Read Khumi Chin Kati Nai 18 Bible Online

Kati Nai 18 - Khumi Chin bible

Kati Nai 18

¹ARENG my Aron teng y, “Nang hawi nang i chapochi py, Levi theaungchi py, kai i awmra Tabynako i vui reita sa naira y tamang lawh baly, nangchi ly pajeng naira avum u ai; na i py pathyp pi nai keung kalop sa naira y tamang lawh baly, nang hawi nang i chapochi naini pajeng naira avum u ai.

²Nang hawi nang i chapochi ly Tabynako i vui reitachi sa naira y, nang i amjo amnau Levi theaungchi my nangchi ai sabawm u na sy.

³Nichi ly nang i atiti kalopchi hawi Tabynako i vui atiti kalopchi sa u ai nai tla. Na i py nichi ly meingtym kachai i ateaungchi ai py, maicham ai py abi u moh sy; abi u lawh baly nang hawi vanrei nichi ly dei ai.

⁴Nichi ly nang hawi vanrei Tabynako i vui kalop sa ai nai tla. Levi theaung ny y baly takhra amimi py, nang hawi vanrei, Tabynakora i kalopchi so ngau y.

⁵Nang hawi nang i chapochi naini meingtym kachai hawi maichamra i kalopchi sa ai nai tla. Huna i naini kai ly Israela chengchi ai kado theu hai bi y ai.

⁶Kai ly Israela chengchi theung i nang i amjo amnau Levi theaungchi ai, nangchi i vui katalamra y kaimy vawi takhra bo. Nichi ly Tabynako i vui atitichi sa ai nai kai i vui aau patyp naichi ne.

⁷Na i py nang hawi nang i chapochi naini maicham hawi chai keh nai meingtym i vui, pathyp pi nai keung i sa ai tla nai kalopchi sa ai nai ne. Khumi takhra nai ahai lawh baly, huni khumi ai ly padei ai nai tla. Kai ly nangchi ai pathyp pi nai keung y tahm kang pasang nai ne i, nangchi ly hini kalopchi sa u ai nai tla,” napi.

⁸ARENG my Aron teng y, “Leng patlum nai kapathypra ny y nai kai teng y talam patyp nai ngiereichi ai, nang hawi nang i chapochi teng y kaimy kang pei mang. Hini phy ly nang hawi nang i kangpreangchi i vui ne.

⁹Maicham tleaung y leng patlum nai katalamra ny y nai talam patyp naichi theung i, nang i vui talam naichi ly teicha teinei katalamra, kamngo pahen nai katalamra hawi kamngo pajengra i lawi nai katalamrachi ne. Kai teng y talam nai katalamra bawibawichi ly nang hawi nang i chapochi i vui ne.

¹⁰Nang ly huni katalamrachi ai meingtym kachaira y cha ai nai tla; neampachochi naini cha ngau khyh. Huni ly chai nai teicha teinei ne.

¹¹“Huni bo y Israela chengchi my kai teng y talam nai takhra talam patyp nairachi py, nangchi i vui ne. Huni katalamrachi ly nang hawi nang i kangpreangchi amtym jojo ai nai phy ne. Nang i yhm dengtheungra y reita leaungsai y chai nai ngiereichi ly huni teichachi cha pajau.

¹²“Israela chengchi my kai teng y saneng tleirei talam nai athai chalu theung i hawi keh nai olive asitui, hawi keh nai kreip hang hawi, hawi keh nai chohchi py, nang ai kang pei nai ne.

¹³Huni teicha teineichi ly nang i vui ne. Nang i yhm dengtheungra y reita leaungsai y chai nai ngiereichi ly huni teicha teineichi cha pajau.

¹⁴“Israela pri theung i kai teng y talam patyp nai ngiereichi ly nangchi i vui ne.

¹⁵“Israela chengchi my kai teng y talam nai chapo chalu hawi, tawnbawi cho chaluchi ly nangchi i vui ne. Na i py chapo chalu py ne sy, reita y chai y nai tawnbawi cho chalu py ne sy, tangka hawi atleu teang ai nai tla.

¹⁶Lorei awm khyh nai deaungdi ai ly prichi pri teaung vang pani nai tangka chang tlau pangrei hawi atleu ai tla.

¹⁷Na i py si, beram hawi mi-ichi i cho chaluchi ai ly kai teng y talam chum veng nai deaungkho y atleu ngau y, apathyp ai nai tla. Huni tawnbawichi i thi ly maicham salo y katheng iy, thau ai ly katalamra y leng patlum ai nai tla. Huni mui katui ai ly kai ARENG my kawn nai ne.

¹⁸Talam patyp naira i amsei hawi lamtang phai ly nangchi i vui phy lawn nai kamta, hunichi i nganbawichi py nangchi i vui ne.

¹⁹“Israela chengchi my kai teng y talam patyp nai ngiereichi ly, nang hawi nang i katu chanauchi ai kaimy pei nai ne. Hini Leu Maikawm ly kai hawi nang i kangpreangchi hawi asa nai, deungtasarei khaw jojo nai Leu Maikawm ne,” napi.

²⁰ARENG my Aron teng y, “Israela pri theung y nang amtym ai nai yhmtheaung hawi nang i vui khaileaung py nga ai ny y. Kai ARENG ly nang i amtym ai nai ne ryp veng bo,” napi.

²¹ARENG my, “Israela chengchi my kai teng y talam nai horei y harei katalamra bawibawichi ly Levi theaungchi teng y kai i awmra Tabynako kry pi nai vang ne.

²²Takhra Israela chengchi ly Tabynako sahawi y tapai ngau y, tapai nai khumi ly dei ai.

²³Vai i dengdairei Levi theaungchi naini Tabynako ai kry iy, Tabynako i vui atiti kalop angym pa-rei sa ai nai tla. Hini reita ly nang i kangpreangchi my teaung patawm jojo ai nai tla.

²⁴Kai teng y Israela chengchi my talam pathyp nai horei y harei ly Levi theaungchi teng y kaimy pei yb nai deaungkho y, Israela pri y yhmtheaung katui amtym ai nai ngo y bo. Huna nai y nichi ly Israela pri y yhmtheaung katui amtym ngau y, nanai kaimy leu pei yb nai ne,” napi.

²⁵ARENG my Mosi dengdairei

²⁶Levi theaungchi teng y leu pei nai ly “ARENG ly Israela chengchi i talam nai horei y harei ai nangchi teng y pei nai khala y nangchi ly huni katalamra theung i horei y harei ly ARENG teng y talam patyp ai nai tla.

²⁷Huni talam patyp naira ly li hlau sa nai keungchi, akho sa nai keungchi my talam nai changtha, kreip hang kangtha talam kamta kaimy palawn pi ai.

²⁸Hina nai kamta nangchi ly Israela chengchi teng i nga nai theung i horei y harei ly ARENG teng y talam patyp ai nai tla; nangchi ly ARENG teng y talam patyp nai katalamrachi ai pathyp pi nai keung Aron teng y au pi ai nai tla.

²⁹Nangchi nga nai katalamrachi theung i, hawi keh nai ly ARENG teng y talam ai nai tla.

³⁰Li, hlau sa nai keungchi hawi, akho sa nai keungchi ly ARENG i vui talam ai nai amti amjangchi ai talam chum baly, kamlai ngiereichi amy cha ai nai nga nai kamta, nangchi i hawi keh nai talam chum baly, kamlai ngiereichi cha ai nai nga u ai.

³¹Talam nai bo i kamlaichi ly nangchi Tabynakora y kalop sa naichi i vui nga ai avo nai vang ne nai deaungkho y, huni talam nai ai nang hawi nang i yhm dengtheungchi ly mani meingtymra y py ne sy cha pajau nai ne.

³²Talam naichi theung i hawi keh nai ai ARENG teng y talam nai bo y cha baly, nangchi ly kamngo tlo y. Na i py nangchi ly Israela khumichi my pei nai katalamra theung i hawi keh nai ai, ARENG teng y talam y rai khala, cha nai molam y, huni katalamra ai chai y naira lawm vui y ai nai pany ai nai tla. Nangchi chai hai y nai sa lawh baly, nangchi ly dei u ai,” napi.