Read Khumi Chin JONA 1 Bible Online

JONA 1 - Khumi Chin bible

JONA 1

¹Kanirei nai khala y Amittai i chapo Jona teng y ARENG my leu pei nai ne.

²Mymy ly “Nang ly Ninevi mary pui y chei iy, pany hai ba. Huni mary i khumichi ly khri pa-rei aso y, nanai kai pany,” napi.

³Na i py Jona ly ARENG teng i dengdairei preang vui ai nai Joppa sampho tuivum y chei. Joppa mary y tym baly Spain pri mang y chei ryp ai nai sampho apeh khyp. Jona ly sampho atang nai vang pei iy, ARENG hawi palo nai Spain mary mang y, sampho i khumichi hawi vanrei abang ai nai, sampho atang bo.

⁴Na i py sampho ly pangli theung y tym nai khala, ARENG ly ali kamchai pui aho hai. Huni ali kamchai pui ly khri pa-rei ho nai deaungkho y, sampho ly phra vi na bo.

⁵Sampho i khumichi ly jei hyn nai deaungkho y, amymy i ym nai tameuhchi teng y mymychi ai sabawm ai nai chiu sa u. Naibaly sampho vawn jang ai nai vawnsaichi tui theung y aphi u. Huna nai thym khala y Jona ly sampho taku theung y satla iy i vui nai ne.

⁶Naibaly samphora y lu sa nai miteaung keh ly chei i ni teng y, “Nang ly ati mana nai y i ngym vui lawh mo? Angthau ly nangmy i tameuh teng y achi ai atleu ai nai chiu so bei. Mymy ly achi ai pahen iy atleu tan atleu lym ai,” napi.

⁷Naibaly sampho i khumichi my, “Achi hinai kamta patangra avum nai ly amimi i kamngo molam y tym nai mo, nanai pany ai nai tambe va u sina, nanai mychi tengtawi arum u. Nichi ly tambe va i, Jona i amyn avah khyp bo.

⁸Hunai deaungkho y nichi my, “Hina nai patangra tym nai ly ami i kamngo mo? Kaichi teng y thui pi. Nang ly ati aly y hini sampho tleaung y tym nai mo? Mani pri i jeu nai mo? Mani cheng khumi mo?,” nanai Jona teng y deng u bo.

⁹Jona my, “Kai ly Hebrai khumi ne; kacheng hawi pangli ai sa nai keung, kani pri tavailuchi i ARENG Tameuh ai chiu nai khumi ne,” nanai pathang.

¹⁰Hunaibaly Jona my, mymy ly ARENG teng i dengdairei preang vui nai khumi ne, nanai py huni khumichi teng y thui pi. Sampho i khumichi ly jei hyn naimy ni teng y, “Nang i sa nai kalop ly ka-jei hawi parai na ly!” napi u.

¹¹Huna nai thym khala ali kamchai ly aho tleaung aho ra bo. Hunai deaungkho y sampho i khumichi my ni teng y, “Ali kamchai anawn hai ai nai, kaichi ly nang i tlang tleaung y ati mana sa ai nai avo mo?,” nanai deng u.

¹²Jona my, “Kai ai pangli theung y aphi u; naibaly ali kamchai ly aham ryp ai mang. Nangchi ali kamchai avum nai ly kai i kamngo nai y ne, nanai kai pany bo,” nanai pathang.

¹³Na i py sampho i khumichi ly Jona ai pangli theung y aphi vui ai nai tleaung y ly sampho ai tui peang mang y tym ai nai, khri pa-rei atho sa nai hai u bo. Na i py ali kamchai ly aho tleaung ahora nai deaungkho y, nichi ly ati sai py so u thai y.

¹⁴Hunaibaly sampho i khumichi my ARENG teng y, “Aw ARENG, hini khumi i dei nai molam y, kaichi ai dei ai nai pa-rei pajeng y ai nai kang takeng. AwARENG, hini kalop ly nangmy i ngai nai kamta sa nai kalop ne,” nanai chiu sa u bo.

¹⁵Naibaly nichi ly Jona ai tapawm iy, pangli theung y aphi u. Huna nai khala ali py vaimy aham ryp bo.

¹⁶Huna nai aham nai khala y sampho i khumichi ly ARENG ai khri pa-rei jei u nai deaungkho y, apathyp u chum baly mymy ai chiu ai nai vaineng adeu u nai ne.

¹⁷Naibaly ARENG my leu pei nai deaungkho y, ngo kalen pui amairei ly Jona ai pajawn vui bo. Jona py ngo taku theung y kani thomrei, vum thomrei aeung ai nai tla bo.