Read Khumi Chin Kati Nai 6 Bible Online

Kati Nai 6 - Khumi Chin bible

Kati Nai 6

¹ARENG my Mosi dengdairei

²Israela chengchi teng y hina nai reitachi pei pi nai ne. Nangchi theung y neampacho mo, neampachy mo, naziri kamkawm lawm ai nai vaineng abeu patyp iy, amymy ai ARENG teng y aau lawh baly,

³huni khumi ly hm rah nei cha ai nai avo y. Kreip athai hawi sa nai pavui thai nai amjychi nei ai nai tlo y, kreip athai py, kreip athai kajei py cha ai nai avo y.

⁴Ni ly naziri kamkawm khumi lawm nai ryrei ly kreip athai hm, kreip athai ki, kreip angjyn dengdairei theu nai atitichi py cha ai nai avo y.

⁵Ni ly naziri kamkawm khumi lawm ai nai leu atau nai sala ryrei ly sam atakip ai nai tlo y, avau vui ai nai py tlo y; ni ly ARENG teng y aau yb nai leu atau nai ryrei ly sam hawi labeaung mui avau ai nai tlo y.

⁶Ni i sam ly amymy ai Tameuh teng y aau nai ka-ma-ra ne; hunai deaungkho y ni ly amymy ai chai hai y ai nai, khumi tlaiveu sahawi y chei ai nai avo y; amhm ampo, amjo amnau, tuicho dei i py chei ai nai avo y.

⁸Ni ly naziri kamkawm khumi lawm nai ryrei ly ARENG teng y aau nai khumi ne.

⁹Nazari kamkawm khumi leaungrei i sahawi y athang khai y naimy, khumi leaungrei dei vui lawh baly, ni i aau patyp nai sam ly chai y nai lawm vui ai. Huna nai lawm vui lawh baly kani saryhrei ajeng iy, sam hawi labeaung mui avau ai nai tla. Naibaly ni ly reita leaungsai y chai ai.

¹⁰Ni ly tajarei kani y yhm buhu bomrei, ti y baly amprym buhu bomrei ai ARENG i awmra Tabynako katheu pa-kho y awm nai pathyp pi nai keung teng y syn pi ai nai tla.

¹¹Ni ly tlaiveu hawi abi iy chai y vui nai molam y, pathyp pi nai keung ly ni i vui kachai sa pi ai nai, tavo harei ai kamngo pachai ai nai katalamra, vai harei nai ly leng patlum nai kapathypra talam ai nai tla. Huni kani y ni i sam ly ARENG teng y aau patyp bi ai nai tla.

¹²Nazari kamkawm khumi lawm teang ai nai, amymy ai ARENG teng y aau bi ai nai tla. Ni i khai takhra nai sam ly chai y vui nai molam y, vaichi khala leu atau nai ly phra vui nai ne. Ni ly pajengra lawi ai nai i vui y kapathypra talam ai nai ly sanengrei awm khyh nai beram cho syn ai nai tla.

¹³Nazari kamkawm lawm nai khumi ly leu atau nai neng kheih nai khala kachai sa ai nai ly hina nai kamta ne.

¹⁴Ni ly leng patlum nai kapathypra i vui y no-na by y nai sanengrei awm khyh nai beram katai harei, kamngo pahen nai kapathypra i vui y no-na by y nai beram nu harei hawi, leunghawi kapathypra i vui y no-na by y nai beram katai harei, ARENG teng y talam ai nai Tabynako katheu pa-khora y syn ai nai tla.

¹⁵Ni ly olive asitui hawi tako dei katlen iy sa nai angbo abawi y nai tako thotleung naichi hawi, olive asitui kaleu nai angbo abawi y nai tako phichi takhurei talam ai nai tla. Huni bo y teicha teinei kapathypra hawi kreip hang katalamrachi talam ai nai tla.

¹⁶Pathyp pi nai keung ly huni kapathypra bawibawichi ai ARENG teng y talam iy, kamngo pahen nai kapathypra hawi leng patlum nai kapathyprachi talam ai nai tla.

¹⁷Ni ly leunghawi kapathypra i vui y ARENG teng y beram katai talam nai khala, tako takhurei py talam ai nai tla; hunichi hawi vanrei kreip hang katalamra py talam ai nai tla.

¹⁸Nazari khumi ly Tabynako katheu pa-kho y amy i sam avau iy, leunghawi kapathypra leng patlum nai mai theung y thun ai nai tla.

¹⁹Naibaly pathyp pi nai keung ly beram paleang byh yb nai hawi vanrei, takhu theung i tako phirei, thotleung nai tako harei, naziri khumi i kiu y pei pi ai nai tla.

²⁰Huni bo y pathyp pi nai keung ly huni katalamrachi ai ARENG teng y talam patyp ai nai tla. Huni katalamrachi bo y reita leaungsai y beram amsei hawi phaichi ly pathyp pi nai keungchi i vui katalamrachi ne. Huni bo baly naziri khumi ly kreip hang nei ngau bo.

²¹Hini reita leu pei naichi ly naziri kamkawm khumichi i vui khai pi nai reitachi ne. Na i py khumi leaungrei ly naziri kamkawm khumi lawm ai nai molam y, leu atau reng nai kari tleaung y atau lawh baly, my i atau nai kamta sa khyp ai nai tla.

²²ARENG my Mosi teng y,

²³Israela chengchi ai amtheaung hai ai nai, Aron hawi ni i chapochi teng y hina nai kamta leu pei nai ne.

²⁴ARENG ly nangchi ai amtheaung hai iy kry sy.

²⁵ARENG ly nangchi ai tamen iy pahen sy.

²⁶ARENG ly nangchi ai khen angdeang iy awmnem naira pei sy.

²⁷Naibaly ARENG my, “Pathyp pi nai keungchi ly kai i amyn y Israela chengchi ai amtheaung hai baly, kai ly nichi ai py amtheaung hai teang ai,” napi.