Read Khumi Chin Kati Nai 15 Bible Online

Kati Nai 15 - Khumi Chin bible

Kati Nai 15

¹ARENG my Mosi teng y,

²Israela chengchi i vui pei nai pri y tym nai khala, nichi teaung ai nai reitachi ly hina nai kamta ne.

³“Nangchi ly ARENG teng y leng patlum nai kapathypra mo, vaineng lawi y ai nai kapathypra mo, paleung kangai kapathypra mo, sa reng nai reita pawichira y apathyp nai katalamra mo, talam nai khala y, si katai, beram katai, mi-ichi talam pajau. Hini katalamrachi i mui katui ai ly ARENG my kawn nai ne.

⁴ARENG teng y beram, ti y baly mi-i hawi leng patlum nai kapathypra talam nai khumi ly tawnbawi hawi vanrei, teicha teinei katalamra y olive asitui palang nyhrei hawi katlen nai tako dei sie thomrei bo y, kreip hang palang nyhrei py syn ai nai tla.

⁶Beram katai hawi apathyp nai khala, teicha teinei katalamra y olive asitui palang thomrei hawi katlen nai tako dei sie pangrei bo y,

⁷kreip hang palang thomrei py talam ai nai tla. Hini katalamrachi i mui katui ai ly ARENG my kawn nai ne.

⁸ARENG teng y si katai hawi leng patlum nai kapathypra, ti y baly vaineng lawi y ai nai kapathypra, ti y baly leunghawi kapathypra y talam nai khala,

⁹olive asitui palang palyhrei hawi katlen nai tako dei sie saryhrei bo y,

¹⁰kreip hang palang palyhrei talam ai nai tla. Hini katalamra i mui kahawi ai ly ARENG my kawn nai ne.

¹¹Hini talam nairachi ly si, beram, mi-ichi hawi apathyp nai katalamrachi ne.

¹²Tawnbawi harei tleaung y kanawi talam nai khala, tarawi ai nai katalamrachi py, nawi di ka-lyp talam ai nai tla.

¹³Amy pri y tapen nai Israela cheng bawibawichi ly ARENG my kawn pi nai mui katui kapathypra talam nai khala, huna nai kamta sa patawm u ai nai tla.

¹⁴Deungrei khuteng sa nai mo, sa daw nai mo, nangchi hawi vanrei awm nai cheng takhra leaungrei ly ARENG my kawn nai mui katui talam nai khala y, pany hai yb nai kamta talam ai nai tla.

¹⁵Nangchi theung y awm daw nai cheng takhrachi ly hini leu pei naichi ai mo mang i deung kangthau khrairei patawm jojo ai nai tla. Nangchi hawi cheng takhrachi ly ARENG i mo y vanrei atawm bawi nai deaungkho y,

¹⁶nangchi hawi nichi i vui reitachi ly vanrei lawm ai nai tla.

¹⁷ARENG my Mosi teng y,

¹⁸Israela chengchi i vui pei nai pri y tym nai khala, nichi teaung ai nai reitachi ly hina nai kamta ne.

¹⁹Huni pri i theu nai amti amjangchi cha u nai khala, huni theung i phyrei ly ARENG i vui talam patyp ai nai khai takhra ai nai tla.

²⁰Changthara i tako dei hawi sa angchei nai tako ly ARENG i vui talam patyp ai nai tla. Choh ati naira i choh ly talam nai kamta, hini tako py talam ai nai tla.

²¹Nangchi i paawp nai takora i hini talam patyp nai ly ARENG teng y mo mang deung kangthauchi khrairei talam jojo ai nai tla.

²²Na i py khumi ami mo leaungrei ly ARENG my Mosi teng y pei nai reitachi theung i phyrei ai athang khai y naimy taphra lawh baly,

²³vai mo mang y cheng vereichi ly ARENG my Mosi teng y leu pei nai ngiereichi so y vui lawh na baly,

²⁴pany pacha y naimy sa tamang lawh i py, nichi ly si katai harei leng patlum nai kapathypra talam ai nai tla. Hini katalamra i mui katui ai ly ARENG my kawn nai ne. Huni tawnbawi hawi vanrei teicha teinei talam nai hawi kreip hangchi py talam rau ai nai tla. Huni bo y kamngo pahen nai katalamra i vui y mi-i katai harei py talam ai nai tla.

²⁵Pathyp pi nai keung ly Israela cheng bawibawichi i vui reita leaungsai y kachai sa pi ai nai tla. Naibaly nichi ai kamngo pahen pi ai. Ati mana nai mo na baly nichi ly athang khai y naimy tamang lawh i, kamngo pahen nai katalamra ARENG teng y syn pi nai deaungkho y ne.

²⁶Khumi mipuichi theung i khumi luteng ly athang khai y naimy sa tamang lawh nai y, Israela chengchi hawi nichi hawi vanrei awm nai cheng takhrachi i kamngo raurei pahen pi ai.

²⁷Amimi py athang khai y naimy sa tamang lawh baly, huni khumi ly sanengrei awm khyh nai mi-i nu harei hawi kamngo pahen nai kapathypra talam ai nai tla.

²⁸Nangmy i kamngo chai naira nga ai nai maicham tleaung y pathyp pi nai keung my kamngo vang pathyp pi nai dengdairei, nang ly kamngo lawira nga ai.

²⁹Hini reitachi ly athang khai y naimy sa tamang iy, amy i pri y tapen nai Israela chengchi i vui py ne sy, vanrei awm ahawi nai cheng takhrachi i vui py ne sy, kamngo lawira nga ai nai reitachi ne.

³⁰Na i py amy i pri y tapen nai Israela cheng py ne sy, cheng takhra py ne sy, kamngo sa ta-li lawh baly, huni khumi ly ARENG ai tahm khai y nai deaungkho y ni ai ly padei ai nai tla.

³¹Ati mana nai mo na baly ni ly ARENG i leu pei nai khai su iy, reita taphra ta-li nai deaungkho y ne. Ni ly my i kamngolai dei ai nai tla.

³²Israela chengchi ly daichi ka-vym y awm nai thym khala, kanirei ly Anawn kani y khumi leaungrei ai theng ei nai niu u bo.

³³Huni khumi ai Mosi, Aron hawi khumi mipuichi teng y hawi u.

³⁴Ni ai mana chih ai mo, nanai pany y i paeung vui nai ne.

³⁵Naibaly ARENG my Mosi teng y, “Huni khumi ai ly padei ai nai tla; khumi mipuichi ly tai naira angam mang y, ni ai lengseaung hawi aphi ka ai nai tla,” napi.

³⁶Hunaibaly Israela cheng bawibawichi ly ARENG i leu pei nai kamta, huni khumi ai tai naira angam mang y patheu iy, lengseaung hawi aphi u ka bo.

³⁷ARENG my Mosi dengdairei,

³⁸Israela chengchi teng y leu pei nai ly: “Nangchi i baichu ateaung tawmchira y thaiphelawmchi tai iy, thaiphelawm tleirei y kalang an kamngau tai ai nai tla. Nangchi deung kangthau khrairei hini reita teaung patawm jojo ai nai tla.

³⁹Nangchi ly huni thaiphelawmchi niu nai tleirei, kai i leu pei nai ngierei tangai iy teaung patawm jojo ai. Huna nai khala nangchi ly kai ai khai su iy, nangmychi ngaingai sa u ai ny y.

⁴⁰Kai i leu pei nai ngiereichi teaung patawm ai nai hini thaiphelawmchi my nangchi ai pany hai nai deaungkho y, nangchi ly kai i khumichi lawm u ai.

⁴¹Kai ly nangchi i ARENG Tameuh ne; kai ly nangchi i Tameuh lawm ai nai nangchi ai Aikupta pri i dengdairei kang pahawi bo. Kai ly ARENG ne,” napi.