Read Khumi Chin AMOS 9 Bible Online

AMOS 9 - Khumi Chin bible

AMOS 9

¹Kai ly maicham sahawi y angdo nai ARENG ai niu bo. Mymy i leu pei nai ly “Achura yhm verei ahyn kanangkang na pa-rei ahyn hai ai nai Achura yhm i yhmmawm meaung pakhau peu. Hunichi ai pakhau peu iy khumichi i lu tleaung y tlo hai. Huni bo i khumichi ai ly tavai keung y kapadei ai. Ami py tleaung ai ny y, mani khumi py law tleaung pajau y ai.

²Khaileaung y angawm tai iy tavau pri y aheu teu i py, kai ly nichi ai ngo y nai nga pa-rei patiu ai. Kani mang y lyn kalau teu i py, nichi ai atheu kathiu ai.

³Nichi ly Karamela mawi salo y aheu u teu i py, nichi ai hau iy patiu ai. Kai teng i nai tleaung ai nai pangli paichi theung y aheu lawh baly, nichi ai pajawn ai nai pangli naka ai leu pei ai.

⁴Paleung ka-echi my patiu vui i py, nichi ai padei ai nai kaimy leu pei ai. Kai ly nichi ai sabawm y naimy, taphra vui ai nai leu pacheang veng bo,” napi.

⁵Kani pri tavailuchi i ARENG ly khaileaung y abi nai deaungkho y, kaleih pui theu bo; khaileaung y awm nai bawibawichi py vo ai. Khaileaung pri verei ly Aikupta pri i Naing tavo kamta, anem lawh, asang lawh ai. 1

⁶ARENG ly kani mang y mymy i yhm sa nai ne. Khaileaung salo y alumkum nai kani khusang ai khai bo. Pangli tuichi ai palau iy khaileaung salo y leih bo. Mymy i amyn ly ARENG ne!

⁷ARENG my, “Aw Israela khumichi awi, kai ly nangchi ai Ethiopia khumichi tleaung y aly len nai kang palawn bo. Kai ly nangchi ai Aikupta pri i dengdairei kang pahawi nai kamta, Philistia khumichi ai Karete tlawn i dengdairei py, Suria khumichi ai Kira pri i dengdairei py, kang pahawi nai ne.

⁸Sa thai naira angym nai kai, ARENG ly kamngo nawi parai nai, hini Israela pri ai kakhen patyp bo. Hini pri ai khaileaung i nai tama vui na pa-rei taphra ai. Na i py kai ly Jakob i kangpreang bawibawi ai taphra ai ny y,” napi.

⁹“Paho tleaung y chohnei alai nai kamta, kai i leu hawi Israela khumichi ai alai vui ai. Khumi cheng cheaungkhang theung y alai chum baly, ataing y nai khumi ngiereichi ai ly kaimy charyh vui ai.

¹⁰Kai i khumichi theung i, ‘Tameuh ly achi ai kamtang pei ai ny y,’ nanai thui nai kamngo awm nai ngiereichi ly tavai keung y dei u ai.”

¹¹ARENG my, “Anawi nai yhm hlau kamta lawm nai Davida i pri ai, kaimy palum teang nai neng kani tym ai. Ako nai lengseaung apaichi ai kaimy palum teang ai. Jangni i awm nai kamta, kaimy palum teang ai.

¹²Hunai deaungkho y Israela chengchi ly awm jo rai nai Edom pri ai py, vaichi khala y kaimy peang nai pri tleirei ai py, peang ali teang ai nai nga ai,” nanai tym hai ai nai ARENG my ang thui pi bo.

¹³ARENG my, “Choh tyn ai nai apho y na pa-rei, choh keung keu hawi nai neng hawi, kreip hang nip leila y na pa-rei, kreip athai pasu nai kanichi tym ai. Mawi katheang kalenchi mang i dengdairei, kreip hang katui leaung nai neng tym ai.

¹⁴Kai ly kaimy i khumichi ai, mychi i pri y kapahawi ali teang ai. Nichi ly phra nai marychi sa teang iy, huni marychira y awm ai nai nga u teang ai. Kreip akhochi sa iy kreip hang nei ai nai nga u ai. Akho baichi sa u iy amy i pati nai amti amjangchi ai amychi my cha ai nai nga u ai.

¹⁵Kai ly kaimy i khumichi ai, kaimy pei nai pri y kaimy awm hai ai; ami py nichi ai taphra naira avum hai bi y ai,” napi. Hini ly nangchi i ARENG Tameuh my leu pei nai ne.