Read Khumi Chin Kati Nai 14 Bible Online

Kati Nai 14 - Khumi Chin bible

Kati Nai 14

¹Naibaly khumi mipuichi ly paleung bi nai deaungkho y, vumtorei vo hang lengleang na.

²Nichi ly Mosi nini Aron tlang tleaung y, “Kaichi ly Aikupta pri y mo py ne sy, hini daichi ka-vym y mo py ne sy, dei nai ly hawi keh alam rai!

³ARENG ly ati mana nai y kaichi ai, huni pri mang y pahawi lawh mo? Kaichi ly tavai keung y kadei u ai bo he. Kaichi i aju chanauchi ly paleung ka-echi my patiu vui ai. Lu sa nai keung vawi iy Aikupta pri y vawi ali teang nai ly hawi khere y a?,” nanai josei u bo.

⁴Naibaly nichi my, “Achi ai Aikupta pri mang y pahawi ali teang ai nai lu sa nai keung leaungrei vawi u sina,” nanai mychi tengtawi arum u bo.

⁵Huna nai khala Mosi hawi Aron nini ly khumi mipuichi i mo y khaileaung y ambeu hawi bo.

⁶Kanan pri y khen paviu naichi theung i, Nun i chapo Josua hawi Jephonneh i chapo Kaleb nini ly paleung ama nai y, myni i baichu sei vui iy,

⁷“Kaichi khen paviu nai pri ly awm ai nai khri pa-rei hawi nai pri ne.

⁸ARENG my achi ai awm hai baly, teicha teinei awm angym iy paitiu khuta thym nai pri ang pei ai nai achi ai ang pahawi ai mang.

⁹ARENG ai tiu ai nai tau u moh; Kanan pri khumichi ai py jei u moh. Achi my nichi ai tiu baly rai y naimy pajau ai. ARENG my achi ai ang awm hai baly, nichi ai kry nai tameuhchi ly sum u ai; hunai deaungkho y jei u moh,” nanai khumi mipuichi teng y thui pi hawi nai ne.

¹⁰Khumi mipuichi ly huni leu thai nai khala, nini ai lengseaung hawi aphi ka ai nai atho sa u bo. Na i py huna nai thym khala ARENG i nang nai sangso kangvang ly Tabynako salo y angvang nai niu u nai ne.

¹¹ARENG my Mosi teng y, “Hini khumichi ly mana tanrei kai ai tahm khai y naimy awm u ai mo? Kai ly nichi i mei ka-niu y rengrang tlai naichi sa pi i py, kai ai ym ai nai mana tanrei akhi u jojo ai mo?

¹²Kai ly nichi ai no kanghawi tym hai iy, tamyh vui ai. Na i py kai ly nang ai nichi tleaung y kang peung hai iy, sa thai naira len nai khumi cheng i ampo lawm hai ai!” napi.

¹³Na i py Mosi my ARENG teng y, “Nang ly hini khumichi ai nangmy i sa thai naira hawi Aikupta pri i dengdairei pahawi bo. Aikupta chengchi ly nang i khumichi ai nangmy ka-jeira tym hai, nanai thai nai khala,

¹⁴nichi my hini pri y awm nai khumichi teng y, hini satang thui pi ai. ARENG nang ly kaichi hawi vanrei awm, nanai py, nang i tamai ly kaichi salo y amteng, nanai py, nang ly kani thun y tamai angjawi, vum y maiteaung hawi kaichi ai lam patei, nanai py, hini pri i awm nai khumichi pany yb nai ne.

¹⁵Vai nang ly nangmy i khumichi ai tamyh pawn ai na baly, nang i amyn amthang nai satang thai reng nai khumichi my,

¹⁶nang ly pei ai, nanai adeu nai pri y nang ly pahawi pajau y nai deaungkho y, hini khumichi ai daichi ka-vym y padei pawn nai ne, nanai thui u ai.

¹⁷Hunai deaungkho y aw ARENG, vaimy nang i sa thai naira patei pi kyh ba. Nangmy thui nai ly

¹⁸“Kai ARENG ly neaung hawi nai ne. Tamen naira hawi ka-ym awm nai keung ne iy, kamngo nai hawi tiu naichi ai pahen pi nai ne. Na i py amhm ampochi i kamngo nai y, nichi i katu chanauchi ai deung thom deung palyh khrairei kapajeng ai, nanai adeu nai kamta kasa ai.

¹⁹Naibaly aw ARENG, nang ly hini khumichi Aikupta pri i theu nai dengdai vaini khrairei, nichi i sa tamang nai kamngochi pahen pi nai kamta, nang i tamen naira len parai nai hawimy vai py, nichi i sa tamang nai kamngochi pahen pi ai nai kang hnei kang takeng nai ne,” nanai chiu sa bo.

²⁰Naibaly ARENG my, “Nangmy takeng nai deaungkho y kai ly nichi i kamngochi pahen pi mang.

²¹Na i py kai ly heng nai keung ne iy, kai i nang parai nai sa thai naira ly khaileaung pri verei y ahei nai kamta,

²²hini khumichi theung i amimi py huni pri y kun ai nai ngo y; nichi ly kai i nang parai nai kangvang sangso py, Aikupta pri hawi daichi ka-vym theung y kai i sa nai rengrang tlai naichi niu teu i py, nichi ly kai ai tahm khai y jojo iy, kai i leu py tangai u y.

²³Kai my nichi i amsichi teng y pei ai adeu nai pri y, nichi ly kun ai nai nga ai ny y. Kai ai khai su nai ngierei huni pri y kun ai nai ngo y ai.

²⁴Na i py kai i miseaung Kaleb ly takhra khumichi hawi atawm y i, kai i leu ai takhawi y naimy tangai nai khumi ne nai deaungkho y, ni i khen paviu nai pri y ni ai kaimy pahawi ai.

²⁵Ni i kangpreangchi ly Amalek khumichi hawi Kanan khumichi i, vai khuteng sa u nai leaunghawi khu ka-peang amtym u ai. Khawndam nang ly ali teang iy Akaba pangli katheaung i daichi ka-vym mang y chei,” nanai Mosi teng y leu pei bo.

²⁶ARENG my Mosi hawi Aron nini teng y,

²⁷“Hini khumi aso y naichi ly mana tanrei kai i tlang tleaung y josei u ai mo? Israela chengchi i josei nai katyn ly ka thai amawndui na bo!

²⁸Vai, nichi teng y hina nai kamta amti pi: ‘Kai ARENG ly nangni i hnei nai kamta sa pi ai.

²⁹Nangchi ly daichi ka-vym y my dei u ai, hini daichi ly nangchi i tapreaung lawm ai. Nangchi ly kai ai josei u nai deaungkho y, saneng apomrei bo i naichi ly ami py huni pri y kun ai ny y.

³⁰Nangchi ai kang awm hai ai nai adeu nai pri y Kaleb hawi Josua nini ny y baly ami py kun ai nai ngo y ai.

³¹Nangchi i cho chanauchi ai paleung ka-echi my patiu ai, nanai nangchi thui u bo; na i py kai ly nangchi chei ai ngai y nai pri y nangchi i cho chanauchi ai kapahawi ai i, nichi ly huni pri y awm u ai.

³²Nangchi ly hini daichi ka-vym y dei u be ai.

³³Nangchi ly ym naira by y nai deaungkho y hini daichi ka-vym y, nangchi theung i kangkhym dei nai khumi ryrei, nangchi i cho chanauchi ly saneng vui palyh khrairei daichi ka-vym theung y amki u ai.

³⁴Nangchi Kanan pri khen paviu nai kani vui palyhrei i vui, kanirei y saneng sanengrei, nangchi ai pajeng nai ly saneng vui palyhrei avum u ai. Nangchi ly kaimy nawi su nai avum u ai!

³⁵Kai ai ka-awi sa nai nangchi khumi aso y naichi ai kaimy pajeng takengkei ai. Nangchi bawibawi ly hini daichi ka-vym y dei u bebe ai, nanai kai ARENG my leu pei bo,” napi.

³⁶Kanan pri khen pavui ai nai Mosi my pato nai khumichi ly teng y nai satang thui u nai deaungkho y thai nai khumichi ly ARENG i tlang tleaung y josei u nai ne. Hunai deaungkho y ARENG ly satang teng y nai thui nai khumichi ai no kanghawi y dei hai bo.

³⁸Khen paviu nai keung leaung holai nyhrei theung i Josua hawi Kaleb nini ly dei y naimy tleaung hawi nai ne.

³⁹Mosi ly ARENG my leu pei nai ngierei Israela chengchi teng y amti pi nai khala, nichi ly khri pa-rei paleung mawn u bo.

⁴⁰Kani pa-nyh khawn angthodyh khala nichi ly mawitleaung prichi ai tiu ai nai amsa u nai ne. Nichi my, “Vai kaichi ly ARENG my adeu nai pri y chei ai nai angveirym bo. Kaichi ly kamngo awm, nanai apany bo mang,” napi.

⁴¹Na i py Mosi my, “Nangchi ly ati mana nai y ARENG i leu pei nai, vai khrairei tangai u y lawh mo? Nangchi i katau eaung lawh y leang!

⁴²Chei u moh, ARENG ly nangchi hawi vanrei awm hai y nai deaungkho y, paleung ka-echi ly nangchi ai ang pajau vui ai.

⁴³Nangchi ly Amalek chengchi, Kanan chengchi hawi atiu nai khala tavai keung y dei u ai. Nangchi ly ARENG ai khai su nai molam y, mymy ly nangchi hawi vanrei awm ai ny y,” napi.

⁴⁴ARENG i Leu Maikawm Pawm py, Mosi py, tai naira i dengdairei theu u y i py, nichi ly mawitleaung pri mang y vam parai naimy tavai thau u bo.

⁴⁵Naibaly huni meingtym y awm u nai Amalek chengchi hawi Kanan chengchi ly nichi ai tiu nai pajau i, nichi ai Hormah mary y khrairei preang u nai ne.