Read Khumi Chin Kati Nai 23 Bible Online

Kati Nai 23 - Khumi Chin bible

Kati Nai 23

¹Balam my Balek teng y, “Hini meingtym y kai i vui maicham saryhrei so pi ly si katai saryhrei hawi beram katai saryhrei py jeu hai,” napi.

²Balek ly Balam i thui pi nai kamta sa i, nini ly maicham ha harei tleaung y si katai ha harei hawi beram katai ha harei talam bo.

³Naibaly Balam my Balek teng y, “Nang ly leng patlum nai maicham sahawi y angdo; ARENG ly kai hawi ka-vum sa ai nai jeu ai mo, jeu y ai mo, nanai khen ai. ARENG my kai teng y leu pei nai ngierei, nang teng y kang thui pi ai mang,” napi. Naibaly ni ly mymy tlairei mawi saleung y lyn kalau jo bo;

⁴Naibaly Tameuh ly ni hawi ka-vum sa ai nai satla kathiu bo. Huna nai khala y Balam my ARENG teng y, “Kai ly maicham saryhrei sa iy maicham tleireira y si katai ha harei hawi beram katai ha harei py talam bo,” napi.

⁵ARENG my Balam teng y, Balek ai thui pi ai nai leu saichi thui pi iy pato ali teang bo.

⁶Hunaibaly Balam ly samrang Balek teng y ali teang nai khala, samrang ly Moba chengchi i lu sa nai keungchi hawi vanrei, maicham sahawi y angdo nai niu.

⁷Naibaly Balam ly hina nai kamta amo leu thui pi nai ne: “Moba pri samrang Balek my Suria pri nisi mang i mawi aheungchi dengdairei kai ai ang palau bo. Samrang my, ‘jeu ly Jakob i kangpreangchi ai pasawi ba,’ ‘jeu ly Israela chengchi ai thui tamawn ba,’ ang napi.

⁸Tameuh my pasawi y nai khumichi ai, kai ly mana pasawi ai mo? ARENG my Tara chih y nai khumichi ai kai ly mana Tara chih ai mo?

⁹Kai ly lengseaung puichi saleung mang nichi ai kaniu; kai ly mawi aheungchi mang nichi ai kaniu. Nichi ly mychi tlairei awm nai cheng vuijyn harei ne; Nichi ly khumi cheng bawibawichi tleaung y amtleh takhra nai khumichi ne. Takhra khumichi tleaung y malawn py amtheaungra nga keh naichi ne, nanai nichi apany u.

¹⁰Israela kangpreangchi ly nawi parai nai deaungkho y, spryh ai kati pajau y nai kamta ly nichi ai kati pajau y. Tameuh i khumi leaungrei kamta deung tlum ai nai kangai. Khumi kahawichi kamta tlamsa naimy dei ai nai kangai,” napi.

¹¹Naibaly samrang Balek my Balam teng y, “Nang ly kai ai mana sa vui lawh mo? Kai i paleung ka-echi ai pasawi ai nai kang palau nai ne i py, nang ly nichi ai amtheaung hai lawh ly” napi.

¹²Balam my, “Kai ly ARENG my thui hai ai ngai nai kamta naini thui thai khyh,” napi.

¹³Naibaly Balek my Balam teng y, “Israela cheng phyreichi ai naini niu thai nai meingtym mang y kai hawi abang hai; hu mang dengdairei nichi ai pasawi pi,” napi.

¹⁴Hunaibaly samrang Balek ly Balam ai Piska mawi salo i Zophim adym mang y chei hai bo. Huni meingtym y py ni ly maicham saryhrei sa iy maicham tleirei y si katai ha harei, beram katai ha harei talam nai ne.

¹⁵Balam my samrang Balek teng y, “Nang ly leng patlum nai kapathypra sahawi y angdo; kai ly Tameuh hawi ka-vum sa ai nai chei ai,” napi.

¹⁶ARENG my Balek teng y amti pi ai nai leu thui pi chum baly, Balam ai Balek teng y pato ali teang bo.

¹⁷Naibaly Balam ly samrang Balek teng y vawi ali teang nai khala, samrang ly Moba cheng lu sa nai keungchi hawi vanrei, leng patlum nai kapathypra sahawi y angdo jo rai nai niu. Balek ly ARENG my ati mana leu pei mo, nanai deng.

¹⁸Naibaly Balam ly hina nai kamta amo leu thui pi: “Zipor i chapo Balek awi, kai teng y jeu ly kaimy kang thui pi ai nai leu tangai ba.

¹⁹Tameuh ly khumi kamta ka-chawi leu thui y leang; mymy ly khumi kamta paleung ali vui y leang. Mymy ly leu adeu nai kamta sa khyp; mymy i leu pei nai kamta py ne khyp.

²⁰Amtheaung hai ai nai kai ai leu ang pei; Tameuh my pei nai amtheaungra ai ly paka vui thai y leang.

²¹Israela chengchi ly vai mo mang y py patang naira, taham si nairachi avum ai nai kai niu y. Nichi i ARENG Tameuh ly nichi hawi vanrei awm; ARENG ly nichi i samrang ne, nanai amthang hai bo.

²²Tameuh ly nichi ai Aikupta pri i dengdairei pahawi nai ne; nichi ly salen katai kamta atho ham.

²³Atam kakawpchi, uimiu khawn kawp naichi i kasabawmra hawi Israela chengchi ai ami py tiu pajau y leang. Tameuh my Israela chengchi tlang tleaung y sa pi nai sai ly lyh ai hawi parai!,’’ nanai thui achi nai awm ai.

²⁴Israela pri ly atho ham nai khrangsi hawi atawm; mawi kei y, thi pajawp y baly khrangsi ly awm py ai ny y,” napi.

²⁵Naibaly samrang Balek my Balam teng y, “Nang ly Israela chengchi ai pasawi moh, na i py nichi ai amtheaung hai moh!” napi.

²⁶Balam my, “Kai ly ARENG i leu pei nai kamta sa ai nai tla khyh, nanai nang teng y kang thui pi y nai sai a?” napi.

²⁷Naibaly Samrang Balek my Balam teng y, “Meingtym takhra mang y abang rai; nang ai huni mang dengdairei nichi ai pasawi ai nai, Tameuh my aly ngai tan ngai lym ai,” napi.

²⁸Hunaibaly ni ly Balam ai daichi ka-vym ai niu pajau nai Peor mawi saleung y hawi bo.

²⁹Balam my samrang teng y, “Hini meingtym y kai i vui maicham saryhrei so pi ly si katai saryhrei hawi beram katai saryhrei py syn pi,” napi.

³⁰Samrang Balek ly Balam i sa hai nai kamta sa iy maicham tleirei y si katai ha harei hawi beram katai ha harei py talam nai ne.