Read Khumi Chin Kati Nai 8 Bible Online

Kati Nai 8 - Khumi Chin bible

Kati Nai 8

¹ARENG my Mosi teng y,

²“Aron ly maisi yhm kateangra y maisi saryhrei panui nai khala, maisichira i kangvang ly maisi yhm kateang mo y ko hai ai nai tla,” napi.

³Aron ly ARENG my leu pei nai kamta, maisi yhm kateang mo y kangvang ko hai ai nai maisi yhmchi khai titari bo.

⁴ARENG my Mosi teng y patei pi nai kamta khyp, maisi yhm kateang verei ly muku hawi thip nai ne.

⁵ARENG ly Mosi teng y,

⁶“Levi theaungchi ai Israela chengchi theung i nai vawi takhra vui iy nichi i vui

⁷hina nai kamta kachai so pi. Kachai sa ai nai molam nichi i tlang tleaung y tui katheng, mychi i tlang verei muichi avau iy ateaungchi py pasiu u pyn sy. Naibaly nichi ly reita y chai u ai.

⁸Naibaly nichi ly si katai beaungjeaung harei hawi, teicha teinei katalamra y olive asitui katlen nai tako dei talam ai nai tla. Kamngo pahen nai kapathypra i vui y si katai harei py syn bi ai nai la.

⁹Naibaly Israela cheng verei khumi akachu hai iy, Levi theaungchi ai ly kai i awmra Tabynako mo y angdo hai ai nai tla.

¹⁰Israela khumi mipuichi ly Levi theaungchi i lu tleaung y kiu tamam ai nai tla;

¹¹naibaly Israela chengchi theung i dengdairei Levi theaungchi ai kai teng y talam patyp nai katalamra y, Aron my au ai nai tla. Hina nai kamta nichi ly kai i kalop amsi u pajau ai.

¹²Naibaly Levi theaungchi ly si katai nyhrei i lu tleaung y kiu kheang u ai nai tla. Levi theaungchi ai reita i leaungsai y kachai sa ai nai, kamngo pahen nai kapathypra i vui y si katai harei py, leng patlum nai katalamra i vui y takhra si katai harei py talam ai nai tla.

¹³“Levi theaungchi ai kai teng y talam patyp iy, Aron hawi ni i chapochi my nichi ai lu sa ai nai tla.

¹⁴Hina nai kamta Levi theaungchi ly kai i vui lawm ai nai, Israela chengchi theung i vawi iy khai takhra ai nai tla.

¹⁵Nang ly Levi theaungchi ai kachai sa nai hawi au chum baly, nichi ly Tabynakora y kalop sa u thai ai.

¹⁶Israela chengchi i chapo chaluchi jeng y nichi ai kai i vui vawi takhra nai deaungkho y, nichi ly kai i khumichi ne.

¹⁷Kai ly Aikupta khumichi i chapo chalu bawibawichi ai kapadei nai neng khala, Israela cheng yhm dengtheungchi i chapo chalu hawi tawnbawi cho chaluchi ai kaimy i vui kavawi takhra yb bo.

¹⁸Vai ly kaimy Israela chengchi i chapo chaluchi i jeng y, Levi theaungchi ai vawi takhra nai ne,

¹⁹Israela chengchi teng i katalamra palawn iy, Aron hawi ni i chapochi teng y kaau bo. Nichi ly Israela chengchi i jeng y Tabynakora kalop sa u ai nai tla. Israela chengchi kachai sa nai meingtym sahawi tapai naimy pajengra tym y ai nai nichi my ama hai iy kry ai nai tla,” napi.

²⁰Hunai deaungkho y Mosi, Aron hawi Israela cheng bawibawichi ly ARENG my leu pei nai kamta Levi theaungchi ai au u bo.

²¹Levi theaungchi ly mychi ai mychi naimy kachai sa u i, mychi i ateaungchi pasiu u chum baly, Aron ly nichi ai ARENG teng y talam patyp nai langseaung kamta talam u bo. Nichi i vui kachai py sa pi nai ne.

²²Israela cheng bawibawichi ly Levi theaungchi i vui y Mosi teng y ARENG my leu pei nai kamta, sa pi nai ne. Naibaly Levi theaungchi py Aron hawi ni i chapochi my lu sa nai anui y Tabynakora kalopchi sa u nai ne.

²³ARENG my Mosi teng y,

²⁴“Levi theaungchi theung i saneng apom phai pangrei awm nai khumichi ly kai i awmra Tabynakora y kalop sa u iy,

²⁵saneng vui pangrei awm baly kalop sa nai anawn ai nai tla.

²⁶Kalop anawn nai bo y py nichi ly Tabynako y kalop sa nai amjo amnauchi ai sabawm pajau; na i py amy i kalop kamta amsi ai nai tlo y. Nang ly hini reita hawi kamlau Levi theaungchi ai kalop pei ai nai tla,” napi.