Read Khumi Chin JONA 4 Bible Online

JONA 4 - Khumi Chin bible

JONA 4

¹Huna nai molam y Jona ly khri pa-rei paleung ka-dawn hawi y i kado theu bo.

²Hunai deaungkho y, “Aw ARENG, kai ly kaimy i pri dengdairei amso y rai khala my, nang ly hina nai kamta sa ai, nanai kaimy kang thui pi yb nai ny y a? Hini molam y kai ly Spain mary mang y preang ai nai atho kasa nai ne! Nang ly tamen naira hawi pahen naira awm nai keung, neaung hawi naimy pahen jojo nai keung, kamngo pajeng ai nai avo khyp teu i py, pajeng y naimy law tleaung hai nai keung Tameuh ne, nanai kai pany.

³Huna nai y aw ARENG, kai ly vaimy dei ai nai kangai bo. Kai i vui ly heng nai tleaung y dei nai hawi keh alam bo,” nanai chiu sa.

⁴ARENG my, “Nang ly hina nai kamta kado theu ai nai hawi a?,” nanai deng.

⁵Naibaly Jona ly mary nisi mang y chei iy, my i vui taichy sa i, taichy ka-khui y ateh naimy, Ninevi mary ly mana lawm ai mo, nanai ajeng.

⁶Huna nai khala Jona teng y kani bi kangngo tym hai y ai nai ARENG Tameuh my palang-uipo keung harei prau hai i, Jona i tlang tleaung y ka-khui akhui hai. Naibaly Jona ly huni keung prau nai deaungkho y, khri pa-rei amo theu.

⁷Na i py kani pa-nyh khawn khutawi nai khala y, Tameuh ly Jona i ka-khui abyh nai keung ai, kaleung harei ai cha hai i, huni keung ly dei vui bo.

⁸Kani si nai khala y Tameuh ly nisi mang ali kabi theu hai. Jona ly my i lu y kani bi hai nai deaungkho y, paleung pany y vui na i, dei ai ngai nai paleung ka-dawn tym. Huna nai y Jona my, “Kai i vui ly heng nai tleaung y dei nai hawi alam ai,” nanai tangam bo.[1]

⁹Na i py Tameuh my Jona teng y, “Palang-uipo keung harei molam y, nang ly kado theu ai nai avo a?,” nanai deng. Jona my, “Kai ly dei ai nai pa-rei kado theu bo!,” nanai pathang.

¹⁰ARENG my ni teng y, “Nang ly nangmy ui y, palum y naimy, vumrei y prau iy vumrei y my dei veng ryp nai, palang-uipo keung ai pasai lo-oh!

¹¹Hunai kamta ly hawi nai, hawi y nai khawilang thai y nai khumi 120,000 rei chang y naichi hawi, tawnbawi neangneang awm nai Ninevi mary ai, kai ly pasai keh ai nai avo na a!,” napi.