Read Khumi Chin HOSEA 4 Bible Online

HOSEA 4 - Khumi Chin bible

HOSEA 4

¹Israela chengchi awi, ARENG i leu pei nai tangai u. Hini pri y awm nai khumichi ai Tameuh my seu nai awm. Mymy ly “Hini pri y ly tamen naira, ka-ym awm naira by y. Kai ly Tameuh ne, nanai khumichi my pany u y.

²Nichi ly leu meitang teaung y nai, ka-chawi thui nai, khumi ai padei nai, ami i yhmtheaung paviu nai, ami i aju chanau ai taphra nai, hunichi sa nai ne. Reita ai dawndan y nai awm ngaulau iy, khumichi ai avaw avawrei padei u bo.

³Hunai deaungkho y hini pri ly jengha ai i, heng nai amjy cheaungkhangchi dei u be ai. Amso tawnbawichi, tavochi hawi, pangli theung y awm nai ngochi malawn py dei u ai,” napi.

⁴ARENG my, “Amimi py mipuichi ai seu moh, parip moh sy, kai teng y pathyp pi nai keungchi ai seu ai nai leaungsai awm.

⁵Nangchi ly vum, kanithun tamang u nai ne. Amochi py huna nai kamta ne teang. Kai ly nangchi i amhm lawm nai Israela pri taphra ai.

⁶Kai i khumichi ly kai ai pany u y nai deaungkho y, pajeng naira avum u ai. Nangchi pathyp pi nai keungchi ly kai ai pany y i, kai i thui pi nai leu ai py tangai u y nai deaungkho y, kai ly nangchi ai kang khai su bo. Nangchi i chapochi ai py, pathyp pi nai keungchi ne, nanai kang palawn pi ai ny y.

⁷Nangchi pathyp pi nai keungchi vuikanai nawira nai hawimy, kai i tlang tleaung y nangchi i kamngo sa nai sai nawira bo. Hunai deaungkho y kai ly nangchi i tahm awm nai taphra ai.

⁸Nangchi ly kai i khumichi kamngo sa nai molam y, nang u nai ne. Hunai deaungkho y nangchi ly nichi kamngo sa ra ai nai atho pei u bo.

⁹Nangchi ly mipuichi kamta, pajeng naira avum ai! Kai ly nangchi ai pajeng ai. Nangchi ly nangmychi i kamngolai amtym u ai.

¹⁰Nangchi ly kapathypra phy nga nai cha u i py, kajeu kanglam dam u ai ny y. Nangchi ly cho chanau thawn ai nai tameuhchi ai chiu teu i py, cho chanau ngo u y; ati mana nai mo na baly nangchi ly kai, Tameuh ai khai su iy tameuh takhra ai chiu u bo.

¹¹ARENG my, “Kai i khumichi ly kreip hang kangngym, kangtha nei cha pavui u nai deaungkho y, pany thai nai ka-dawn tama!

¹²Nichi ly dengkeaung hawi sa nai tameuh teng y leung pataw u! thengbeang my nichi pany ai ngai nai ngierei thui pi! Nichi ly kai ai khai u su bo. Bimanu lawm nai neampachy kamta, nichi ly tameuh takhrachi mang y ahihawi u bo.

¹³Nichi ly mawi saleung i chiu sa nai meingtymchira y apathyp u iy, mawi aheungchira i, ka-khui hawi nai dengkeaung keung puichi anui y rimuichi patawi u bo. “Naibaly nangchi i chaniuchi ly bimanu lawm iy, nangchi i lengngochi ly kamleaungnu lawm u bo.

¹⁴Na i py kai ly nichi ai kapajeng y ai. Ati mana nai mo na baly nangmychi naimy tameuh takhra ai chiu nai meingtym i bimanuchi hawi amkawm iy, tameuh takhra teng y vanrei, apathyp u nai deaungkho y ne. ‘Tau cheng naira by y nai khumi ly phra ai’ nanai thui achih nai kamta ne.

¹⁵“Nangchi Israela khumichi ly kai i tlang tleaung y ka-ym by y teu i py, Juda khumichi ly huna nai kamngochi so u moh sy, Kilakala mary, ti y baly Bethevan[2]marychira y chiu u moh. Huni marychira y heng nai ARENG i amyn tau iy vaineng abeu u moh.

¹⁶Israela khumichi ly kry rai nai si nu tanglo kamta, paleung tang u cheng lawh. Kai ly nichi ai beram chochi kamta, sui tlai naira y mana kry pajau ai mo?

¹⁷Israela khumichi ly myn chiu naira y paleung apei keh. Mychi i tako nai lamra y tako u teu na sy.

¹⁸Nichi ly kreip hang nei ala iy, bima kalopra y amo theu u nai ne. Nichi ly tahm awm nai kalop tleaung y, kangji nga nai kalop ai ngai u keh.

¹⁹Nichi ly ali aho naira y akheang jo nai kamta, ahei u dan ai. Tameuh takhrachi teng y apathyp u nai deaungkho y, kaji u ai.