Read Khumi Chin Kati Nai 5 Bible Online

Kati Nai 5 - Khumi Chin bible

Kati Nai 5

¹ARENG ly Mosi teng y,

²“Israela chengchi theung y ka-jei awm nai nganpeih no man nai, ti y baly ang vawi hawi y nai man nai, khumi kadei ai abi nai deaungkho y chai y nai khumichi ai ly tai naira angam mang y patheu vui ai nai thui pi.

³Kai i khumichi hawi vanrei kai i awm nai tai naira y amso ngai hai y ai nai, reita leaungsai y chai y nai khumichi ai tai naira angam mang y patheu vui ai nai tla,” napi.

⁴ARENG my leu pei nai kamta Israela chengchi ly leu tangai i, chai y nai khumichi ai tai naira angam mang y patheu u pawn bo.

⁵ARENG my Mosi teng y,

⁶Israela chengchi i vui anui mang i leu pei nai ly hinichi ne. Nangchi theung i amimi py, khumi takhra leaungrei ai sa tamang iy ARENG i reita leu pei naichi taphra lawh baly,

⁷huni khumi ly amy i kamngo ahui iy mymy tamang nai khumi ai peh angym nai bo y, chungphy apomrei peh panawi bi ai nai tla.

⁸Na i py ka-peh tangka nga ai nai khumi ly dei veng iy amjo amnau py by y lawh baly, huni tangka ai pathyp pi nai keung i vui ARENG teng y talam ai nai tla. Sa tamang nai keung ly peh nai bo y, kachai sa ai nai i vui y beram katai harei py pei bi ai nai tla.

⁹Pathyp pi nai keung dengdairei Israela chengchi my ARENG teng y talam patyp nai katalamra ngiereichi ly pathyp pi nai keung i vui ne.

¹⁰Pathyp pi nai keung ly mymy teng y talam nai ngierei peang nai ne.

¹¹ARENG ly Mosi teng y,

¹²Israela chengchi i vui hina nai leu pei bo. Neampacho leaungrei ly my i aju ai ka-ym by y iy, neampacho takhra hawi tamang, nanai juvo my ym thai y nai awm ai; na i py aju my ly huni ai apha typ nai y mo, niu nai khumi by y nai y mo, patiu rang nai py by y baly, juvo my neng hai khyp thai y; huna nai ny y naimy aju ly neampacho takhra hawi py tamang y teu i py, juvo my ym thai y nai awm lawh ai.

¹⁵Ati py ne sy, juvo ly aju ai pathyp pi nai keung teng y hawi ai nai tla. Ni ly talam ai nai chajai tako dei sie thomrei py syn ai nai tla; na i py katalamra ly ym thai y nai molam y, kateng lam amny hai ai nai deaungkho y, ni ly tako dei salo y olive asitui leih moh sy, rimui py khai moh sy.

¹⁶Pathyp pi nai keung ly huni neampachy ai maicham mo y angdo hai ai nai tla.

¹⁷Ni ly alai laawmra y tui kachai tleng iy, ARENG i awmra Tabynako paichira i spryh maidenchy la chum baly, huni tui laawm theung y phui ai nai tla.

¹⁸Naibaly ni ly neampachy i samteung lam phro iy katalamra tako dei ai ni i kiu tleaung y khai ai nai tla. Pathyp pi nai keung ly vaineng lawi hai nai tui kakho bum nai laawm ai kiu y syn ai nai tla.

¹⁹Naibaly pathyp pi nai keung ly neampachy i tlang tleaung y, hina nai vaineng tau ai nai tla. “Nang ly takhra neampacho hawi tamang y lawh baly, hini tauh-ato nai tuimy pajeng ai naira i nai law tleaung hai sy.

²⁰Na i py nang ly sa tamang lawh baly,

²¹nang ly nang i khumichi theung y ARENG my taham si hai sy; nang i seaunghai py jei vui iy, nang i kajeu py pobeung ai.

²²Hini tui ly nang i taku theung y tym baly kajeu pobeung iy, nang i seaunghai py jei paryp ai,” napi. Hunaibaly neampachy my, “Hini vaineng lawi sy, ARENG my kai i tlang tleaung y hina nai kamta tym hai sy,” nanai vaineng abeu ai nai tla.

²³Naibaly pathyp pi nai keung my vaineng abeu nai cha tajiu iy, huni cha-mawi ly tui kakhora mawi tama vui pa-rei kanu pyn vui ai nai tla.

²⁴Neampachy i tlang tleaung y ka-jeira tym hai nai vaineng tui tui y kyh rai khala,

²⁵pathyp pi nai keung ly neampachy kiu i tako dei la iy ARENG teng y talam chum baly, maicham tleaung y khai ai nai tla.

²⁶Naibaly ni ly tako dei kiu angsorei la iy, maicham salo y leng patlum ai nai tla. Kangkhym y ly pathyp pi nai keung my neampachy ai huni vaineng tui nei hai ai nai tla.

²⁷Neampachy ly pajang sa lawh baly, ni ly khri pa-rei patangra avum iy, ni i kajeu pobeung naimy, ni i seaunghai py jei paryp ai. Ni ly my i khumichi i vui y taham si hai ai.

²⁸Na i py neampachy ly tamang y lawh baly, ni ly vaineng lawi y iy cho chanau py sa ai.

²⁹Huna nai reita ly Juvo my, mymy i aju saw, nanai takho hai nai khala teaung ai nai ne. Pathyp pi nai keung ly neampachy ai maicham mo y angdo hai iy, hina nai reita kamta sa pi ai nai tla.

³¹Juvo ly tamang y ai nai tla; na i py aju ly kamngo sa lawh baly kamngo molam ly pajengra avum ai.