Read Khumi Chin AMOS 3 Bible Online

AMOS 3 - Khumi Chin bible

AMOS 3

¹Aw Israela khumichi awi, nangchi cheng vuijeungrei ai Aikupta pri i dengdairei ang pahawi nai ARENG my, nangchi i molam y leu ang pei nai tangai cham.

²“Khaileaung pri verei y awm nai khumi cheng bawibawichi theung y, nangchi cheng harei ai naini kang pany iy, kang pahen nai ne. Hunaibaly nangchi i kamngo sa nai ngierei molam y, kai ly nangchi ai kang pajeng ai nai tla ai,” napi.

³Khumi leaung nyhrei ly adeu yb y naimy, khuleaung vanrei chei hawi thai na a?

⁴Khrangsi ly teicha niu y pui naimy, daichi theung y hang atyhtyh na a? Khrangsi cho ly ati sai py kei ai ngo y pui naimy, my i tapiu theung y hawn so atyhtyh na a?

⁵Teicha khai y nai cheng theung y tavo harei patiu thai na a? Sai sairei kun khala naini, cheng ly amkhau nai ny y a?

⁶Mary theung y tavai baw eng nai katyn thai baly, mary i khumichi ly jei hyn y nai awm na a? ARENG my pajeng khala naini, mary theung y patang naira tym nai ny y a?

⁷Sa thai naira angym nai ARENG ly mymy i dawn nai ai, mymy i miseaung amochi teng y thui pi y naimy, ati sai py so y leang.

⁸Khrangsi hang baly ami py jei y nai awm pajau ai mo? Sa thai naira angym nai ARENG my leu pei baly ami mo py, leu pei nai ai aeu y nai awm pajau na a?

⁹Asadod hawi Aikupta pri samrang i yhmchi theung y awm nai khumi bawibawichi teng y hina nai thui. “Samari mary tengpang y awm nai mawi aheungchira y akachu u ly huni mary theung y sa nai kamngochi hawi khru-nganglang naichi ai khen u cham.”

¹⁰ARENG my, “Nichi ly mychi i yhm puichi ai athorei my lawm nai hawi khrukhra hai iy nga nai vawnsaichi hawimy kawi hai na bo. Nichi ly leu meitang ai malawn py pany thai u y.

¹¹Hunai deaungkho y paleung ka-e pri harei ly nichi i marychi ai katanmeuh iy, nichi i amtangrachi taphra vui ai. Nichi i yhm puichi ai py lawm iy taphra ai,” napi.

¹²ARENG my, “Beram typ nai keung ly khrangsi teicha lawm vui nai beram harei i kheu nyhrei, ti y baly kano makengrei, napi naichi ryrei akhui ai nga khyh nai kamta, Samari mary y awm nai khumichi i phangpho nibaichi salo y nei cha pavui naichi theung i, khumi maidenreichi naini tleaung u ai.

¹³Kani pri tavailuchi i ARENG my, “Kai i thui nai leu ai vaimy tangai ly Jakob i kangpreangchi teng y pany hai ai nai thui pi.

¹⁴Kai ly Israela chengchi ai pajeng nai kani y, Bethela maichamchi ai taphra vui ai. Maicham tleirei i takichira y awm nai taki kamsuichi tameang iy, khaileaung y tla hai ai.

¹⁵Kai ly kanipui yhm ka-jeaungchi hawi kaseih neng i yhmchi py taphra pawn ai. Kasai nuh hawi ka-pu sa nai yhmchi py anawi iy, yhm pui ka-jeaung ngiereichi py phra ai,” napi.