Read Khumi Chin Kati Nai 1 Bible Online

Kati Nai 1 - Khumi Chin bible

Kati Nai 1

¹Israela chengchi Aikupta pri i theu u nai pa-nyh saneng, pa-nyh lo angchei i kani y, ARENG ly Sinai daichi ka-vym y awm nai Tabynako mang dengdairei Mosi teng y leu pei nai ly

²“Nang hawi Aron ly Israela cheng nupai hawi yhm dengtheung ka-thui ka-thui amynchi la ai nai tla.

³Tavai thau pajau nai tleaungri ka-cheang saneng apomrei hawi apomrei leng neampacho bawibawi amyn la ai nai tla.

⁴Theaung ha harei i nupaira lu sa nai leaungrei my nangchi ai sabawm sy,” napi.

⁵Khumi mipuichi theung i vawi takhra nai, cheng theungchi theung y lu sa naichi ly hinichi ne: [Theaung] — [Nupai lu] Ruben — Sedeur i chapo Elizura Simeon — Zurishadai i chapo Shelumiel Juda — Amminada i chapo Nashon Isakhar — Zuar i chapo Nethanela Zebulun — Helon i chapo Eliaba Ephraim — Ammihu i chapo Elishama Manase — Pedazur i chapo Kamaliela Benjamin — Kideoni i chapo Abidan Dan — Ammisadai i chapo Ahieza Aser — Okran i chapo Pakiela Kad — Deuela i chapo Eliasapha Naphtali — Enan i chapo Ahira

¹⁷Mosi nini Aron ly huni cheng theaung lu sa naichi i kasabawm hawi,

¹⁸pa-nyh lo i angchei kani y Israela cheng bawibawichi ai palau achu iy, nupai hawi yhm dengtheung ka-thui ka-thui amynchi la bo. ARENG my leu pei nai kamta, saneng apomrei hawi apomrei leng khumi ka-cheang neampacho bawibawichi ai amyn la iy khai typ bo. Mosi ly Sinai daichi ka-vym y khumi amyn la nai ne.

²⁰Jakob i chapo chalu Ruben theaung dengdairei amteaung iy, tavai thau pajau nai saneng apomrei hawi saneng apomrei leng, tleaungri ka-cheang neampacho bawibawichi ai, nupai hawi yhm dengtheung ka-thui ka-thui amyn la bo; khumi vuikanai ly hinichi ne: [Theaung] — [Vuikanai] Ruben — 46,500 Simeon — 59,300 Kad — 45,650 Juda — 74,600 Isakhar — 54,400 Zebulun — 57,400 Ephraim — 40,500 Manase — 32,200 Benjamin — 35,400 Dan — 62,700 Aser — 41,500 Naphtali — 53,400 Bawibawi: — 603,550

⁴⁷Amyn la naira y Levi theaungchi ai ly amyn lo y leang.

⁴⁸Ati mana nai mo na baly ARENG my Mosi teng y,

⁴⁹“Nang ly tavai thau ai nai amyn la nai khala y Levi theaungchi tabawi moh.

⁵⁰Nichi ai tavai thau hai ai nai tleaung y ly kai i awmra Tabynako hawi huni i ateaung bawibawichi ai kry ai nai keung y khai. Nichi ly Tabynako hawi huni i ateaungchi tawn ai nai hawi, hunira y kalop sa ai nai deaungkho y, Tabynako ka-ki tai sa iy awm u ai nai tla.

⁵¹Nangchi ly tai asyh nai tleirei Levi theaungchi my Tabynako ai vym iy, meingtym kangthara Tabynako ai tahyh bi ai nai tla. Levi theaungchi ny y naimy takhra khumi leaungrei ly Tabynako sahawi y ahai lawh baly, huni khumi ai ly padei takengkei ai nai tla.

⁵²Israelachi ly tai naira meingtym tahyh nai khala mychi i nupai kamkawm ka-thui ka-thui mychi i tamkhawn anui y meingtym la ai nai tla.

⁵³Na i py khumi leaung leaungrei ly Tabynako sahawi y ahai lawh baly, kai ly kado theu ai i, cheng theaung verei kapajeng lawh ai; hunaibaly Levi theaungchi ly Tabynako typ ai nai, Tabynako ka-ki tai sa iy awm u ai nai tla,” napi.

⁵⁴ARENG my Mosi teng y leu pei nai kamta, Israela chengchi ly sa u bo.