Read Khumi Chin AMOS 7 Bible Online

AMOS 7 - Khumi Chin bible

AMOS 7

¹Sa thai naira angym nai ARENG teng i paleung mei y kaniu nai ne. Samrang i vui choh keungchi hlau chum nai bo i, acha keungchi sai ali teang nai neng khala y, ARENG my akhutama kanghu ai sa nai ne.

²Huni akhutamachi ly pri verei i sai kangpho ngiereichi cha pawn nai kaniu. Naibaly kaimy, “Aw sa thai naira angym nai ARENG, nang i khumichi i kamngo pahen pi kyh ba! Nichi ly mana heng ai mo? Nichi ly atho di parai na a!” kana pi.

³ARENG ly paleung amtlau i, “Nang i niu naichi tym y leang mang,” napi.

⁴Kai ly sa thai naira angym nai ARENG teng i paleung mei hawi kaniu bi bo. Huni paleung mei niu naira y mymy ly mymy i khumichi ai mai hawi pajeng ai nai angveirym nai kaniu. Huni mai ly khaileaung anui suida pangli verei mai kang chum baly, khaileaung salo y py mai kang amteaung bo.

⁵Naibaly kaimy, “Aw sa thai naira angym nai ARENG, anawn rai! Hini pajeng naira ai khumichi ly mana kham pajau ai mo? Nichi ly mana heng ai mo? Nichi ly atho di parai na a!” kana pi.

⁶ARENG ly paleung amtlau i, “Hina nai py tym hai y leang,” ang napi.

⁷Kai ly Areng teng i takhra amteng hai nai kaniu. Huni amteng hai naira y siju amto hawi pata i, sa nai lengseaung angpang sahawi y siju amto harei syn iy angdo nai mymy ai kaniu.

⁸Mymy ly kai teng y, “Amo awi, nang ly ati niu mo?” nanai deng. Kaimy, “Siju amto harei kaniu,” kanapi. Mymy py, “Kai i khumichi ly cheaungkai vui nai angpang kamta lawm vui nai patei ai nai, hini siju amto ai teaung nai ne. Nichi ai kapajeng y ai nai paleung amtlau bi y leang bo.

⁹Isaka i kangpreangchi chiu nai meingtymchi phra ai. Israela pri i meingtym kachai ngierei ai, khaileaung ka-keu naini lawm hai ai. Kai ly samrang Jeroboam i samrang kangpreang deung tlum hai ai,” napi.

¹⁰Naibaly Bethela i pathyp pi nai keung Amaziah my Israela samrang Jeroboam teng y, “Amo ly samrang nang ai ka-awi sa ai nai khumichi theung y dawn paviu bo. Ni i thui nai leuchi molam y pri phra ai.

¹¹Ati mana thui mo na baly, ‘Jeroboam samrang ly tavai keung y dei ai i, Israela khumichi ly mychi pri i dengdairei, pri takhra mang y patiu vui nai avum ai,’ nanai thui,” napi naichi amti pi bo.

¹²Huni bo y Amaziah my Amo teng y, “Anawn pa, amo awi! thui bi moh. Juda pri y vawi teang ly hu y phai amo kalop hawi cho.

¹³Bethela mary y jeu iy amo leu thui bi moh jau. Hini meingtym ly samrang mymy kypkyp i chiu nai, cheng theaung achura yhm ne,” napi.

¹⁴Naibaly Amo my, “Kai ly vang-nu la iy amo sa nai amo ny y. Kai ly beram typ nai keung ne iy, thaidu keungchi kry nai khumi teu.

¹⁵Na i py ARENG my kai ai beram typ naira i nai palau i, mymy i khumi Israelachi teng y chei iy, amo leu thui pi ai nai pato nai ne.

¹⁶Hunai deaungkho y ARENG i leu pei nai tangai ba. Nangmy kai ai Israela khumichi mang abi iy ka-awi sa nai amo so moh, amo leu thui moh, napi.

¹⁷Huna nai thui nai deaungkho y Amaziah awi, ARENG my nang ai leu ang pei nai ly ‘Nang i aju ly mary theung y bima lawm ai. Nang i cho chanauchi py tavai keung y dei ai. Nang i peang nai khaileaung ly phy iy khumi takhrachi teng y pei pi vui ai. Nangmy py tameuh by y nai pri hareira y dei ai. Israela khumichi ly mymychi pri i dengdairei, pri pala naira avum u ai’ ” nanai pathang pi bo.