Read Khumi Chin MIKHA 6 Bible Online

MIKHA 6 - Khumi Chin bible

MIKHA 6

¹Israela chengchi ai ARENG i thui tamawn nai leu pei nai tangai u. Aw ARENG, ang thau ly nang i thui tamawn nai thui pi ba. Nang i leu pei nai ly mawi hawi mawi aheungchi thai u na sy.

²Khaileaung y khaw hai nai sangum langdeng mawichi awi, ARENG i leu pei nai tangai u! ARENG ly mymy i khumichi teng y thui tamawn ai nai awm nai ne. Mymy ly Israela chengchi ai thui tamawn ai nai leu ka-rum awm.

³ARENG my, “Kai i khumichi awi, nangchi ly hina tanrei sa tamang u a? Nangchi i tlang tleaung y kai ati kang sa mo? Kai ai pathang pi u.

⁴Kai ly nangchi ai Aikupta pri i dengdairei kang pahawi iy miseaung i nai atleu pi bo. Nangchi ai lam patei ai nai Mosi, Aron hawi Miriamchi ai kang pato pi nai ne.

⁵Kai i khumichi awi, Moba samrang Balak my, nangchi phra tleaung phra ra ai nai mana dawn mo, nanai py, Bera i chapo Balam my samrang teng y ati mana thui pi mo, nanai py, pany u jo. Akasia taira i dengdairei, Kilakala mary mang chei nai lam y avum nai leaungsaichi pany u jo baly, ARENG ly nangchi ai ati mana atleu pi mo, nanai nangchi pany u ai,” napi.

⁶Kani pri mang y awm nai ARENG Tameuh teng y chiu sa ai nai jeu nai khala y, kai ly ati kapathypra syn ai mo? Veung hawi nai si cho ai leng patlum ai nai kasyn ai a?

⁷Kai ly beram sang neangneangchi ai py, olive asitui tavo leaung na pa-rei py, kasyn baly ARENG my kawn pi na a? Kai i kamngo lawi ai nai nang teng y kai i chapo chalu talam ai a?

⁸ARENG ly hawi naira patei pi. Mymy i aly ngai naichi thui pi bo. Mymy i aly ngai nai ly leu meitang adyh adawi naimy sa nai, tamen naira awm nai, paleung apanem naimy, nang i Tameuh hawi vanrei awm naichi ne.

⁹ARENG ai jei kaji nai khumi ly khumi kacheng ne. Mymy ly mary y hina nai kamta thui pi bo. “Mary theung awm achu nai khumi bawibawichi awi, tangai u!

¹⁰Khumi hawi y naichi i yhmchira y, teng y nai kalop hawi nga nai vawnsaichi awm. Nichi ly teng y nai sie khyrychi teaung u bo. Huni teng y nai sie khyrychi ai kai ly niu ngai nai ne.

¹¹Teng y nai sie khyry teaung nai khumichi ai, kai ly mana pahen thai ai mo?

¹²Yhmtheaung katui nang nai khumichi ly khumi kamawnchi tlang tleaung y thi pajawp u bo. Nangchi bawibawi ly tapawp nai khumichi ne.

¹³Hunai deaungkho y kai ly nangchi i kamngo nai molam y, vaimy nangchi ai pajeng iy phra hai ai; leu ka-chawi katheu u bo.

¹⁴Nangchi ly teicha teinei cha teu i py, kajeu kawi u ai ny y; alam naimy awm u jojo ai. Nangchi i ko nai yhmtheaung katuichi pateung u pajau ai ny y. Pateung achu nai yhmtheaung katuichi ai py, tavai takai hawi taphra vui ai.

¹⁵Nangchi ly amti amjang pati u i py, pateung achu ai nai ngo y ai. Nangchi ly olive asitui nip i py, cha ai nai ngo y ai. Kreip athai ati i py, kreip hang nei ai nai nga ai ny y.

¹⁶Nangchi ly samrang Omari hawi, ni i chapo samrang Ahab nini i hawi y sa nai nithun abang u nai deaungkho y, huni phra naira avum u ai. Khumi lutengchi[2] my nangchi ai thui tamawn u ai. Khumi cheaungkhangchi ly nangchi ai panui hai ai,” napi.