Read Khumi Chin ZEPHANIAH 1 Bible Online

ZEPHANIAH 1 - Khumi Chin bible

ZEPHANIAH 1

¹Hini leu pei nai ly Ammon i chapo Juda samrang Josia deung y, Zephaniah teng y pei nai leu ne. (Zephaniah ly samrang Hezakia kangpreang Amariah, Kedalia hawi Kushi dengdairei kangpreang ne.)

²ARENG my, “Kai ly khumichi, tawnbawichi, tavochi hawi ngochi py takhawi y, khaileaung pri y awm nai ngiereichi tamyh pawn ai. Khumi hawi y naichi ai atlym hai ai.[1] Khumi bawibawichi ai kaimy taphra ai. Dei y naimy leaungrei py tleaung ai ny y. Hini ly kai, ARENG my kang thui pi nai leu ne.

⁴“Kai ly Jerusalem mary hawi Juda pri y awm nai khumi bawibawichi ai katamyh ai. Huni meingtym y Bala tameuh ai chiu nai sai kataphra be ai i, amimi py huni tameuh teng y kalop sa nai pathyp pi nai keungchi ai pany jo ai ny y.

⁵Yhm amphu salo y lyn iy kanito, lo, ka-si taukichi ai chiu nai ngiereichi ai, kaimy taphra pawn ai. Kai ai chiu naimy ka-ym awm ai mang, nanai vaineng abeu chum iy Mole amyn y vaineng abeu nai khumichi ai py, katamyh pawn ai.

⁶Kai i nithun y abang y naimy, amphri vui nai khumichi ai py, kai teng y ahihawi y, kai i lam patei nai ai hnei y nai khumichi ai py, kaimy tamyh pawn ai,” napi.

⁷ARENG my tara chih ai nai neng ly ang tym ai bo. Hunai deaungkho y mymy i mo y chymme naimy awm u. ARENG ly mymy i khumichi ai pathyp ai nai angveirym i, Judachi ai lawm ai nai, paleung ka-echi ai palau bo.

⁸ARENG my, “Huna nai apathyp ai nai neng kani tym nai khala y, samrang i bangtangchi, samrang i chapochi hawi cheng takhrachi i reita teaung nai khumichi ai pajeng ai.

⁹Myn y chiu nai khumichi kamta sa naichi ai py, mychi i yhmkeung yhm[2]y lawm nai vawnsaichi nga angym hai ai nai molam, khumichi ai padei naichi ai py, kaimy tamyh pawn ai,” napi.

¹⁰ARENG my, “Huni neng kani y Jerusalem mary ngo apai katheu pa-khora y vo nai raawi thai u ai. Mary kangtha mang y khumichi vo nai raawi py, mawi aheungchira y phra nai katynchi py thai u ai.

¹¹Mary ka-nem mang y awm nai khumichi awi, hini satangchi thai nai khala vo u. Ati mana nai mo na baly ka-sum ka-pai kalen sa nai khumichi ly dei u ai.

¹²“Huni neng khala y kai ly maisi yhm syn iy, Jerusalem mary theung y hau ai. ‘ARENG ly hawi nai, hawi y nai, ati sai py so vai y,’ nanai athang khai iy thui nai khumichi, amychi ai tahm apasang iy paleung tienem naichi ai, kai ly pajeng ai.

¹³Khumi takhrachi ly huni khumichi i yhmtheaung katuichi lawm iy, nichi i yhmchi taphra u ai. Nichi ly mychi sa nai yhmchira y, mana khala py awm ai nai nga u ai ny y. Mychi i ui nai kreip akhochira i kreip hang py, nei ai nai nga u ai ny y,” napi.

¹⁴ARENG my tara chih ai nai kani kalen ly kasa bo i, kasa tleaung kasa ra bo. Huni neng kani ly tym kasa ai! Huni kani ly hawi y keh nai deaungkho y, sorai paleung awm keh nai risa malawn py, paleung phra naimy aeu ai.

¹⁵Huni kani ly kado theu keh nai kani, ngari kamtang hawi paleung bi nai kani, phra seaungkhrang iy tama pawn nai kani, khri pa-rei veng cheng iy khupanym tho parai nai kani,

¹⁶amtangra marychi, asang parai nai lengseaung yhmchi ai tiu nai, risachi i baw eng nai katynchi, aeu nai raawichi hawi amsau nanai kani ne.

¹⁷ARENG my, “Kai ly khumichi tlang tleaung y khri pa-rei patang naira tym hai ai i, khumi luteng ly mei kamju kamta kaveng theung y patham mengmang iy tako u ai nai tla ai. Nichi ly kai i tlang tleaung y kamngo sa u bo. Naibaly kai ly nichi i thi ai tui kamta lai vui ai. Nichi i veuchi py khaileaung salo y veaung tlawn naimy awm ai,” napi.

¹⁸ARENG i kado theu nai huni kani y, huni khumichi ly mychi i muku tangka awm nai ngierei pei u teu i py, tlang atleu u pajau ai ny y. Khaileaung pri verei ly mymy i kado theu nai mai y kang i, phra be ai. Mymy ly khaileaung pri y awm nai ngiereichi ai, vaimy myh pawn na pa-rei tara chih ai.