Read Khumi Chin Kati Nai 10 Bible Online

Kati Nai 10 - Khumi Chin bible

Kati Nai 10

¹ARENG my Mosi teng y,

²“Nang ly khumi mipuichi ai palau achu nai khala py, tai naira vym nai khala py, thai hai ai nai tangka baw nyhrei thip.

³Baw nyhrei tlenrei khyhmy katyn jan kasau eng nai khala, khumi mipuichi ly kai i awmra Tabynako katheu pa-khora y awm nai nang teng y angym u ai nai tla.

⁴Na i py bawi harei eng khyh lawh baly, nupaichi ai lu sa naichi naini nang teng y jeu achu u ai nai ne.

⁵Baw katyn tlepaechy eng lawh baly, nisi ngan mang y tai nai Israela theaungchi khuleaung amsa man ai nai tla.

⁶Pa-nyh bawi katyn tlepaechy eng lawh bi baly, tokalawi ngan mang y tai nai Israela theaungchi khuleaung amsa ai nai tla. Huni bo y baw katyn tlepaechy eng bi lawh baly, tai naira vym u ai nai tla;

⁷na i py khumi humpui verei ai kachu nai khala y ly baw eng nai katyn jan kasau y eng pi ai nai tla.

⁸Baw ly pathyp pi nai keung Aron i chapochi my eng ai nai tla. “Hini anui mang i reitachi ly nangchi chengvui jeungrei tangai u ai nai tla.

⁹Nangchi i pri y paleung ka-echi my tiu nai khala y, paleung ka-echi ai amtang iy tiu teang ai nai, hini bawchi eng iy tavai kachyh ai nai tla. Nangchi i Tameuh, Kai ARENG ly nangchi ai sabawm ai i, paleung ka-echi kiu i nai atleu ai.

¹⁰Huni bo y amo theu nai pawi, napi nai lo si pawichi hawi takhra reita pawichi sa naira y leng patlum nai kapathypra hawi, leunghawi kapathypra talam nai khala y, nangchi ly bawchi eng u ai nai tla. Naibaly kai ly nangchi ai sabawm ai. Kai ly nangchi i ARENG Tameuh ne,” napi.

¹¹Israela chengchi Aikupta pri dengdairei theu nai bo, pa-nyh saneng, pa-nyh lo i kani apomrei kani y ARENG i awmra Tabynako ai khiu nai tamai angteang kalau baly,

¹²Israela chengchi ly Sinai daichi ka-vym i nai khuleaung amsa u bi bo. Tamai ly Paran daichi ka-vym y tym nai khala anawn nai ne.

¹³Nichi ly Mosi dengdairei ARENG my leu pei nai kamta khuleaung amsa u bi bo;

¹⁴khuleaung amsa nai tleirei y dawn pasym yb nai kamta amsa u nai ne. Juda theaung tavai tamkhawn nithun mang hui nai kamkawm ai Amminada i chapo Nashon my lu sa; nichi ly kamkawmchy ka-thui ka-thui mo amtheung iy tako u man nai ne.

¹⁵Isakhar theaung ai Zuar i chapo Nathanela my lu sa,

¹⁶Zebulun theaung ai ly Helon i chapo Eliaba my lu sa nai ne.

¹⁷Naibaly Tabynako ai vym i, kerashon hawi Merari nupaichi my, huni ai angjeaung iy amsa u bo.

¹⁸Naibaly Ruben theaung tavai tamkhawn nithun mang hui nai kamkawm ai ly Sedeur i chapo Elizura my lu sa iy, kamkawm ka-thui ka-thui hui u nai ne.

¹⁹Zurishadai i chapo Shelumiel ly Simeon theaung ai lu sa.

²⁰Deuela i chapo Eliasapha ly Kad theaung ai lu sa pi.

²¹Naibaly Levi theaung kohath nupaichi ly Tabynako i vui ateaungchi angjeaung naimy amsa u bo. Nichi ly vai tai ai naira y tym baly Tabynako leng chum veng bo.

²²Naibaly Ephraim theaung tavai tamkhawn nithun hui nai kamkawm ai Ammihu i chapo Elishama my lu sa iy, kamkawm ka-thui ka-thui hui u.

²³Manase theaung ai ly Pedazur i chapo Kameliela my lu sa.

²⁴Benjamin theaung ai ly Kideoni i chapo Abidan my lu sa.

²⁵Kangkhym keh i kamkawm Dan theaung tavai tamkhawn nithun hui nai kamkawm ai Ammisadai i chapo Ahieza my lu sa iy, kamkawm ka-thui ka-thui hui u nai ne.

²⁶Aser theaung ai ly Okran i chapo Pakiela my lu sa.

²⁷Naphtali theaung ai ly Enan i chapo Ahira my lu sa.

²⁸Israela chengchi ly tai naira vym iy khuleaung amsa nai tleirei, huna nai kamta kamkawm ka-thui ka-thui amsa u bo.

²⁹Mosi ly Midian cheng Jethro i chapo, mymy i naisa Hobab teng y, “ARENG my kaichi ai pei ai nai adeu yb nai pri y kaichi chei u ai. ARENG my Israela chengchi ai yhmtheaung katui nang chawn hai ai nai adeu yb nai deaungkho y, kaichi hawi vanrei abang jau, kaichi my nang ai py kang paji sei ai mang,” napi.

³⁰Hobab my, “Kai ly abang y leang bo, kaimy i saleaung y kavawi ali teang ai bo,” nanai pathang.

³¹Naibaly Mosi my, “Kaichi ai khai su mo kyh; nang ly daichi ka-vym khuleaung lam pany nai deaungkho y, tai sa ai nai meingtym py kaichi ai thui pi thai ai.

³²Nang ly kaichi hawi vanrei abang baly, ARENG my kaichi ai amtheaung hai nai bawibawi ly nang py nga teang ai mang,” napi.

³³Khumi mipuichi ly Sinai mawi kachai dengdairei theu iy, kani thomrei ka-teng tako u bo. Nichi ai tai naira meingtym pei ai nai ARENG i Leu Maikawm Pawm ly nichi i momang y tako hai jojo.

³⁴Nichi ly tai naira i nai theu nai tleirei, ARENG i tamai ly kani thun y nichi i salo mang hui nai ne.

³⁵Leu Maikawm Pawm amsa hai nai tleirei, Mosi my, “Aw ARENG, ang thau ly nang i paleung ka-echi ai ahei seaungkhrang hai iy, nang ai niu ngai y nai khumichi ai preang hai pawn! nanai py,

³⁶Leu Maikawm Pawm ai anawn hai nai khala, “Aw ARENG, sang meaungkateaungrei chang y nai Israela chengchi teng y jeu ali teang kyh ba,” nanai py thui jojo nai ne.