Read Khumi Chin HOSEA 7 Bible Online

HOSEA 7 - Khumi Chin bible

HOSEA 7

¹“Kai i khumichi ai nang chawn hai teang iy, Israela khumichi i no-na tama hai ai ngai nai tleirei y, kai ly nichi i hawi y nai hawi kamngo sa nai ai naini kaniu nai ne. Nichi ly mychi tengtawi atapawp u leungtang nai ne. Yhmchi ateng vau iy yhmtheaung katuichi paviu u. Lam aki aleaung naichi teng i py lawm u bo.

²Kai ly nichi i sa tamang naichi kapany pi jo, nanai nichi py u y. Nichi i kamngochi ly mychi ai taki teungtareung iy, kai i mo y huni kamngochi ly amteng nai ne,” napi.

³ARENG my, “Khumichi ly mychi i hawi y nai katau molam y, samrang hawi ni i bangtangchi ai li-tapawp hyp bo.

⁴Nichi bawibawi ly ka-ym by y naichi ne. Tako paawp nai khumi ly tako dei kangheang khai rym khala, mai katei y nai kamta, huni khumichi i niu ngai y nai paleung ly tako paawp nai takeangra i mai kamta bi-um jo nai ne.

⁵Samrang i sa nai pawi kani y samrang hawi ni i bangtangchi ai kreip hang panei iy, pavui tapai hai u bo.

⁶Nichi ly tako paawi nai takeang mai kamta, atiu ai ngai nai paleung angveaung naimy awm u nai ne. Nichi i kado theu nai ly angveaung pa-jei na. Khawn khutawi baly mai angveaung bo.

⁷“Nichi ly kado theu nai paleung bi phui na i, peang nai keungchi ai tleh u bo. Nichi ly samrangchi ai leaungrei bo y leaungrei tleh u nai ne. Na i py kai teng y kasabawmra nga ai nai, ami py hnei u y,” napi.

⁸ARENG my, “Israela khumichi ly ka-hyhrei tie khyh nai tako hawi atawm. Nichi ly tengpang y awm nai prichi ai ym u nai ne.

⁹Pri takhra ai a-ym nai molam y, huni prichi my thi pajawp, nanai nichi pany u y. Nichi i pri ly phra nai neng kasa teu i py, mychi pany u y.

¹⁰Israela khumichi i paleung len amlyh am-e nai ly nichi phra ai nai ka-ma-ra ne. Nichi ly hina nai leaungsaichi hawi avum teu i py, nichi i Tameuh kai, ARENG teng y vawi u y.

¹¹Israela chengchi ly humang himang akheang iy, tau by y nai, li-tapawp ai rai y nai buhu kamta ne. Nichi ly angchei y Aikupta prichi teng i, kasabawmra hnei u. Hunai bo baly Suria pri mang y preang iy, kasabawmra hnei u!

¹²Na i py kasabawmra hnei ai nai chei u nai thym khala tavochi ai, py hawi patiu nai kamta, kai ly nichi ai patiu ai. Nichi i kamngo molam y, kai ly nichi ai pajeng ai.

¹³“Nichi ly pajeng naira avum u bo! Kai ai khai su iy ang tiu u lawh bo. Hunai deaungkho y nichi ly phra naira avum u ai. Kai ly nichi ai atleu ai nai ngai teu i py, nichi ly kai ai hawihai palai chiu u y, li-tapawp iy chiu u lawh.

¹⁴Nichi ly ym tatang nai paleung hawi chiu so u y. Amymy ai atlym hai iy, aeu naimy tangam u bo. Nichi ly choh bai palo hawi kreip hang nga ai nai chiu sa nai khala y, myn y chiu nai khumichi kamta, amymy ai tamo kalem nga hai iy, hnei takeng reng. Nichi ly kai ai tiu u lawh ly!

¹⁵Kai ly nichi ai kry palum iy atho awm hai i py, nichi ly kai ai ang tiu u nai ne.

¹⁶Nichi ly kai ai khai su iy sa thai naira by y nai tameuh teng y ahihawi u bo. Nichi ly akawi nai thailiho kamta, ka-ym by y. Nichi i lu sa naichi ly khumi aniu y nai leu katheu u nai deaungkho y, dei kahawi dei u y ai. Hunaibaly Aikupta chengchi my panui hai ai.”