Read Khumi Chin MIKHA 2 Bible Online

MIKHA 2 - Khumi Chin bible

MIKHA 2

¹Ira tleaung y aseaung iy hawi y sa ai nai dawn nai khumichi ly taham si. Khawn khutawi nai khala, nichi ly sa ai nai lam nga phai nga baly, mymychi i hawi y nai ka-dawn sa u reng nai ne.

²Nichi ly ami i yhm ai mo, li hlau ai mo, paleung no baly kamjau kamteang lawm vui reng nai ne. Amimi i py yhm hlau hawi yhmtheaung katuichi ly chymme ai nai ngo pajau y.

³Hunai deaungkho y ARENG my, “Nangchi patang naira avum ai nai kaimy sa ai. Huni patangra i nai nangchi law tleaung pajau ai ny y. Nangchi ly patang naira avum u ai. Huna nai khala nangchi ly amlyh am-e u pajau ai ny y.

⁴Huna nai neng tym nai khala y khumichi my, nangchi patang naira avum nai leaungsai molam y, thui achih jo ai. Nangchi i heng nai deung y avum nai py, hina nai paleung si paleung mawn ai hawi nai khulym thui u ai: Achi ly angchi khyp, taham si i phra phro bo! ARENG ly achi i pri ai, achi kiu i nai ang la pi veng iy, achi ai patiu nai khumichi kiu y au vui nai ne.

⁵Hunai deaungkho y hini pri ai ARENG i khumichi teng y au pi teang nai khala y, nangchi theung i amimi py, khaileaung phy nga ai ny y.

⁶Khumichi my, “Kaichi teng y leu thui pi moh, huni satangchi thui moh, Tameuh ly kaichi teng y kangji kangai hawi taham si naira tym hai ai ny y leang.

⁷Israela chengchi ly amsawi lawi bo, nanai athang khai a? ARENG ly neaung kham pajau na bo a? Mymy ly huna nai sa takengkei ai bo a? Kahawi sa nai khumichi teng y, mymy ly kapahen leu thui pi ai ny y a?,” nanai kai teng y thui u ali teang bo.

⁸Huna nai khala ARENG my, “Nangchi ly kai i khumichi ai paleung ka-e palawn iy tiu u. Tavai keung i dengdairei yhm mang y chymme naimy vawi nai khumichi i salo baichuchi ai, nangchi my leng u vui bo.

⁹Nangchi ly kai i khumichi i neampachychi ai, mychi khrei nai yhm i dengdairei patheu u iy, mychi i cho chanauchi mo mang y hawi ai athang khai nai amtheaung nairachi phra hai bo.

¹⁰Angthau ly tako u; hini pri ly nangchi i vui chymme naira meingtym ny y leang bo. Nangchi i kamngo nai molam y hini pri ly phra bo.

¹¹“Nangchi theung y kreip hang hawi rah neangneang awm ai, nanai li-tapawp reng nai amochi ai, hini khumichi ly ngai u nai ne.

¹²“Kai ly nangchi theung y awm rai nai Israela cheng bawibawichi ai pangym ai. Hai theung y vawi ali teang nai beram kamta, nangchi ai kapangym ai. Sui tlai naira y beram neangneang angym iy, teicha tlai nai kamta, nangchi i pri y khumi neangneang awm u teang ai,” nanai pathang pi teang bo.

¹³Nichi ai pri palara i nai lawi teang ai nai, Tameuh kypkyp my lam patei pi ai. Nichi ly mary apai katheuchi taphra vui iy, tleaung u ai. Nichi i samrang, ARENG mymy kypkyp ly nichi ai pahawi ai.