Read Khumi Chin Kati Nai 22 Bible Online

Kati Nai 22 - Khumi Chin bible

Kati Nai 22

¹Israela chengchi ly tako u veangveang i, Jeriko mary kangka Jordan tavo nisi mang i Moba adym y tai u bo.

²Moba samrang Zipor i chapo Balek ly Israela chengchi i khumi nawi nai sai py, huni Israela chengchi ly Amori khumichi ai ati mana sa u mo, nanai py, thai nai khala,

³ni hawi ni i khumi bawibawichi ly khri pa-rei jei hyn u bo.

⁴Naibaly Moba khumichi ly Midian khumichi ai lu sa naichi teng y, “Si katai ly sui tlaira i achachi kheih be pa-rei cha nai kamta, hini khumi hum pui ly achi tengpang sahawi i awm nai ngiereichi ai taphra ai,” nanai thui u bo. Hunai deaungkho y samrang Balek ly

⁵Amaw pri theung i Euphrat tavo sahawi i Pethor mary y awm nai, Beora i chapo Balam ai palau ai nai savaichi pato nai ne. Balek i palau nai leaungsai ly “Aikupta pri i dengdairei khumi cheng harei ang jeu; huni khumichi ly meingtym tleirei y tym iy, vai kaichi i pri y peang vui ai nai pajei pahyn dudu bo.

⁶Nichi ly kaichi tleaung y khumi nawi nai deaungkho y jei i, nichi ai pasawi kyh. Hunaibaly kaimy nichi ai tiu iy paryh nai pajau lym ai. Nangmy amtheaungra pei nai khumichi ly amtheaungra nga iy nangmy pasawi nai khumichi ly amsawi lawi u ai,” nanai abawi nai ne.

⁷Naibaly Moba cheng hawi Midian chengchi ai lu sa nai keungchi ly amsawi vang tangka syn iy Balam teng y chei u. Naibaly Balek i leu saichi ni teng y amti pi bo.

⁸Balam my nichi teng y, “Vaidym ly hi y jei u rai, ARENG my kai teng y ati leu thui pi na mo, khawn mang y kang thui pi ai,” napi. Naibaly Moba chengchi i lu sa nai keungchi ly Balam teng y vum jei u.

⁹Tameuh ly Balam teng y jeu kathiu i, “Nang teng y anga nai khumichi ly amichi mo?” nanai deng.

¹⁰Balam my, “Moba samrang Balek my pato nai khumichi ne.

¹¹Balek my Aikupta pri i dengdairei jeu nai khumi cheng harei ly hini pri y kawi na nai py, huni khumichi ai tiu iy patheu pawn pajau ai nai, kai ai nichi teng y chei iy huni khumichi ai pasawi pi ai nai py thui nai ne, nanai pathang.

¹²Tameuh my Balam teng y, “Nang ly hini khumichi nithun abang moh; Israela chengchi ly kaimy amtheaung hai nai khumichi ne nai deaungkho y, nichi ai pasawi moh,” napi.

¹³Kani pa-nyh Khawn mang y Balam my Balek i savaichi teng y, “Nangchi vawi u teang teu; ARENG my kai ai nangchi nithun abang ai nai pei y leang,” napi.

¹⁴Naibaly nichi ly Balek teng y vawi u ali teang i, Balam ly nichi nithun abang ai nai ngai y, nanai thui pi u.

¹⁵Naibaly Balek ly angchei i tleaung y vuikanai nawi iy, tahm asang nai savaichi ai Balam teng y pato bi.

¹⁶Nichi ly Balam teng y chei bi i, “Pahen parai naimy kai teng y jeu tanga pi kyh!

¹⁷Nang ai nangmy i paleung ka-nyp kawn vang kang pei ai. Nang i sahai nai ngierei sa pi ai mang. Jeu ly hini khumichi ai pasawi pi kyh,” nanai Balek my thui hai naichi amti pi bo.

¹⁸Na i py Balam my, “Samrang Balek ly samrang yhm i awm nai muku, tangka ngierei neh iy kai teng y pei teu i py, kai ly kaimy i ARENG Tameuh my leu pei nai akhi pajau y leang.

¹⁹Na i py ARENG ly kai ai ati mana leu pei rai na mo, nanai pany pajau ai nai nangchi ly vaidym kai teng y vum jei u rai,” napi.

²⁰Huni vum y Tameuh ly Balam teng jeu iy, “Hini khumichi ly nang ai nichi nithun abang ai nai palau baly abang; na i py nang ly kai i leu pei nai kamta naini sa ai nai tla khyh,” napi.

²¹Hunaibaly kani pa-nyh khawn Balam ly mymy i keaungngo kano kasau tleaung atang iy, Moba cheng lu sa naichi nithun abang jo bo.

²²Huna nai kamta Balam abang nai deaungkho y Tameuh ly kado theu nai ne. Balam ly miseaung leaung nyhrei hawi i, keaungngo kano kasau tleaung y atang naimy chei nai thym khala y, ARENG i kani pri amtaw thau nai my ni i tako nai lam y angdo pi khyp nai ne.

²³Keaungngo kano kasau ly lamra y haisau syn naimy angdo khyp nai kani pri amtaw thau nai ai niu baly, lam amphri vui iy adym mang y satla vui bo. Naibaly Balam ly keaungngo kano kasau ai pakhau iy lam mang y tako hai teang.

²⁴Naibaly kani pri amtaw thau nai ly kreip akho nyhrei i lengseaung para lam kamcheira y angdo khyp bi nai ne.

²⁵Keaungngo kano kasau ly kani pri amtaw thau nai ai niu baly, para makeng mang y abi vui nai deaungkho y Balam i kheu awikraw bo. Naibaly Balam ly keaungngo kano kasau ai pakhau taleang bi.

²⁶Naibaly kani pri amtaw thau nai ly mo mang paka khyp iy keaungngo kano kasau ami thai y naira y angdo pi khyp nai ne.

²⁷Keaungngo kano kasau ly kani pri amtaw thau nai ai niu bi nai khala, khaileaung y ambeu vui bo. Balam ly kado theu i keaungngo kano kasau ai cheaungvawi hawi pakhau taleang bo.

²⁸Naibaly ARENG my keaungngo kano kasau ai khumi kamta leu katheu hai nai deaungkho y, keaungngo kano kasau my Balam teng y, “Nang i tlang tleaung y kai ati sa tamang mo? Ati mana nai y nang ly kai ai tlen thomrei pakhau na lawh mo?” nanai deng.

²⁹Balam my, “Nang ly kai ai kamthu palawn lawh ly! Kai i kiu y haisau awm lawh i khyly, nang ai kang tleh vui ai,” napi.

³⁰Naibaly Keaungngo kano kasau my, “Kai ly nangmy deungrei atang reng nai keaungngo kano kasau ny y a? Kai ly vaichi khala hina nai kamta sa vai lawh sai a?” nanai deng. Balam my, “So vai y leang,” napi.

³¹Naibaly ARENG ly Balam ai haisau syn naimy angdo nai kani pri amtaw thau nai ai niu hai nai deaungkho y Balam ly khaileaung y ambeu na bo.

³²Kani pri amtaw thau nai my Balam teng y, “Nang ly keaungngo kano kasau ai hina nai kamta ati mana nai y tlen thomrei pakhau na lawh mo? Nang ly hini khuleaung lam chei thai y ai nai, kai ly nang i tako nai lam y paka khyp nai ne.

³³Na i py nang i keaungngo kano kasau ly kai ai niu nai deaungkho y, tlen thomrei lam amphri vui bo. Keaungngo kano kasau phai lam amphri vui y i khyly, kai ly nang ai kang tleh vui iy keaungngo kano kasau ai ly patleaung ai,” napi.

³⁴Naibaly Balam my, “Kai ly kamngo sa lawh bo. Nang ly kai ai paka ai nai lam y angdo khyp nai kaniu y; na i py kai ai khuleaung chei ai nai ngai hai y na baly, kai ly yhm mang y vawi ali teang ai khyh bo,” napi.

³⁵Na i py kani pri amtaw thau nai my, “Hini khumichi hawi abang teu, na i py kaimy kang thui pi nai leu phai thui khyh,” napi. Naibaly Balam ly huni khumichi hawi vanrei chei bo.

³⁶Samrang Balek ly Balam ang jeu, nanai thai nai khala, ni ly Moba pri khujyh Arnon tavo peang y awm nai Ara mary mang y chei iy lamchung bo.

³⁷Balek my Balam teng y, “Kaimy angchei tlenrei nang ai palau ai nai savaichi pato nai khala, ati mana nai abang y lawh mo? Kai ly nang ai nangmy i paleung ka-nyp kawn vang kang pei pajau y, nanai athang khai nai sai a?” napi.

³⁸Balam my, “Vai ly kai kang tym bo; na i py kai ly kaimy ngaingai thui pajau y. Tameuh my kai ai thui hai nai ngierei naini kai ly thui pajau khyh,” napi.

³⁹Naibaly Balam ly samrang Balek hawi vanrei Huzoth mary y abang nai ne.

⁴⁰Huni mary y Balek ly si hawi beramchi tleh iy mawi phyrei ly Balam hawi miteaung kehchi teng y tha pi bo.

⁴¹Kani pa-nyh khawn mang y samrang Balek ly Israela cheng phyreichi my niu pajau nai Bamoth Bala mawi aheung y Balam ai hawi jo nai ne.