Read Khumi Chin AMOS 5 Bible Online

AMOS 5 - Khumi Chin bible

AMOS 5

¹Aw Israela khumichi awi, nangchi ai veu pavum ai nai, kai i thui nai hini vo khulym tangai u.

²Anglo lengmyn Israela ly mana khala py ang thau teang pajau y na pa-rei atlym! Khaileaung salo y, mymy tlairei atlym bo; ni ai pathau ai nai ami py by y.

³Sa thai naira angym nai ARENG my, “Israela mary harei i dengdairei, tavaimi leaung sangrei tavai amsa teu i py, leaung chungvairei naini ali teang ai. Khumi leaung chungvairei pato nai mary ly leaung horei naini avum teang ai.

⁴ARENG my, “Israela khumichi awi, kai teng y ali u teang jau; naibaly nangchi heng u ai.

⁵Beraseba mary mang y chei iy chiu u moh. Bethela mary mang y kai ai hau u moh. Bethela mary ly ati sai py ny y nai lawm ai. Kilakala mary mang y py chei u moh. Huni mary i khumichi ly pri takhra mang y paryh pawn nai avum takengkei ai.

⁶ARENG teng y chei u; hunaibaly nangchi heng u ai. Huna ny y baly mymy ly Israela khumichi i tlang tleaung y, mai kamta ang tym ai. Mai ly Bethela mary i khumichi kang be iy, huni mai ai ami py pathym pajau ai ny y.

⁷Khumichi i nga ai avo naichi ai athorei my paka iy, leu meitang taphra nai khumichi awi, nangchi ly taham kasi avum takengkei ai!” napi.

⁸ARENG ly ka-si taukichi ai sa. Mymy ly ka-si niprawn hawi eupui eulo ka-jeaung ka-si ai py sa nai ne. Mymy ly kaveng ai kangvang lawm hai iy, kanithun ai py vum lawm hai bo. Mymy ly pangli tui bawibawichi ai palau iy, khaileaung salo y leih nai ne. Mymy i amyn ly ARENG ne.

⁹Mymy ly atho awm nai khumichi hawi nichi i amtangrachi taphra pawn bo.

¹⁰Tara jeungchira y teng y nai ai thui tamawn iy, leu meitang katheu nai khumichi ai naini, nangchi ly niu ngai u y lawh.

¹¹Nangchi ly khumi kamawnchi ai ana iy, nichi i chohpui chomaw ai lawm u bo. Hunai deaungkho y nangmychi sa nai yhm hlau kahawichira y, nangchi ly awm ai nai ngo u y. Nangmychi ui nai apu parai nai kreip akho i, kreip hang py nei ai nai ngo u y.

¹²Nangchi ly mana tanrei kamngo sa tamang iy, nangchi i kamngo ly mana tanrei jei ai hawi na mo, nanai kai pany. Nangchi ly khumi kahawichi ai ana iy, un tangka cha u. Khumi kamawnchi ai kateng chih y naimy, nichi ai tara jeung i dengdairei patheu u nai ne.

¹³Hina tanrei hawi y nai deung y, khumi kahawi i leu amkyn vui nai ly lyh ai nai by y.

¹⁴Nangchi ly tlang heng ai nai molam y hawi y naichi khai su iy, kahawi naini hau ly so u. Hunaibaly nangchi thui nai kamta, kani pri tavailuchi i ARENG Tameuh ly nangchi hawi vanrei awm takengkei ai.

¹⁵Hawi y nai ai niu ngai moh ly hawi naira ai ly paleung apei ba. Tara jeungchira y leu meitang awm ai nai akry u. Kani pri tavailuchi i ARENG ly hini khumichi theung i heng rai nai khumi phyreichi ai, pahen tan pahen lym ai.

¹⁶Hunai deaungkho y ati cheaungkhang sa thai nai ARENG my, “Mary theung i lamchira y paleung si ai hawi nai vo raawi, seng meingtymchira y tangam nai raawi thai ai. Vo khulym kawp naichi hawi vanrei jeu iy, vo ai nai li sa keungchi ai palau ai.

¹⁷Kreip akhochi dengdairei vo raawichi thai ai. Kai ly nangchi ai pajeng ai nai kang jeu nai deaungkho y, hina nai tym ai,” nanai ARENG my leu pei nai ne.

¹⁸ARENG i neng kani ajeng nai khumi i vui ly khri pa-rei ka-jei hawi parai na ly! Huni neng kani ly nangchi ai ati kahawi ang sa pi thai ai mo? Kangvang by y naimy kaveng khiu nai neng kani naini tym ai.

¹⁹Huni kani ly nangchi i vui khrangsi ai jei i, angpreng nai khala, tavym hawi avum lawh nai khumi kamta lawm ai. Ti y baly yhm y tym nai khala angpang y amkhaw i, pavui my patiu lawh nai khumi kamta lawn ai.

²⁰ARENG i neng kani ly kangvang ngo y naimy, kaveng tym nai neng kani lawn ai. Angvang phang nanai kangvang pipi by y naimy, khri pa-rei veng nanai neng kani lawm ai.

²¹ARENG my, “Nangchi i reita pawichi ai kaniu ngai y. Huni pawichi ai khrikhri pa-rei kapaso.

²²Nangchi i leng patlum nai kapathyp, teicha teinei talam naichi ai kai aly ngai y. Veung hawi nai tawnbawichi hawi apathyp nai py, kai aly ngai y.

²³Tyn tukulu nai khulym raawi py anawn u; nangchi i taro beu nai katynchi py, kai ly thai ai nai ngai y.

²⁴Adyh adawi naira ly micheaung tui kamta, hawi naira ly tui kang vai y nai tavo kamta leaung na sy.

²⁵“Aw Israela chengchi awi, nangchi ly daichi ka-vym meingtym y saneng vui palyhrei amki u nai thym khala, kai teng y kapathyprachi talam y naimy awm u nai ne.

²⁶Na i py vai, nangchi ly nangmychi my sa iy chiu u nai Sakkuth samrang tameuh hawi Khi-um ka-si tameuh mynchi ai, vaimy syn u ai nai tla ai.

²⁷Kai ly nangchi ai Damaska mary vai mang y, langheng y kang hawi vui ai,” nanai kani pri tavai luchi i ARENG Tameuh my leu pei nai ne.