Read Khumi Chin AMOS 6 Bible Online

AMOS 6 - Khumi Chin bible

AMOS 6

¹Zion mary y tlamsa tlamja naimy awm u nai khumichi awi, Samari mawi salo y chymme naimy awm u nai khumichi awi, mipuichi my ahui amang nai khumichi awi, khumi chengchi theung y tahm asang nai Israela chengchi awi, nangchi i vui ka-jei awm nai neng kani lawm ai!

²Kalaneh mary mang y chei iy khen cham. Hu i dengdairei Hamath mary mang py, Philistia pri kath mary mang py chei u. Huni prichi ly Juda hawi Israela prichi tleaung y hawi keh lawh a? Nichi i khu ka-peang ly nangchi i khu ka-peang tleaung y kau lawh sai a?

³Hawi y nai neng kani ang tym ai bo, nanai nangchi ym u y; nangchi i sa nai sai ly huni neng kani tym hai ai nai kasa bo.

⁴Kasai nuh kadangchira y aseaung nai khumichi awi, beramcho, sichochi i ngan kanau cha iy, pangpaho nibai tleaung y aseaung naimy akeng anam pataw nai khumichi awi, nangchi i vui ka-jei awm nai neng kani lawm ai!

⁵Nangchi ly Davida kamta khulymchi adih iy, tarochi beu naimy khulym thui ai nai ngai u.

⁶Kreip hang khau verei nei iy, hawi keh nai mui katui amthym u bo. Na i py Israela pri phra nai ai ly paleung si y naimy awm u lawh ly!

⁷Hunai deaungkho y pri pala nai avum nai khumichi theung i, nangchi ly angchei ne ai. Huna nai kamta nangchi i reita pawichi hawi cha nei pawichi ly tem ai.

⁸Kani pri tavailuchi i ARENG my, “Israela i kamlyh ly kapaso. Nichi i tlamsa naimy awm nai yhm puichi py kapaso. Nichi i mary pui hawi mary theung y awm nai cheaungkhangchi ai, paleung ka-echi teng y kapei vui ai,” napi.

⁹Yhm deaung harei y neampacho leaung horei awm rai i py, nichi dei u be ai.

¹⁰Dei nai khumi leaungrei i amjo amnau leaungrei my, dei nai khumi i veu mai patawi ai nai tym iy, yhm theung y awm nai khumi leaungrei teng y, “Ami awm rai mo?” nanai deng i, “Ami py by y leang bo!” nanai pathang nai raawi naini thai ai. Naibaly huni amjo amnau my, “Awm pypy! ARENG i amyn malawn py thui y ai nai achi adawn patyp ai nai tla,” napi ai.

¹¹ARENG my leu pei nai deaungkho y, yhm katheang kalenchi ly phra seaungkhrang ai.

¹²Keaungngochi ly lengseaung salo y angpreng reng a? Khumi ly si katai hawi pangli salo y li thawn vai sai a? Tuteu i malawn py nangchi ly adyh adawi naira ai dei asi kamta py, kateng ai teng y naira mang y py, tamang hai nai ne.

¹³Nangchi my Lodebar[2]mary ai peang vui nai molam y, amlyh ai nai ngai u lawh. Nangchi ly atyhtyh naimy amlyh ai nai ngai u lawh. “Kaimychi atho hawi Karnaim[3]mary ai peang vui nai ne,” nanai py thui u.

¹⁴“Aw Israela khumichi awi, kai ly pri takhra i tavaimi kamkawm harei pato iy, nangchi i pri peang hai vui ai. Huni paleung ka-e ly Hamath mawi aleaung lam dengdairei, tokalawi mang y awm nai Arabah leaunghawi y seih nai tavo ryrei, nangchi i khumichi ai ana ai,” nanai kani pri tavailuchi i ARENG my leu pei nai ne.