Read Khumi Chin Kati Nai 3 Bible Online

Kati Nai 3 - Khumi Chin bible

Kati Nai 3

¹Sinai mawi saleung y ARENG my Mosi teng y leu pei nai neng khala y Aron nini Mosi i yhm dengtheungchi ly hinichi ne.

²Aron i chapo chalu ly Nadab ne i, Abihu, Eleaza, Ithama napi nai chapo leaung palyhrei awm.

³Nichi ly pathyp pi nai keung y tahm palyn iy aau patyp nai keungchi ne;

⁴na i py Nadab hawi Abihu nini ly Sinai daichi ka-vym y ARENG teng y talam ngau y nai leng patlum nai kapathypra talam lawh nai deaungkho y, padei vui bo. Nini ly cho chanau so y. Eleaza hawi Ithama nini ly Aron heng nai thym y pathyp pi nai keung kalop sa hawi nai ne.

⁵ARENG my Mosi teng y,

⁶“Levi theaungchi ai palau iy pathyp pi nai keung Aron i anui y kalop so hai.

⁷Nichi ly kai i awmra Tabynako i vui kalop sa u ai nai tla; pathyp pi nai keung kalopchi hawi Israela cheng verei i kalopchi py sa u ai nai tla.

⁸Nichi ly Tabynako i ateaung alang bawibawichi kry iy, Israela chengchi i vui Tabynakora y kalop sa u ai nai tla.

⁹Levi theaungchi i aly len keh nai kalop ly Aron hawi ni i chapochi i anui y kalop sa ai nai ne.

¹⁰Nang ly Aron hawi ni i chapochi ai pathyp pi nai keung i kalopchi au ai nai tla; huni kalop hawi abi y nai khumi my pathyp pi nai keung kalop sa lawh baly padei ai nai tla,” napi.

¹¹ARENG my Mosi teng y,

¹²“Levi theaungchi ly kai i kai i khumichi ne. Kai ly Aikupta khumichi i chapo chalu bawibawichi ai padei nai thym khala, Israela cheng yhm dengtheung tleirei i chapo chalu hawi tawnbawi cho chalu ngiereichi ai ly kaimy i vui vawi yb nai ne. Vai ly Israela chengchi i chapo chaluchi i jeng y, Levi theaungchi ai kaimy vawi takhra bo. Nichi ly kai i khumichi ne i, Kai ly ARENG ne,” napi.

¹³

¹⁴Sinai daichi ka-vym y ARENG my Mosi teng y,

¹⁵Levi theaungchi theung i lorei hawi, leng awm nai deaungdi neampacho ngiereichi ai, nupai hawi yhm dengtheung amyn la ai nai leu pei nai kamta,

¹⁶Mosi ly amyn la nai ne.

¹⁷Levi ly karashon, kohath hawi Merari napi nai chapo leaung thomrei ai sa. Nichi ly mychi cheng amyn angam nai amsi pajochi ne. karashon ly Libni hawi Simei napi nai chapo leaung nyhrei ai sa; kohath ly Amram, Izhara Hebron hawi Uziela napi nai chapo leaung palyhrei ai sa. Merari ly Mahli hawi Mushi napi nai chapo leaung nyhrei ai sa. Nini ly mychi cheng amyn angam nai amsi pajochi ne.

¹⁸

¹⁹

²⁰

²¹Karashon i nupaira y Libni hawi Shimei nini i yhm dengtheungchi abawi.

²²Lorei hawi Lorei leng awm nai neampacho vuikanai bawibawi ly leaung sang saryh taja chungvai pangrei awm nai ne.

²³Huni nupai ly Tabynako i nidym ngan mang y tai u ai nai tla.

²⁴Nichi i lu ly Laela i chapo Eliasapha ne.

²⁵Nichi ly Tabynako angtheung mang i khiura, angam mang i khiura, katheu pa-kho kanih ali hang nai,

²⁶maicham hawi Tabynako ka-ki apai tapang nai kanih alichi hawi apai katheu pa-khora i kanih ali hang nai kry ai tla nai ne. Nichi ly huni bawibawi kry ai nai ne.

²⁷Kohath i nupai theung y Amram, Izhara, Hebron hawi Uziela i dengtheungchi abawi i,

²⁸Lorei hawi lorei leng awm nai neampacho vuikanai bawibawi ly sang taja takaw chungvai tariurei awm nai ne.

²⁹Huni nupaichi ly Tabynako i tokalawi ngan mang y tai u ai nai tla.

³⁰Nichi i lu ly Uziela i chapo Elizaphan ne.

³¹Nichi ly Leu Maikawm Pawm, sabawi, maisi yhm kateang, maichamchi, Meingtym Kachaira y pathyp pi nai keungchi teaung nai sora samtangchi hawi chai keh nai meingtym katheu pa-khora i kanih ali jang naichi kry ai nai tla. Nichi ly huni ateaung bawibawichi kry ai tla nai ne.

³²Levi theaungchi i miteaung keh ly pathyp pi nai keung Aron i chapo Eleaza ne. Ni ly meingtym kachaira kalop sa naichi ai kry nai keung ne.

³³Merari i nupai theung y Mahli yhm dengtheung hawi Mushi dengtheung abawi.

³⁴Lorei hawi, lorei leng awm nai neampacho vuikanai bawibawi ly sang tariu saryh chungvai nyhrei awm nai ne.

³⁵Huni nupai ly Tabynako tosyh ngan mang y tai u ai nai tla; nichi i lu ly Abihaila i chapo Zuriel ne.

³⁶Nichi ly Tabynako angpang pjengchi, katlangchi, chenghengchi, panuirachi hawi, hunichi i ateaung bawibawichi kry nai kalop sa ai nai tla. Nichi ly huni vawn ateaung alangchi kry ai nai tla.

³⁷Nichi ly Tabynako apai chenghengchi, panuirachi, khangmuichi, vuinawnchi py kry ai nai tla.

³⁸Mosi, Aron hawi ni i chapochi ly Tabynako nisi ngan mang y tai u ai nai tla. Nichi ly Israela chengchi i vui meingtym kachaira y chiu nai leaungsai kalop bawibawichi sa ai nai tla. Huni hawi abi y nai khumi my sa lawh baly, huni khumi ai ly padei ai nai tla.

³⁹ARENG my leu pei nai kamta Mosi ly lorei hawi lorei leng awm nai Levi theaung neampachochi ai nupai ka-thui ka-thui amyn la nai vuikanai bawibawi ly 22,000 rei awm nai ne.

⁴⁰ARENG my Mosi teng y, “Israela chengchi i chapo chaluchi ly kai i khumichi ne. Hunaibaly lorei hawi lorei leng awm nai chapo chalu bawibawichi i amyn lo. Na i py hunichi ai kai i khumi palawn ai nai vawi nai tleaung y ly Levi theaungchi ai kavawi bo! Kai ly ARENG ne! Huni bo y tawnbawi cho chalu bawibawichi i jeng y, Levi theaungchi i tawnbawichi ai kaimy vawi takhra bo,” napi.

⁴¹

⁴²Mosi ly leu tangai i, chapo chalu bawibawi i amyn la achu bo.

⁴³Lorei hawi lorei leng awm nai Israela chengchi i chapo chuluchi ai amyn la i, vuikanai bawibawi ly 22,273 rei awm nai ne.

⁴⁴ARENG my Mosi teng y, “Vai ly Israela chengchi i chapo chalu bawibawichi i jeng y, Levi theaungchi ai kai teng y au ai nai tla. Hunai kamta teang Israela chengchi i tawnbawi cho chuluchi jeng y, Levi theaungchi i tawnbawi cho chaluchi ai kai teng y au ai nai tla.

⁴⁵

⁴⁶Israela chengchi i chapo chaluchi ly Levi theaungchi i chapo chalu vuikanai tleaung y leaung 273 rei nawi nai deaungkho y, nang ly huni chapo chaluchi ai atleu teang ai nai tla.

⁴⁷Khumi leaungrei ai vang apani nai tangka chang tlau pangrei hawi atleu ai nai tla.

⁴⁸Huni tangka ai ly Aron hawi ni i chapochi teng y au ai nai tla,” napi.

⁴⁹Mosi ly ARENG i leu tangai i, nga nai

⁵⁰tangka chang 1,365 rei la iy,

⁵¹Aron hawi ni i chapochi teng y pei pi bo.