Read Khumi Chin Kati Nai 4 Bible Online

Kati Nai 4 - Khumi Chin bible

Kati Nai 4

¹ARENG my Mosi teng y,

²“Levi theaung kohath i nupai hawi yhm dengtheungchi theung y,

³saneng phairei hawi saneng vui pangrei sala, ARENG i Tabynakora y kalop sa pajau nai neampacho bawibawichi ai amsi pajochi dengdai yhm dengtheung ka-thui ka-thui amyn la achu ai nai leu pei.

⁴Nichi ly chai keh nai kalopchi sa ai nai tla,” napi.

⁵ARENG my Mosi teng y hina naichi sa ai nai leu pei bo. Tai asyh ai nai neng tym baly, Aron hawi ni i chapochi ly Tabynako theung y kun i, Leu Maikawm Pawm mo y jang nai kanih ali hang nai leu iy, huni hawi Leu Maikawm Pawm y khiu ai nai tla.

⁶Kanih ali salo y mawi peih kanem hawi khiu iy, huni salo y kanih an kamngau hawi kiu bi ai nai tla. Naibaly sengtlengchira samtleangchi thawi yb ai nai tla.

⁷ARENG teng y tako talam nai sabawi salo y an kamngau kanih bai iy, huni salo y samtangchi, rimui khauchi, rahumchi, kreip hang khai nai tui kacheangchi khai ai nai tla. Talam nai tako py sabawi salo y awm jojo ai nai tla.

⁸Huni ateaung alang bawibawichi ai an kamsen kanih hawi khiu iy, huni an kamsen kanih salo y mawi peih kanem hawi khiu ai nai tla. Naibaly sengtlengchira y samtleangchi thawi yb nai tla.

⁹Maisi kateang hawi maisi yhmchi, tangkeihchi, mai-ai khaira khauchi hawi olive asitui khauchi ai an kamngau kanih hawi khiu ai nai tla.

¹⁰Maisi kateang hawi, huni i ateaung bawibawichi ai mawi peih kanem hawi tapau iy angjeaungra salo y khai ai nai tla.

¹¹Muku maicham salo y an kamngau kanih hawi khiu iy, huni salo y mawi peih kanem hawi mym ai nai tla. Naibaly samtleangchi thawi yb ai nai tla.

¹²Kachai meingtymra teaung nai sora hawi samtang bawibawichi ai an kamngau kanih hawi tapau iy, huni salo y mawi peih kanem kanih hawi khiu chum baly, samtleang salo y khai ai nai tla.

¹³Maichamra i mawi thau hawi maidym vah chum baly, an kamleng kanih hawi khiu ai nai tla.

¹⁴Huni salo y maicham i ateaung maisi yhm, leangkhawnchi, khaileaung chawn hawi rahumchi khai ai nai tla. Naibaly maichamra i ateaung alangchi ai mawi peih kanem khiu iy, samtleangchi thawi yb ai nai tla.

¹⁵Tai naira asyh ai nai neng tym baly Aron hawi ni i chapochi my ateaung alang kachai bawibawichi ai khiu chum nai khala naini, kohath i nupaichi ly jeu iy, huni ateaungchi angjeaung u ai nai tla. kohath nupaichi ly huni ateaung alangchi ai kiu hawi abi pajau y; abi lawh baly dei u ai. Tabynako asyh nai tleirei kohath i nupaichi ly huni kalopchi sa u ai nai tla.

¹⁶Pathyp pi nai keung Aron i chapo Eleaza ly Tabynako i vui py, maisi hang, rimui, teicha teinei katalamra, tahm palyn nai asitui hawi, ARENG teng y talam nai Tabynako i ateaung alang ngiereichi ai py amsi pi ai nai tla.

¹⁷ARENG ly Mosi nini Aron teng y,

¹⁸“kohath nupai ly huni vawn chai keh nai ateaung alangchi abi y ai nai hawi, abi lawh baly dei y ai nai, hunichi sahawi y ahai ai nai pei moh. Huna naichi avum y ai nai Aron hawi ni i chapochi ly Tabynako theung y kun iy, khumi luteng sa ai nai kalop hawi angjeaung ai nai kalopchi py pasym pi akyhkyh ai nai tla.

²⁰Na i py kohath khumichi Tabynako theung y kun iy, ateaung alang kachaichi ai khen u lawh baly dei u ai,” napi.

²¹ARENG my Mosi teng y,

²²Levi theaung karashon nupai hawi yhm dengtheungchi theung i saneng phairei hawi, saneng vui pangrei sala awm iy ARENG i awmra Tabynakora y kalop sa pajau nai neampachochi ai, amsi pajo mang i dengtheung ka-thui ka-thui amyn la ai nai leu pei bo.

²⁴Nichi i kalop ly: Tabynako, huni i theung mang i tabiura, angam mang i tabiura, mawi peih kanem hawi sa nai salo keh i tabiura,

²⁶Tabynako katheu pa-kho jang nai kanih ali, Tabynako hawi maicham teng ka-ki kanih ali hang nai hawi vuinawnchi, Tabynako apai pa-kho kanih alichi py, huni vawnsaichi tai naira y teaung nai leaungsai bawibawichi py, angjeaung u ai nai ne. Nichi ly huni ateaung alangchi hawi sa ai avo nai kalop ngiereichi sa u ai nai tla.

²⁷kerashon nupaichi ly Aron hawi ni i chapochi my pasym pi yb nai kalopchi hawi angjeaung ai nai ngiereichi sa ai nai Mosi hawi Aron nini my khen patawm ryhryh ai nai tla.

²⁸Hunichi ly Tabynakora y karashon nupaichi my sa ai nai kalopchi ne. Nichi ly pathyp pi nai keung Aron i chapo Ithama my pacheang nai kamta sa u ai nai tla.

²⁹ARENG ly Levi theaung Merari nupai hawi yhm dengtheungchi theung y,

³⁰saneng phairei hawi saneng vui pangrei sala awm iy ARENG i Tabynakora y kalop sa pajau nai neampachochi ai amyn la ai nai Mosi teng y leu pei bo.

³¹Nichi ly Tabynako angpang pjengchi, katlangchi, chenghengchi hawi panuirachi py,

³²Tabynako apai ka-ki chenghengchi, panuirachi, khangmuichi hawi vuinawnchi py, hunira sa tabi nai ateaung alang bawibawichi py, angjeaung ai nai tla. Khumi luteng ly mychi i vui pasym pi yb nai ateaungchi angjeaung ai nai tla.

³³Hinichi ly Tabynakora y Merari nupaichi my sa ai nai kalopchi ne. Nichi ly pathyp pi nai keung Aron i chapo Ithama my pacheang nai kamta sa u ai nai tla.

³⁴ARENG my leu pei nai kamta Mosi, Aron hawi Israela cheng lu sa naichi ly Levi theaung theung i kohath nupai, karashon nupai hawi Merari nupaichi theung i, saneng phairei hawi saneng vui pangrei sala awm iy, ARENG i awmra Tabynakora y kalop sa pa jau nai neampachochi ai, amsi pajo hawi yhm dengtheung ka-thui ka-thui amyn la achu nai hinichi ne. [Nupai] — [Vuikanai] Kohath — 2,750 Karashon — 2,630 Merari — 3,200 bawibawi : — 8,580

⁴⁹ARENG my Mosi teng y leu pei nai kamta, Levi theaung khumi luteng ai amyn la iy khumi leaung leaungrei sa ai nai kalopchi hawi angjeaung ai nai kalopchi py pasym pi yb nai ne.