Read Khumi Chin Kati Nai 21 Bible Online

Kati Nai 21 - Khumi Chin bible

Kati Nai 21

¹ Kanan pri tokalawi mang i, Arad mary y peang nai samrang ly Atharim lam mang Israela chengchi tako u dudu nai pany baly, nichi ai tavai tiu i phyrei ai patiu iy langheng y hawi vui bo.

²Naibaly Israela chengchi my ARENG teng y, “Nang ly kaichi ai hini khumichi ai tiu nai pajau hai baly, nichi hawi nichi i marychi ai nang teng y au be nai katalamra palawn iy, taphra chauchau ai mang,” nanai vaineng abeu u nai ne.

³ARENG ly nichi i hnei nai kamta Kanan chengchi ai tiu nai pajau hai. Hunai deaungkho y Israela chengchi ly huni khumichi i marychi taphra pi pawn iy, huni meingtym ai Hormah nanai amyn pathi bo. [4]

⁴Naibaly Israela chengchi ly Hora mawi i nai theu u iy Edom pri en vui ai nai pangli kamsen katheaung lam mang tako u bo. Na i py nichi ly lam sala y paleung phra atho di u i,

⁵Tameuh hawi Mosi nini ai josei u; nichi my, “Teicha teinei by y nai hini daichi ka-vym theung y dei hai ai nai, ati mana nai y kaichi ai Aikupta pri i dengdairei pahawi nai mo? Hini meingtym y teicha teinei py tui py by y pui be? Kalum kathau by y nai hini teicha teineichi py kaichi paleih na bo” nanai josei u.

⁶Naibaly ARENG my Israela chengchi awm naira y pavui kangsochi pato i, khumi mipuichi ly pavui my patiu nai y dei u bo.

⁷Hunaibaly khumi mipuichi ly Mosi teng y chei u i, “Kaichi ly ARENG hawi nang ai py ka-awi sa iy katamang u bo. Hini pavuichi la pi pawn ai nai ARENG teng y chiu so pi kyh,” nanai takeng u. Naibaly Mosi my nichi i vui ARENG teng y chiu sa pi.

⁸Naibaly ARENG my Mosi teng y, tamo ngan hawi pavui myn sa iy teang tleaung y dang ai nai leu pei. Pavui my patiu nai khumichi ly huni pavui myn ai khen baly dei y naimy tleaung u ai, nanai thui hai bo.

⁹Naibaly Mosi ly kheupaja pavui myn sa iy teang tleaung y dang i, pavui my patiu nai ngierei ly kheupaja pavui myn ai khen baly dei y nai ne.

¹⁰Israela chengchi ly khuleaung amsa u bi i, Oboth meingtym y tai u.

¹¹Nichi ly hu i dengdairei khuleaung amsa u bi i, Moba pri nisi mang y awm nai daichi ka-vym theung i Abarim mary kaphrara y tai u bo.

¹²Huni bo y nichi ly Zered tavo jawn y tai u bi nai ne.

¹³Nichi ly hu i nai khuleaung amsa u taleang bi i, Arnon tavo tosyh mang i Amori pri daichi ka-vym hawi amtawn prei nai daichi ka-vym theung y tai u. (Arnon tavo ly Moba pri hawi Amori prichi i khujyh ne.)

¹⁴Naibaly ARENG i tavai tiu nai cha-iu theung y tajiu nai ly “Supha khu theung y sa nai Vaheb mary hawi leaunghawichi, Arnon tavo hawi,

¹⁵Moba pri khujyh Ara mary khrairei leaunghawi kamthauchi,” nanai abawi nai ne.

¹⁶Israela chengchi ly hu i dengdairei tuikan, napi nai Bera tai naira y tym u. Huni meingtym y ARENG my Mosi teng y, “Khumi mipuichi ai kachu iy jeu hai ly kaimy nichi ai tui kapei ai,” napi.

¹⁷Naibaly Israela chengchi i phawi nai khulym ly: “Tuikanchi awi, tui theu hai; kaichi ly khulym thui naimy lamchung ai.

¹⁸Samrang i chapochi hawi, mipuichi ai lu sa naichi my tai nai tuikan, samrangchi i jahaw tivi, cheaungvawi hawi tai nai tuikan teu,” nanai ne. Nichi ly huni daichi ka-vym theung i dengdairei Mattana tai naira mang py,

¹⁹hu i bi baly Nahaliela tai naira dengdairei Bamoth tai naira mang py,

²⁰Bamoth tai naira dengdairei daichi ka-vym mang amtawi nai Piska mawi kheutangra i Moba leaunghawi mang py khuleaung amsa u nai ne.

²¹Israela chengchi ly Amori samrang Sihon teng savaichi pato iy,

²²“Kaichi ly samrang nang i pri mang tako prei ai nai pei kyh. Kaichi hawi kaichi i tawnbawichi ly lam manglai kataw tako ai nai teu. Samrang nang i li hlauchi hawi kreip akhochi mang tako hai y leang. Nang i tuikanchira i tui py nei pi y leang. Kaichi ly nang i khu ka-peang kan nai ryrei lam manglai kataw naini katako u ai,” nanai takeng u nai ne.

²³Na i py samrang Sihon ly Israela chengchi ai mymy i pri theung mang tako prei ai nai pei pi y. Ni ly daichi ka-vymra i Jahaz mary mang y tavai amsa iy Israela chengchi ai tavai tiu bo.

²⁴Na i py Israela chengchi ly paleung ka-e neangneangchi ai tavai keung y padei iy, Arnon tavo tosyh mang Ammon pri khujyh Jabbok mary y khrairei, samrang Sihon i khu ka-peangchi pajau vui bo. Ammon pri khujyh ryrei naini tiu pajau khyh nai ly huni khujyh ai khaw pa-rei amtang pajau nai deaungkho y ne.

²⁵Huna nai kamta Israela chengchi ly Hesabon mary hawi tengpang i marychi raurei, Amori chengchi i mary bawibawichi ai pajau vui iy, huni marychira y awm u bo.

²⁶Hesabon mary ly samrang Sihon i mary pui ne. Samrang Sihon i khu ka-peang ly Arnon tavo khrairei kau nai, vaichi khala Moba pri samrang i khu ka-peang ne. Huni khu ka-peang ai tiu i, pajau vui bo.

²⁷Hunai deaungkho y khulym phawi kawp naichi my, “Samrang Sihon i Hesabon mary pui y jeu u! Achi ly huni mary pui ai kangtha palum teang sina.

²⁸Vaichi khala samrang Sihon i tavai kamkawm ly Hesabon mary i dengdairei theu nai mai kadeu kamta tavai thau nai, Moba pri Ara mary ai taphra vui iy, Arnon Tavo leng mang i mawichi kang hai bo.

²⁹Moba pri i khumichi awi, nangchi ly khri pa-rei ngari kamtang avum u na bo ly! Khemosa tameuh ai chiu nai khumichi py phra u be bo! Nangchi i tameuhchi ly nangmychi i chengchi ai tavai kapreangchi lawm hai iy, neampachychi ai Amori samrang i langhengchi lawm hai bo.

³⁰Hunai deaungkho y nichi i kangpreangchi ly Hesabon mary i dengdairei Dibon mary tym pa-rei py, Nashim mary i dengdairei Medeba mary sahawi i Nopha mary tym pa-rei py taphra chauchau bo,” nanai khulym thui u.

³¹Hunai deaungkho y Israela chengchi ly Amori pri y khuteng sa u nai ne.

³²Mosi ly Jaze mary ai tiu y rai khala khumi pato iy, tiu ai nai sai khen paviu hai bo; Israela chengchi ly huni mary hawi vanrei tengpang sahawi i marychi ai tiu pajau nai deaungkho y, Amori chengchi ly huni mary i dengdairei preang u pawn bo.

³³Naibaly Israela chengchi ly Basan pri mang y amsa u; huna nai khala Basan samrang Oka ly tavai amsa iy Israela chengchi ai Edrei meingtym y tavai tiu u bo.

³⁴ARENG my Mosi teng y, “Ni ai jei u moh; ni hawi ni i khumi bawibawichi ai py, ni i pri ai py nang i kiu y kang au ai; nang ly Hesabon mary y peang nai Amori samrang Sihon ai sa nai kamta, ni ai py so teang,” napi.

³⁵Huna nai deaungkho y Israela chengchi my samrang Oka hawi ni i chapochi raurei mipuichi ai py, leaungrei py tleaung y pa-rei tleh chum baly, pri py peang vui nai ne.