Read Khumi Chin OBADIA 1 Bible Online

OBADIA 1 - Khumi Chin bible

OBADIA 1

¹Hini Obadia i amo leu ly Edom pri molam y Obadia teng y, sa thai naira angym nai ARENG my leu thui pi nai ne. ARENG ly khumi cheng cheaungkhangchi teng y, mymy i savai pato. “Angvei u rym! Edom pri y achi tavai tiu u sina,” nanai raawi kaichi thai u bo!

²ARENG ly Edom pri teng y, “Kai ly nang ai atho di hai ai; khumi bawibawichi ly nang ai mei aniu y nai sa ai.

³Nang i paleung len nai ly nangmy ai ang tapawp bo. Nang i mary pui ly lengseaung hawi sa nai khaw parai nai mary ne i, nang i awm naira ly asang parai nai mawi salo y ne nai deaungkho y, ‘kai ai ami my atheu kathiu pajau ai mo?’ nanai nangmy tlairei katheu reng nai ne.

⁴Nang ly ahmtlau i tabu kamta asang naira y awm nai deaungkho y, ka-si taukichi sala y awm nai ne teu i py, nang ai kaimy atheu kathiu ai.

⁵“Kangviuchi ly vum y ang jeu lawh baly, mymychi i ngai nai vawnsaichi ryrei la u nai ne. Kreip athai jaw ai nai jeu naichi py, kreip athai maidenrei khai mai reng nai ne. Na i py nang i paleung ka-echi ly nang i vawnsaichi la pi pawn bo.

⁶Esaw i katu chanauchi awi, nangchi i yhmtheaung katuichi ang lawm pi pawn veng bo.

⁷Nangchi i amsawi amnai asa naichi ly ang tapawp iy, nangchi ai nangmychi pri i dengdairei ang patheu pawn bo. Nangchi hawi vanrei tlamsa naimy awm nai khumichi my vai, nangchi ai peang vui bo. Nangchi hawi vanrei cha nei u nai ahawichi ly nangchi i vui deaung pateung u bo. Nichi ly nangchi i molam y, hini khumichi i tau cheng nai ly ma mang y tym pawn mo? nanai thui u nai ne.

⁸“Kai ly Edom pri y pajeng nai thym khala, ni i khumi kachengchi ai tamyh iy, cheng nai ngiereichi ai taphra vui ai.

⁹Tavai ateaung syn nai Teman mary i khumichi ly jei hyn u ai. Edom pri i tavaimi risa bawibawichi ly dei u ai.

¹⁰“Nang ly nangmy i amjo amnauchi[1]napi nai Jakob i katu chanauchi ai lawm iy padei nai deaungkho y, taphra nai avum ai. Deungtasarei kangji nga ai.

¹¹Paleung ka-echi ly huni khumichi i mary apai katheu taphra nai thym khala, nang ly sahawi mang angdo nai ne. Nang ly Jerusalem mary i yhmtheaung katuichi la vui iy mychi tengtawi phy apaji nai cheng takhrachi kamta, hawi y nai khumi ne.

¹²Nang ly Juda pri i nangmy i amjo amnauchi, taham kasi avum nai ai paleung ateng hai ai nai avo y. Nichi phra nai kani y amo theu ai nai avo y. Nichi paleung bi u nai thym khala nang ly amlyh ai nai avo y.

¹³Nang ly kai i khumichi ngari kamtang avum nai ai paleung ateng hai iy nichi ka-jeira avum nai thym khala nichi i mary theung y kun ai nai avo y. Nichi i vawnsaichi la pi vui ai nai avo y.

¹⁴Nang ly preang ai nai atho sa nai khumichi ai patiu ai nai lam sangumchira y angdo ai nai avo y. Nichi ka-jeira avum nai thym khala nichi ai paleung ka-echi kiu y au ai nai avo y.

¹⁵“Kai, ARENG my khumi cheng cheaungkhangchi ai tara chih ai nai neng kani tym hai ai. Aw Edom pri awi, amichi ai nangmy i sa nai kamta amichi my nang ai ang sa u teang ai. Nang ly nangmy i pei nai kamta nga teang ai.

¹⁶Kai i khumichi ly kai i mawi kachai salo y kai i kho nai pajeng nai khau nei u bo. Tengpang sahawi i khumi cheng cheaungkhangchi py huni tleaung y kho keh nai pajeng nai khau nei u ai. Nichi ly huni ai nei pyn chum baly, tama u pawn ai.

¹⁷“Na i py Zion mawi salo y tleaung nai khumi phyrei awm ai; hini mawi ly meingtym kachai lawm ai. Jakob i kangpreangchi ly mymychi i vui amtym ai nai nga ai. Pri amtym ai nai nga u ai.

¹⁸Jakob i kangpreangchi hawi Josepha i kangpreangchi ly mai hawi atawm ai. Mai ly anyn angso ai kang hai nai kamta, nichi ly Esaw i kangpreangchi ai taphra u ai. Esaw i katu chanau leaung leaungrei py, dei y naimy awm ai ny y. Hini ly kai, ARENG my kang thui pi nai leu ne.

¹⁹“Juda pri tokalawi ngan mang i khumichi ly Edom pri ai py, nidym mawi kheutangchi mang i khumichi ly Philistia pri ai py peang vui ai. Israela chengchi ly Ephraim hawi Samari khu ka-peangchi peang u ai i, Benjamin khumichi my Kilead pri peang ai.

²⁰Israela pri tosyh mang i, pri pala nai avum nai khumichi i tavaimichi ly vawi teang iy, tosyh mang Zarephath mary khrairei, Phoenisa pri peang u vui ai. Jerusalem mary i pri palara avum iy, Saradi mary y tym nai khumichi ly Juda pri tokalawi ngan mang i marychi peang u ai.

²¹Eaung pawi nga nai Jerusalem mary i khumichi ly Edom pri y tiu i peang u ai. Huna nai khala ARENG mymy kypkyp ly huni pri y samrang lawm ai.”