Read Khumi Chin Kati Nai 19 Bible Online

Kati Nai 19 - Khumi Chin bible

Kati Nai 19

¹ARENG my Mosi hawi Aron nini teng y,

²Israela chengchi i vui hina nai reita leuchi pei pi bo. Nichi ly no-na by y iy kalop so hai vai y nai si nu kamleng harei, Mosi nini Aron teng y jeu hai iy,

³nini ly pathyp pi nai keung Eleaza teng y pei pi ai nai tla. Huni si nu ai tai angam mang y pahawi iy, pathyp pi nai keung i mo y tleh ai nai tla.

⁴Naibaly Eleaza ly kiu pajeung thi y tapo iy Tabynako mang y tlen saryhrei katheng ai nai tla.

⁵Huni si i peih, nganbawi, thi, tivichi hawi ngan bom verei, pathyp pi nai keung i mo y leng patlum ai nai tla.

⁶Naibaly ni ly saitleang ngam, hussop kateang hawi kalang kamlengchi la iy, mai theung y thun ai nai tla.

⁷Huni bo y ni ly my i ateaungchi pasiu iy tui ahiu pan chum baly, tai naira theung y kun pajau bo; na i py ni ly reita leaungsai y dym mang khrairei chai y ai.

⁸Si nu ai bomverei leng patlum nai keung py my i ateaungchi pasiu iy, tui ahiu pan ai nai tla; na i py ni ly dym mang khrairei chai y ai.

⁹Naibaly reita y chai nai khumi leaungrei my si nu i maidym la iy, tai naira angam mang i reita leaungsai y chai nai meingtym y khai ai nai tla. Israela chengchi ly reita y chai y nai i vui chai ai nai tui hawi kachai sa naira y huni maidym teaung ai nai tla. Hini reita ly kamngo chai hai ai nai sa nai reita ne.

¹⁰Si nu i maidym leu nai khumi ly my i ateaungchi pasiu pan vui ai nai tla; na i py ni ly dym mang khrairei chai y ai. Israela chengchi hawi vanrei awm nai cheng takhrachi ly hini reita teaung patawm jojo ai nai tla.

¹¹Khumi tlaiveu ai nam nai khumi ly reita leaungsai y kani saryhrei chai y ai.

¹²Nichi ly pa-thom kani hawi saryh kani khala, tui hawi kachai sa ai nai amymy ai apachai ai nai tla. Naibaly ni ly chai ai mang. Na i py ni ly pa-thom kani hawi saryh kani y apachai y baly, ni ly chai ai ny y.

¹³Tlaiveu ai nam nai khumi ly reita y kachai sa nai tui amymy ai katheng iy, apachai y baly chai y nai awm jo ai. Huni khumi ly ARENG i Tabynako ai chai hai y nai deaungkho y, ni ai ly Tameuh i khumichi theung i nai nyn va vui ai.

¹⁴Tai theung y khumi leaungrei dei su lawh baly, huni thym khala tai theung y awm nai khumi hawi, tai theung y kun nai khumi ly reita leaungsai y kani saryhrei chai y ai.

¹⁵Tai theung i khym by y nai laawm sorachi py chai y ai.

¹⁶Mary angam mang y pakhau ka iy dei nai, ti y baly dei kari y dei nai khumi i tlaiveu, hiu, tapreaung ai nam nai khumi ly kani saryhrei chai y ai.

¹⁷Huna nai kamta chai y nai khumichi ai kachai sa ai na baly kamngo pahen nai leng patlum nai si nu kamleng i maidym laawmra tui kachai kanuh iy khai ai nai tla.

¹⁸Yhm y khumi dei nai deaungkho y chai y naira tym lawh baly, reita leaungsai y chai nai khumi my, hussop kateang tui theung y panih iy, tai ai py, huni theung y awm nai ateaung ngiereichi hawi khumichi ai py katheng ai nai tla. Khumi kadei hiu, tlaiveu, ti y baly tapreaung ai nam iy chai y nai khumi ai, chai nai khumi my huni tui hawi katheng ai nai tla.

¹⁹Pa-thom kani hawi saryh kani y ly reita y chai nai khumi my chai y nai khumichi i tlang tleaung y, huni tui hawi katheng pi ai nai tla. Chai y nai khumi ai chai nai khumi my, huna nai kamta kachai sa pi ai nai tla. Saryh kani y chai nai khumi ly mymy i ateaungchi pasiu iy tui ahiu pan chum baly, kani avah nai khala reita y chai ai.

²⁰Reita leaungsai y chai y nai khumi ly kachai sa nai tui hawi amymy ai katheng iy, kachai so y baly, chai y jojo ai. Huni khumi ly ARENG i Tabynako ai chai hai y nai ne i, Tameuh i khumichi theung i nai nyn va vui ai.

²¹Nangchi ly hini reita ai vai mo mang py teaung patawm jo ai nai tla. Kachai sa nai tui katheng nai khumi py, mymy i ateaungchi pasiu ai nai tla; huni tui ai nam nai khumi ly dym mang y khrairei chai y ai.

²²Chai y nai khumi i nam nai ngierei ly chai y nai ne i, huni atitichi ai nam nai khumi ly dym mang y khrairei chai y ai.