Read Khumi Chin NAHUM 1 Bible Online

NAHUM 1 - Khumi Chin bible

NAHUM 1

¹Hini ly Ninevi mary molam y pany hai nai ne i, Elakosa avang i Nahum my paleung mei y niu nai satangchi ne.

²ARENG Tameuh ly mymy ai ka-keng ka-awi sa naichi ai kham pi ai ny y; mymy ly ka-awi sa nai khumichi ai pajeng nai ne. Kado theu iy nichi i tlang tleaung y vawitheung tha bo.

³ARENG ly kado theu praw vai y leang; na i py mymy ly sa thai naira awm iy kamngo awm nai khumichi ai pajeng y naimy mana khala py khai su y leang. ARENG i chei naira tleirei y, ali kamchai theu reng; khupanymchi ly mymy kheu anui i spryhchi ne.

⁴Mymy ly pangli ai leu pei nai khala y, pangli tui ly kang vui na! Mymy ly tavochi ai py tui kang hai vui bo. Basan mawi ly jeirawm iy Karamela mawi ly a-au jawn bo. Lebanon mawi i kaseaung pauchi py rawm veng bo.

⁵ARENG i mo y mawi puichi ly ahyn iy, mawi katheangchi ly tlawn pawn ai. ARENG jeu nai khala kaleih theu iy, khaileaung pri hawi vanrei, khaileaung pri i khumi bawibawichi ly jei hyn u bo.

⁶Mymy kado theu nai khala, ami kham pajau ai mo? Mymy i ka-jei awm nai kado theu nai haiho ly ami kham pajau ai mo? Mymy ly mai theu nanai kado theu nai ai lei nai deaungkho y, mymy mo i lengseaungchi ly dei lawm na bo.

⁷ARENG ly hawi, mymy i khumichi patang naira avum nai khala, ama hai bo. Mymy teng y abyh nai khumichi ai kry.

⁸Mymy ly khri pa-rei ho nai tavo tui kamta, paleung ka-echi ai phra hai. Mymy ai ka-awi sa nai khumichi ai, dei khora y tha nai ne.

⁹Nang ly ARENG ai ka-awi sa iy, ati sa ai nai dawn mo? Mymy ly nang ai taphra ai. Ami py mymy ai tlenrei bo baly ka-awi so pajau y leang.

¹⁰Nang ly kabeng aleng, acha kajei kamta, pavui nai khumi ai ly mai my kang vui ai!

¹¹Aw Ninevi mary awi, ka-dawn cheaungkhangchi hawi ARENG ai hawi y sa ai nai khumi leaungrei ly nang theung i nai amthawn bo.

¹²ARENG ly mymy i khumi Israela chengchi teng y, “Asuria chengchi ly atho ham iy, vuikanai nawi teu i py, taphra naira avum u iy tama u ai. Aw kai i khumichi awi, kai ly nangchi ai patang naira avum hai teu i py, mo mang y ly huna nai kamta kaso bi y ai.

¹³Nangchi ai Asuria prichi kiu i nai law tleaung hai ai. Nangchi ai pakheng nai sengkrychi tameang pawn ai,” napi.

¹⁴ARENG ly Asuria chengchi molam y, “Khumichi ly huni khumichi ai tami veng ai. Nichi i achura yhmchira y awm nai mynchi ai kaimy taphra ai. Kai ly Asuria chengchi i vui tapreaung sa pi rym ai. Nichi ly heng ai ataing nai khumichi ny y! " napi.

¹⁵Khen cham, satang kahawi syn nai khumi savai ly mawichi tako prei bo. Ni ly eaung nai satang thai hai ai nai jeu nai ne. Aw Juda khumichi awi, nangmychi i reita pawi so u. Tameuh teng y talam u. Khumi hawi y naichi ly nangchi i pri y ang jeu u bi ai ny y. Nichi ly angchi khyp, tama u pawn veng bo.