Read Khumi Chin Kati Nai 31 Bible Online

Kati Nai 31 - Khumi Chin bible

Kati Nai 31

²“Israela chengchi i vui Midian chengchi ai vawitheung tha. Huni kalop sa pajau nai bo y nang ly dei ai,” napi.

³Hunai deaungkho y Mosi ly Israela chengchi teng y, “Midian chengchi ly ARENG i tlang tleaung y sa tamang nai deaungkho y, nichi ai tiu ai nai angvei u rym.

⁴Tavai atiu ai nai Israela cheng theaung theung i, theaung harei y khumi leaung sangrei thau ai nai tla,” napi.

⁵Hunai deaungkho y tavai thau ai nai Israela cheng theaung theung i khumi leaung sangrei, bawibawi ly leaung 12,000 reichi ai vawi takhra u bo.

⁶Naibaly Mosi ly pathyp pi nai keung Eleaza i chapo Phineha ai Israela tavaimi kamkawm ai lu sa hai bo. Ni hawi vanrei Tabynako i vui ateaung alangchi hawi, tavai pachyh nai bawchi py syn u bo.

⁷ARENG my Mosi teng y leu pei nai kamta, nichi ly Midian chengchi ai tiu u i,

⁸Midian samrang leaung pangreichi Evi, Rekem, Zura, Hura hawi Rebachi raurei, neampacho bawibawichi ai tleh pawn nai ne. Beora i chapo Balam ai py tleh vui bo.

⁹Israela chengchi ly Midian neampachychi hawi deaungdichi ai patiu iy nichi i si, beram, tawnbawichi hawi vanrei, yhmtheaung katui ngiereichi ai la pi pawn bo.

¹⁰Naibaly nichi i mary hawi tai naira ngiereichi ai py, mai leng iy taphra pi pawn nai ne.

¹¹Nichi ly tavai tiura i nga nai vawnchi, langheng y hawi naichi hawi tawnbawichi py,

¹²Jeriko mary kangka Jordan tavo peang i Moba adym y tai nai Mosi, Eleaza hawi Israela chengchi teng y syn pi u bo.

¹³Mosi, Eleaza hawi khumi mipuichi ai lu sa nai bawibawichi ly tai angam mang y theu u iy, tavaimichi ai lamchung u bo.

¹⁴Na i py Mosi ly tavai keung i vawi nai tavailu areng, tavailu hawi miteaung kehchi ai kado theu hai nai ne.

¹⁵Ni ly nichi teng y, “Nangchi ly ati mana nai ly neampachy bawibawichi ai kangheng khai u lawh mo?

¹⁶Hini neampachychi ly Balam my tau pei nai kamta, Peor meingtym y awm nai thym khala ARENG ai ym y ai nai Israela neampachochi ai taphra nai ly pany u. Huna nai kamngo sa nai molam y, ARENG i khumichi ai no kanghawi tym hai nai ne.

¹⁷Hunai deaungkho y neampacho deaungdichi hawi neampachochi hawi apha reng nai neampachy ngiereichi ai ly tleh u pawn.

¹⁸Na i py neampachy deaungdichi hawi anglochi ai ly nangmychi i vui kangheng khai u.

¹⁹Nangchi theung y khumi ai padei nai hawi khumi kadei ai nam nai khumi bawibawichi ly tai naira angam mang y kani saryhrei awm u ai nai tla. Pa-thom kani hawi saryh kani khala, nangchi hawi nangmychi my patiu nai neampachychi i vui reita leaungsai y kachai sa pi ai nai tla.

²⁰Nangchi i baichu ateaung alangchi hawi mawi peih, mi-i mui, ti y baly dengkeaung hawi sa nai atiti ngiereichi py pachai u ai nai tla,” napi.

²¹Pathyp pi nai keung Eleaza my py, tavai keung i vawi nai tavai michi teng y, “ARENG my Mosi teng y pei nai reitachi ly

²²muku, tangka, kheupaja, tamo, sawn, kima napi nai mai kang thai y nai vawn ngiereichi ai ly mai y pachai ai nai tla. Takhra tamo ngan ateaungchi ai ly kachai sa nai tui hawi pachai ai nai tla.

²³

²⁴Saryh kani y ly nangchi i baichu ateaung alangchi pasiu ai nai tla. Huni bo y nangchi ly reita y chai u ai i, tai naira theung y kun u ali teang ai nai nga u bo,” napi.

²⁵ARENG my Mosi teng y,

²⁶“Nang hawi Eleaza ly khumi mipuichi ai lu sa nai keungchi hawi vanrei, langheng y hawi naichi hawi tawnbawichi raurei, tavai keung y nga nai vawnsai bawibawichi ai py kati ai nai tla.

²⁷Huni vawnsaichi ai kangngeng riri phy nyhrei phy iy, phyrei ly tavaimichi ai paji pi ly takhra phyrei nai ai ly khumi humchi ai phy pi ai nai tla.

²⁸Tavaimichi i vui phy pi nai theung i, langheng y hawi nai khumi leaung chungvai pangrei y leaungrei, hunai kamta teang sichi, keaungngo kano kasauchi, beramchi, mi-ichi py phy pi ly ARENG i vui akeu palawn iy pakhaw ai nai tla.

²⁹ARENG teng y talam ai nai khai takhra nai phy ai ly pathyp pi nai keung Eleaza teng y au ai nai tla.

³⁰Khumi mipuichi i vui phy pi nai theung i, langheng y hawi nai khumi leaung vui pangrei y leaungrei, hunai kamta teang sichi, keaungngo kano kasauchi, beramchi, mi-ichi py phy pi ly ARENG i Tabynako kry nai Levi theaungchi teng y pei pi ai nai tla,” napi.

³¹Mosi hawi Eleaza nini ly ARENG i leu pei nai kamta sa hawi bo.

³²Tavaimi mychi i nga kym nai vawnsaichi bo y, tavai keung y nga nai khumi hawi tawnbawichi i vuikanai ly hijirei ne. Beram hawi mi-i vuikanai ly 675,000rei, si ly 72,000rei, keaungngo kano kasau ly 61,000rei, anglo ka-cheang vuikanai ly 32,000rei ne.

³³

³⁴

³⁵

³⁶Tavai michi nga nai phy ka-hyhrei ly beram hawi mi-i 337,500rei ne; huni theung i ARENG i vui akeu palawn iy talam ai nai vuikanai ly 675rei ne; tava michi i vui phy pi nai si ly 36,000rei ne. Huni theung i ARENG i vui akeu palawn iy talam ai nai vuikanai ly 72rei ne; tavaimichi i vui phy pi nai keaungngo kano kasau vuikanai ly 30,500rei ne. Huni theung i ARENG i vui akeu palawn iy talam ai nai vuikanai ly 61rei ne. Tavaimichi i vui phy pi nai anglo vuikanai ly leaung 16,000rei ne. Huni theung i nai ARENG i vui akeu palawn iy talam ai nai vuikanai ly leaung 32rei ne.

³⁷

³⁸

³⁹

⁴⁰

⁴¹Hunai deaungkho y ARENG my leu pei nai kamta, Mosi ly ARENG teng y talam ai nai khai patyp nai phy ai ly Mosi my Eleaza teng y au pi nai ne.

⁴²Khumi mipuichi i vui phy pi nai py, tavaimichi i vui phy pi nai kamta ne teang: beram hawi mi-i 337,500rei, si ly 36,000rei, keaungngo kano kasau ly 30,500rei, anglo vuikanai ly 16,000rei ne.

⁴³

⁴⁴

⁴⁵

⁴⁶

⁴⁷Mosi ly huni phy nga nai theung i langheng hawi nai hawi tawnbawichi ai phy vui pangrei y phyrei la iy, ARENG my leu pei nai kamta ARENG i Tabynako ai kry nai Levi theaungchi ai pei pi nai ne.

⁴⁸Naibaly tavailu arengchi ly Mosi teng y chei u iy,

⁴⁹satang thai hai nai ly “Kaichi i leu anui y awm nai tavaimichi ai kaichi my kati nai khala, leaungrei py chau y nai ne.

⁵⁰Hunai deaungkho y kaichi leaung leaungrei nga nai muku ateaung alang, akawi ka-si, ka-si, kiusabyh, kano amcho hawi chaivawn leangchi ai nang teng y kang syn pi bawibawi bo. ARENG my kaichi ai deira i tleaung hai nai deaungkho y, huni ateaung alangchi kang talam pi bo. Huna nai y mymy ly kaichi ai ama hai ai,” nanai thui pi u.

⁵¹Mosi hawi Eleaza nini ly huni muku ateaung alangchi ai talam hawi bo.

⁵²Tavailu arengchi my au nai ateaung alang bawibawichi i kaji ly sie chungvai tariurei tahm awm nai ne.

⁵³Tavailu ny y nai risachi ly mymychi i nga nai vawnsaichi ai nga u kym bo.

⁵⁴ARENG ly Israela chengchi ai ama hai ai nai Mosi hawi Eleaza nini ly mukuchi ai Tabynako mang y syn hawi bo.