Read Khumi Chin Kati Nai 11 Bible Online

Kati Nai 11 - Khumi Chin bible

Kati Nai 11

¹Khumi mipuichi ly mymychi i ngari kamtang avum nai molam y, ARENG ai josei u nai khala, mymy ly khri pa-rei kado theu i, nichi i tlang tleaung y mai tla hai. Mai ly tai naira kachawn mang y awm nai khumichi ai kang bo.

²Naibaly Khumi mipuichi ly sabawmra nga ai nai Mosi ai palau u; Mosi my ARENG teng y chiu sa pi i, mai ly rym chauchau vui bo.

³Huni meingtym ai ly Tabera,[1]nanai amyn pathi; ati mana nai mo na baly ARENG i mai my nichi i tlang tleaung y tla hai nai deaungkho y ne.

⁴Israela chengchi hawi vanrei abang nai cheng takhrachi ly khri pa-rei mawi alam u; Israela chengchi malawn py, “Mawi kanglam pajau y na bo!

⁵Kaichi ly Aikupta pri y ngo mawi van y naimy, ngai nai ryrei cha ai nai nga; jawitang athaichi, sangpho pajawichi, maje mareih, maje kamleng, maje kangleungchi py cha ai nai nga;

⁶vai achi ly atho by y na bo, kani tleirei Manna tako ny y baly cha ai nai ati sai py by y na bo!” nanai tangam u bo.

⁷(Manna ly an kadau pjaw nai thengthai hm hawi atawm.

⁸Hunichi ly vum y kadam hawi vanrei tai naira y tla mang; khutawi nai khala khumi mipuichi ly huni Mana pakym u nai ne. Huni ai ly nip i mo, deng i mo, tako dei palawn u; naibaly huni tako dei ai byh iy, tako phi palawn u. Kalum kathau ly olive asitui katlen iy paawp nai tako hawi atawm.)

¹⁰Khumi mipuichi ly mymychi i tai pa-kho tleirei y akachu u iy, josei tangam nai raawi Mosi ly thai bo. ARENG my nichi ai kado theu hai nai deaungkho y, Mosi ly paleung hawi y nai ne.

¹¹Naibaly Mosi my ARENG teng y, “Nang ly kai ai ati mana nai ngari kamtang avum hai lawh mo? Ati mana nai y kai ly nang teng y meimai ngo y lawh mo? Hini khumi mipuichi i vui y lu sa ai nai, ati mana nai kai ai pei lawh mo?

¹²Kai ly nichi ai sa nai py ny y, nichi ai katapen nai py ny y! Nang ly nichi i amsi pajochi teng y pei ai adeu nai pri y chei nai lam jeungrei, ati mana nai kai ai deaungdi katyp khumi palawn iy, nichi ai peu hai lawh mo?

¹³Hini khumichi cha ai nai mawi ly kaimy manira hau iy ka-leu kanga pajau ai mo? Nichi ly mawi hnei nai josei tangam u bo.

¹⁴Hini khumi bawibawichi i vui kaimy tlairei ly so pi thai y leang; hini ly kai i vui khri pa-rei rai parai nai kalop ne!

¹⁵Kai ly hini kalop sa jojo ai na baly, nang ly kai ai pahen na baly, vaimy padei iy, hini ngari kamtang i nai lawi hai ba,” nanai takeng bo.

¹⁶ARENG my Mosi teng y, “Israela cheng theung i tahm awm iy lu sa pajau nai keung leaung vui saryhreichi ai kai i awmra Tabynakora y jeu achu hai ly nang i sahawi y angdo hai.

¹⁷Huni meingtym y kai kang jeu ai i, nang hawi leu arum ai; kaimy nang ai kang pei nai haiho phyrei la iy nichi teng y kapei ai. Naibaly hini khumi mipuichi i vui sa pi ai nai kalopchi, nichi my nang ai ang sabawm pajau ai i, huni kalop ly nangmy leaungrei sa ai nai ny y leang bo.

¹⁸Vai nang ly khumi mipuichi teng y hina nai kamta thui pi; ‘Nangchi ly khawndam apachai u, nangchi mawi cha ai nai nga u ai. Kaichi ly Aikupta pri y mawi bym pa-rei cha ai nai nga, nanai thui nai py, hu y heng nai hawi keh alam, nanai josei tangam naichi py ARENG ly thai bo. ARENG my nangchi ai mawi ang pei ai bo i, nangchi cha ai nai nga u ai.

¹⁹Nangchi ly kanirei, kani nyhrei, kani pangrei, kani horei, kani apom ryrei mawi cha ai nai khyh ny y i,

²⁰mawi ly amleu ano iy palei na pa-rei, lo jeungrei cha ai nai nga u ai. Ati mana nai mo na baly nangchi Aikupta pri y kadeaung naimy, nangchi hawi vanrei awm nai ARENG ai patlaw su iy, josei tangam u nai deaungkho y ne’,” napi.

²¹Mosi my ARENG teng y, “Kai teng y khumi leaung 600,000rei awm; nang ly nichi ai lo jeungrei mawi pacho ai, nanai thui bo.

²²Nichi bym pa-rei cha ai nai si, beram, mi-i ka-lawn ngo pajau na a? Nichi i vui pangli theung i ngo ka-lawn pa-rei ngo pajau na a?” napi.

²³ARENG my, “Kai so thai y nairachi awm a? Kai i thui naichi ly ne khyp mo, ne khyp y mo, nanai kra y naimy nang niu ai mang!” napi.

²⁴Hunaibaly Mosi ly Tabynako i nai theu iy, ARENG my leu pei nai ngierei, khumi bawibawichi teng y amti pi teang bo. Ni ly Israela cheng lu sa nai leaung vui saryhreichi ai pangym iy, Tabynako ka-ki angdo hai nai ne.

²⁵Naibaly ARENG ly tamai theung y satla kathiu i, Mosi hawi leu arum bo. ARENG ly Mosi teng y pei nai phailo phyrei la iy lu sa nai leaung vui saryhreichi teng y pei pi bo. Nichi ly phailo nga u nai khala amochi kamta aeu u; na i py nichi ly tlenrei aeu u khyh.

²⁶Lu sa nai keung leaung vui saryhreichi theung i, Eldad hawi Medad nini ly Tabynako mang y chei y naimy, tai theung y awm hawi jo. Nini i tlang tleaung y phailo tym nai khala, nini py amochi kamta aeu hawi teang.

²⁷Thawndeang leaungrei my Eldad hawi Modad nini i sa nai saichi Mosi teng y angpreng iy amti pi bo.

²⁸Naibaly thawndeang deaungdi khala i dengdairei Mosi ai sabawm nai keung, Nun i chapo Josua my Mosi teng y, “Sara awi, nini ai kam kyh!” napi.

²⁹Mosi my, “Nang ly kai i molam y ati thui nai mo? ARENG ly mymy i khumi mipuichi teng y phailo pei nai deaungkho y, nichi ly amochi kamta ly aeu u lengleang na sy!” napi.

³⁰Naibaly Mosi hawi Israela cheng lu sa nai leaung vui saryhreichi ly tai naira mang y vawi u ali teang bo.

³¹ARENG ly tlenrei khyhmy pangli i dengdairei ali theu hai i, ali kamrawi y thengmynchi abawi hai bo. Huni thengmynchi ly khaileaung salo miu nyhrei ka-sang mang akheang tapai i, tai angam mang ka-ki, kanirei ka-teng kamlo ryrei y chym u nai ne.

³²Hunaibaly khumichi ly kani khengrei, vumtorei hawi khawn pa-nyh kani khengrei py, thengmynchi patiu u lengleang bo; khumi leaungrei y di keh nai thengmyn patiu nai ly teaung 125rei kawi nai ne. Nichi ly thengmynchi ai tai ka-ki pala jawn iy pajei u bo.

³³Nichi ly thengmyn mawi awm ma mang rai nai khala ARENG my kado theu hai i, nichi ai no kanghawi man hai bo.

³⁴Huni meingtym y mawi abui nai khumichi i kadei veu up nai deaungkho y, Kibroth Hatava, nanai amyn palau bo; (huni ly “mawi abui nai khumichi i tapreaung,” nanai sai ne.)

³⁵Nichi ly huni meingtym i dengdairei khuleaung amsa u bi nai, Hazeroth y tym u i, hu y tai u bo.