Read Khumi Chin Kati Nai 27 Bible Online

Kati Nai 27 - Khumi Chin bible

Kati Nai 27

¹Zelophehad ly Hephera i chapo, Hephera ly Kilead i chapo, Kilead ly Makhira i chapo, Makhira ly Manase i chapo, Manase ly Josepha i chapo ne. Zelophehad i chaniuchi ly Mahlah, Noah, Hokalah, Milkah hawi Tirzahchi ne.

²Nichi ly ARENG i awmra Tabynako katheu pa-khora y jeu iy, Mosi, pathyp pi nai keung Eleaza, lu sa nai keungchi hawi khumi mipuichi i mo y angdo u iy,

³“Kaichi i ampo ly daichi ka-vym theung y dei jo i, chapo leaungrei py by y. Ngaai ly ARENG ai tiu nai korah i kamkawm theung y py abawi y leaung. Ni ly my i kamngo molam y dei nai teu.

⁴Ni ly chapo by y nai deaungkho y, ni i amyn ly Israela cheng theung i nai tama vui ai bo a? Kaichi i ampo i amjychi ai khaileaung phy paji pi nai kamta, kaichi ai py paji kyh,” nanai takeng u bo.

⁵Naibaly Mosi ly nichi i hnei nai molam y, ARENG teng y takeng pi i,

⁶ARENG my ni teng y,

⁷“Zelophehad i chaniuchi my hnei nai ly teng nai deaungkho y, nichi i ampo i amjychi teng y khaileaung phy pi nai kamta, nichi ai py phy pi teang. Nichi ly ampo i yhmtheaungchi amtym u sy.

⁸Khumi leaungrei ly chapo by y naimy dei baly, ni i chaniu ly ampo i yhmtheaung amtym ai nai tla, nanai Israela chengchi theung y pany hai.

⁹Huni khumi teng y chaniu py by y lawh baly, ni i amjo amnauchi ly ni i yhmtheaung amtym ai nai tla.

¹⁰Na i py ni ly amjo amnauchi py by y lawh baly, ampomo, ampochychi my amtym ai nai tla.

¹¹Huni khumi ly amjo amnau, ti y baly ampomo, ampochychi py by y lawh baly, kasa keh nai amjychi my yhmtheaung amtym ai nai tla. Kai ARENG my nang teng y leu kang pei nai kamta, Israela chengchi ly hini reitachi teaung patawm ai nai tla,” napi.

¹²ARENG my Mosi teng y, “Abarim mawi salo y lyn kalau iy, Israela chengchi teng y kaimy pei ai nai pri angdeang cham.

¹³Nang ly huni pri angdeang chum baly, ngamjo Aron dei nai kamta nang py dei teang ai;

¹⁴ati mana nai mo na baly nangni leaung nyhrei ly Zin daichi ka-vym y kai i leu ai ei hawi nai deaungkho y ne. Meriba meingtym y khumi mipuichi my kai ai hawi y nai thui iy josei u nai khala, nangni ly nichi i mo y kai i sa thai naira ai tahm khai hawi y bo,” napi. (Meriba ly Zin daichi ka-vymra i Kadesa meingtym y awm nai tuino ai thui nai ne.)

¹⁵Naibaly Mosi my ARENG teng y,

¹⁶“Hengra pei keung ARENG Tameuh awi, nang i khumichi ly beram typ keung by y nai beramchi kamta, lu sa pi nai keung by y nai khumichi lawm y naimy, nichi ai lu sa iy,

¹⁷tavai theung y lu sa ai nai khumi leaungrei vawi takhra pi kyh,” nanai takeng bo.

¹⁸ARENG my Mosi teng y, “Nun i chapo Josua ly sa thai naira awm nai khumi ne nai deaungkho y, ni i lu tleaung y nang i kiu tamam pi.

¹⁹Pathyp pi nai keung Eleaza hawi khumi bawibawichi i mo y ni ai angdo hai iy, ni ly nang i kalop amtym nai keung ne, nanai satang thai hai.

²⁰Israela cheng bawibawichi ly ni i leu tangai ai nai, nang teng i sa thai naira phyrei ni teng y pei pi.

²¹Pathyp pi nai keung Eleaza ly Urim hawi Thummim teaung iy, kai i kangai pany thai ai. Naibaly Josua ly Eleaza i paleung pado ai. Hina nai kamta Eleaza ly Josua hawi Israela cheng bawibawichi ai atiti aly kalopchira y pacheang ai mang,” napi.

²²Mosi ly ARENG i leu pei nai kamta sa bo. Ni ly Josua ai Eleaza hawi khumi mipuichi i mo y angdo hai.

²³Naibaly Mosi ly ARENG i leu pei nai kamta, Josua i lu tleaung y kiu tamam iy my i meingtym amtym nai keung ne, nanai satang thai hai bo.