Read Khumi Chin NAHUM 2 Bible Online

NAHUM 2 - Khumi Chin bible

NAHUM 2

¹Aw Ninevi mary, paleung ka-e ly nang ai ang tiu bo! Nang ai tamyh ai nai khumi ly ang tym bo. Nang i amtangrachi ai hawihai lu so! Lam y tamcheaung khai! Atiu ai nai angveirym!

²(ARENG ly Israela chengchi ai paleung ka-echi my tiu y rai khala i awm nai kamta, awm ali teang nai neng tym hai ai.)

³Paleung ka-e risachi ly khupui kamsenchi syn iy atawm riri nai ateaung kamsenchi amchiu u. Nichi ly atiu ai nai angvei u rym bo! Nichi i tavai keaungngo ka-richi ly mai kadeu kamta angveaung na! Nichi i keaungngochi[1]ly achaw lengleang na!

⁴Tavai keaungngo ka-richi ly amli hai kaliki iy, khumichi amkheng nai meingtymra y, amli kathiu, amli kalau u bo. Hunichi ly maiteaung kamta angvang phang na i, amlosadi theu nai kamta rang parai na.

⁵Tavai lu arengchi ai palau nai khala, nichi ly pathuikhe i, atlymvi naimy mo mang y amsa u bo. Atiu nai keungchi ly mary apai mang y angpreng kaliki i, khopuichi adang iy amtangrachi panawi ai nai tamtleang puichi tai u.

⁶Tavo sahawi i mary apai katheuchi ly vaimy am-eaung fau veng bo; samrang yhm theung y py, jei nai paleung kawi na.

⁷Samrangnu ai ly patiu veng bo; ni i aheaung apaichi ly buhuchi kamta, vo tangam u. Nichi ly paleung si nai deaungkho y, mymychi i paleung y atum u ryry bo.

⁸Tui kam-eng leaung fau nai tui kamta, khumichi ly Ninevi mary i dengdairei, athorei my preang u bo! Nichi ai, Anawn! Anawn!” nanai aeu bo; na i py khen alengli teang y.

⁹Tangka lawm u! Muku lawm u! Hini mary ly yhmtheaung katui nang nai mary ne na a!

¹⁰Ninevi mary ly phra veng bo; khumi angso by y, savai tlang na bo! Khumichi ly khri pa-rei jei nai deaungkho y, paleung pakawi angto y vi na, kheukhu anghyn naimy, atho bai u na. Nichi i meimaira py, thi by y na bo.

¹¹Khrangsichi aeung nai tapiu, khrangsi chochi ai teicha pacho nai meingtym, khrangsi katheang kalenchi chymme naimy awm ai nai abyhra meingtym hawi atawm nai mary ly vai, ma mang y awm mo?

¹²Khrangsi ly mawi kei chum baly khrangsinu hawi chochi i vui, keibaw keibaw iy, huni mawi akawichi hawi, mawi tapiu y kawi mang hai reng nai ne.

¹³Ati cheaungkhang sa thai nai ARENG my, “Kai ly nang i paleung ka-e ne. Nang i ka-richi mai y leng pawn ai. Nang i tavaimi risachi ly tavai keung y dei u ai. Amichi teng i nangchi my lawm vui nai vawnsai ngiereichi ai, kaimy taphra vui ai. Nang i savaichi hnei nai raawi thai u ai ny y leang bo,” napi.