Read Khumi Chin ZEPHANIAH 2 Bible Online

ZEPHANIAH 2 - Khumi Chin bible

ZEPHANIAH 2

¹Aw kangji by y nai khumi chengchi awi, choh ali ai ali my hm vui nai neng tym y rai khala, nangchi i tlang tleaung y ARENG i kado theu nai tym y rai khala, mymy i kado theu nai neng tym y rai khala, paleung amtlau u.

³Mymy i leu pei naichi tangai iy, paleung apanem nai khumi mipuichi awi, ARENG teng y jeu u. Kahawi sa naimy ARENG i mo y paleung apanem u. ARENG i kado theu nai neng khala, nangchi ly pajeng naira i nai law tleaung naira nga u lym ai.

⁴Kaza mary theung y khumi leaungrei py awm ai ny y. Asakelon mary ly khumi angso savai tlang nai meingtym lawm ai. Asadod mary i khumichi ly kani khurei my paryh nai avum u i, Ekron mary i khumichi ly huni mary i dengdairei, preang u ai nai tla ai.

⁵Pangli peang jeungrei y awm nai Philistia khumichi awi, pangli peang jeungrei y awm nai Kherati khumichi awi, nangchi ly taham si. ARENG ly nangchi ai kamngo vang ang pajeng bo. Mymy ly nangchi ai tamyh ai nai deaungkho y, nangchi leaungrei py awm ai ny y.

⁶Pangli sahawi i nangchi i pri ly beram typ naichi i tai hawi beramchi sui tlai naira meingtym lawm vui ai.

⁷Dei kamthum Juda khumichi ly nangchi i pri peang vui ai. Nichi ly huni meingtym y beram kanghuchi typ naimy, Asakelon mary i yhmchira y i u ai. Nichi i ARENG Tameuh ly nichi hawi vanrei awm iy, nichi ai kahawi palum teang ai.

⁸Ati cheaungkhang sa thai nai keung ARENG Tameuh my, “Moba khumichi hawi Ammon khumichi ly kai i khumichi ai ka-jo hau u nai py, nichi i pri peang vui ai, nanai amlyh nai py, kai thai nai ne.

⁹Kai ly meitang khyp, Israela chengchi i, heng nai ARENG Tameuh ne nai kamta, Moba pri hawi Ammon pri ly Sodom hawi Komora marychi kamta, taphra naira avum ai, nanai vaineng abeu bo. Huni prichi ly palawi tai nai meingtym lawm i, deungtasarei phra iy acha keungchi kawi biu ai. Kai i khumichi theung i dei kamthumchi ly huni khumichi ai tiu iy, nichi i pri peang vui ai.”

¹⁰Huna nai kamta Moba hawi Ammon khumichi ly mymychi i paleung len nai, amlyh am-e nai hawi ati cheaungkhang sa thai nai ARENG i khumichi ai, mei aniu y nai molam y pajeng naira avum u ai.

¹¹ARENG ly nichi ai kaso theu hai ai. Mymy ly khaileaung pri y awm nai tameuhchi ai tama hai ai i, khumi cheng cheaungkhangchi ly mymychi i pri tleitleirei y, mymy ai chiu u ai.

¹²ARENG ly Ethiopia khumichi ai py padei ai.

¹³ARENG ly kiu pheu iy sa thai naira hawi, Asuria pri taphra ai. Mymy ly Ninevi mary y, tui by y nai daichi ka-vym kamta, khumi angso savai tlang nai mary kaphra lawm hai ai.

¹⁴Huni meingtym ly beram kanghu hawi amso tawnbawi cheaungkhangchi anawnra lawm ai. Beaungkuchi ly yhm kaphrachira y awm iy, thaibeng pa-khochi mang hang ai. O-achi py khailei kheupora y chym iy hang ai. Huni maryra y awm nai yhmchira i saitleang keungchi ai py, khumichi my la u pawn ai.

¹⁵Hini ly amymy ai sa thai naira awm bo, nanai py, chymme naira awm bo, nanai py, athang khai nai mary i avum ai nai khym taham ne. Huni mary i khumichi ly mymychi i mary ai, khaileaung pri y len keh, nanai athang khai u bo. Huni mary ly daichi tawnbawichi anawnra lawm iy, mana tanrei khumi angso savai tlang na ai mo? Huni sahawi mang tako nai khumi bawibawichi ly athengra iy, nithun mang y anaw u vui na ai.