka-keu awm hai ai. Ni ai ly jengha iy teaung ai ngo y nai adym kamta, lawm hai nai deaungkho y, ni ly tui ahai naimy dei ai.

⁴Ni i cho chanauchi ly bima nu i cho chanauchi lawm nai deaungkho y, kai ly nichi ai pahen ai ny y. Nichi i amhm ly ka-ym by y iy, kangji by y naimy tapen bo. Mymy naimy, “Kai ai cha ai nai teicha teinei, beram mui, kalang hawi olive asitui, kreip hangchi pei nai tavawichi nithun kai abang ai,” nanai thui.

⁶Hunai deaungkho y kai ly ni theu thai y ai nai cheaungmei apai sa iy, lam niu pajau y ai nai lengseaung apai akawm khyp ai.

⁷Ni ly tavawichi nithun hui teu i py, kai ai ny y, hau i py niu ai ny y. Huna nai khala ni my, “Kai ly juvo kangngym teng y vawi ali teang ai. Kai ly juvo kangtha hawi ateaung ahawi nai tleaung y, juvo kangngym hawi ateaung ahawi nai ly hawi keh alam ai,” nanai thui ai.

⁸Ni ly Bala tameuh ai chiu naira y talam nai chohpui chomaw, kreip hang, olive asitui, muku hawi tangkachi kai teng i nga nai ne, nanai ni pany y.

⁹Hunai deaungkho y kai ly choh tyn nai neng khala, kai i chohpui chomaw hawi kreip hang py, ni ateaung ai nai kai i pei nai beram mui hawi kalang py, kala pi ali teang ai.

¹⁰Kai ly ni i tavawichi mo y, ni i ateaung ngiereichi leng vui ai. Kai i kiu theung i nai ami py, ni ai atleu pajau y.

¹¹Ni i saneng tleirei sa nai pawi hawi lo tleirei sa nai pawi, anawn kani pawichi napi nai hawi, reita leu ka-rum bawibawichi kaimy anawn hai ai.

¹²Ni i tavawichi my langseaung palawn iy ni ai pei nai kreip keung, thaidu keungchi py, kaimy taphra pi vui ai. Kai ly ni i kreip akho hawi thengthai akhochi ai, daichi mawichi my taphra nai deaungkho y, kabeng aleng kawi nanai meingtym lawm hai ai.

¹³Ni ly kai ai tami vui iy bala tameuh teng y rimuichi patawi naimy, muku, tangka ateaungchi amthyp iy, tavawichi nithun abang nai molam y, kai ly ni ai pajeng ai. Hini ly ARENG my thui nai leu ne.

¹⁴Hunai deaungkho y kai ly ni ai daichi ka-vym mang y hawi ali teang iy, huni meingtym y kai teng y ali teang ai nai, tamen nai leu hawi kapahawi ai.

¹⁵Ni i kreip akhochi py hawi hai teang iy, Akhaw, napi nai kamtang leaung hawi ai, athang khai naira katheu lawm hai ai. Ni ly saneng theang nai neng, Aikupta pri i dengdairei theu nai khala i kamta, kai ai tamen ali teang ai.

¹⁶Huna nai khala ni ly kai ai Bala,[1] nanai palau y naimy, juvo, nanai palau ali teang ai.

¹⁷Ni ly Bala, nanai amyn ai, ni i labeaung mang katheu y ai; mo mang y palau bi ai ny y.

¹⁸Huna nai khala kai ly mawi kasi, tavo cheaungkhangchi hawi leu maikawm asa iy, haisau, thailiho chyn hawi tavai atiu naichi py, pri y by y vui nai deaungkho y, kai i khumichi ly tlamsa naimy awm ai nai nga u ai.

¹⁹Aw Israela awi, kai ly nang ai, aju kapalawn ai. Nang i tlang tleaung y kai i ka-ymra khaw jo ai. Nang i tlang tleaung y tamen nai hawi pahen naira khai iy, kaimy i aju ra y deungrei kapalawn ai.

²⁰Kai i adeu nai vaineng molam y, kai ly nang ai pom ai. Nang ly kai ai ARENG ne, nanai pany jo ai.

²¹Huna nai khala kai i khumi Israela chengchi i chiu sa nai tangai pi ai. Kai ly khaileaung salo y kani nai hai nai deaungkho y, khaileaung i dengdairei, choh, kreip athai hawi olive athaichi athai ai.

²³Kai ly kaimy i khumichi ai pri theung y awm hai iy, nichi ai nang chawn hai ai. Kai ly “tamen y” nanai amyn angam nai khumichi ai tamen ai. “Kai i khumichi ny y” nanai amyn angam nai khumichi ai kaimy ‘Nichi ly kai i khumichi ne’ nanai thui iy, nichi my, “Mymy ly kaichi i Tameuh ne,” nanai thui u ali teang ai.