Read Khumi Chin MIKHA 1 Bible Online

MIKHA 1 - Khumi Chin bible

MIKHA 1

¹Juda pri y samrang Jotham, samrang Ahaz hawi samrang Hezekiachi my peang nai neng khala, ARENG ly Moresheth mary i Mikha teng y, hina nai leu pei bo. ARENG ly Samari mary hawi Jerusalem mary molam y, hini satangchi Mikha teng y thui pi nai ne.

²Khumi cheng cheaungkhangchi awi, tangai u; khaileaung pri i khumi bawibawichi awi, tangai u! Sa thai naira angym nai ARENG ly nangchi hawi y nai pany hai ai. Tangai u! Mymy ly kani pri Achura yhm mang my leu pei bo.

³ARENG ly mymy i meingtym kachai mang ang jeu kathiu iy, mawichi saleung y aleaung ai.

⁴Huna nai khala mawichi ly mai hawi avum nai phajeaungdeng kamta tlawn vui ai. Naibaly mawi salo mang dengdairei mawi anui y tui leaung nai kamta, leaunghawi mang y athui jawn ai.

⁵Israela chengchi ly kamngo sa iy Tameuh ai tiu u nai deaungkho y, hina nai kamta avum u ai. Israela chengchi my tiu nai molam y, ami ai neng hai ai mo? Samari mary pui ny y a? Juda chengchi my chiu nai asang nai meingtym ly ma mang y mo? Jerusalem mary pui ne na a!

⁶Hunai deaungkho y ARENG my, “Kai ly Samari mary ai daichi theung y mary kaphra kamta, kreip keung ui nai meingtym kamta, lawm hai ai. Kai ly mary kaphrachira i lengseaungchi ai, leaunghawi mang y adi heu vui iy, mary langdeng ai py kapatheaung phro vui ai.

⁷Mynchi ai tleu hai piupa ai. Mynchi teng y talam nai langseaung bawibawichi ai, mai leng pawn ai. Myn ngiereichi ai anyn angso lawm hai ai. Samari mary ly hinichi ai achura yhm bima kalop sa naimy nga nai ne. Naibaly paleung ka-echi ly hunichi ai takhra achura yhm bimachi i vui syn u vui ai,” napi.

⁸Naibaly Mikha my, “Huni molam y kai ly vo tangam ai. Kai ly paleung si nai sai patei ai nai phainai amchiu y, baichu amchiu y naimy amki ai. Kai ly khiva kamta a-u iy kula-iu tavo kamta tangam ai.

⁹Samari mary i tamo nga naichi ly kahawi so thai y leang. Juda pri py huna nai taham kasi avum ai. Kai i khumichi awm nai Jerusalem mary apai katheuchira y ka-jeira tym ai,” napi.

¹⁰Kath mary y awm nai paleung ka-echi teng y, achi i tavai sum nai satang ly thui pi moh. Nangchi i vo nai py nichi niu u moh sy. Beth Leaphra mary i khumichi awi,[1] paleung phra atho di nai sai amteng ai nai, spryhra y aho u.

¹¹Saphir mary i khumichi awi, tlang ka-keu naimy kangji nga u iy, langheng hawi nai avum u. Zaanan mary i khumichi ly mary angam mang y theu u vam y. Bethezela mary i khumichi vo nai raawi nangchi thai nai khala, huni mary theung y abyh ai nai ngo y, nanai pany ai.

¹²Maroth mary i khumichi ly ajijaw naimy patangra avum u bo. ARENG ly Jerusalem mary ai patangra tym hai ai bo i, kaichi mary i khumichi ly paleung ahyn thlyhthlyh naimy kasabawmra ajeng u nai ne.

¹³Lakhisa mary y awm nai khumichi awi, tavai ka-richira y keaungngochi tai u. Nangchi ly Israela khumichi i sa nai kamta kamngo sa u. Nangchi kamngo sa u nai kamta, Jerusalem mary i khumichi ai py, kamngo sa hai bo.

¹⁴Juda khumichi awi, Moresheth kath mary ai ly patlaw u su. Israela samrangchi ly Akhazi mary khumichi teng i, kasabawmra nga u ai ny y.

¹⁵Maresa mary i khumichi awi, ARENG ly nangchi i mary ai, paleung ka-echi teng y au vui ai. Israela lu sa naichi ly Adulam tapiu theung y preang iy aheu u ai.

¹⁶Juda khumichi awi, nangmychi tamen nai cho chanauchi i vui y, nangmychi i sam avau u. Nangchi i cho chanauchi ai, pri takhra mang y langheng y hawi pawn ai nai deaungkho y, nangchi i lu ly langna lu kamta, lu tabiuliu na pa-rei avau u.