Read Khumi Chin HAKAI 2 Bible Online

HAKAI 2 - Khumi Chin bible

HAKAI 2

¹ARENG ly huni saneng saryh lo, kani apom phai harei kani y, amo Hakai dengdairei, mymy i leu pei nai ly

²mymy ly Hakai ai hina nai thui hai bo. Mymy ly nang ly Juda samrang i bangtang kalen Jerubabela, pathyp pi nai keung kalen keh Josua hawi huni bo i mipuichi teng y,

³“Vaichi khala i Achura yhm ly mana tanrei apu parai na mo, nanai pany nai khumi nangchi theung y awm a? Vai ly hini Achura yhm ai, nangchi ati mana niu u mo? Huni ly ati sai py ny y nai kamta lawm ai.

⁴Na i py aw mipuichi awi, paleung atho di u mo? Kai ly nangchi hawi vanrei awm nai ne iy, nangmychi sa ai awm nai kalop naini, nangchi so u.

⁵Aikupta pri i dengdairei nangchi vawi u nai khala y, kai ly nangchi hawi vanrei awm jo ai, nanai adeu nai kamta, vai khrairei nangchi hawi vanrei kai awm; hunai deaungkho y jei u moh.

⁶“Kai ly kra y naimy kani khusang hawi khaileaung ai py, kacheng hawi pangli ai py, amchyh hai bo.

⁷Khumi cheng cheaungkhangchi ai taphra pawn ai. Huni khumichi i muku tangka, yhmtheaungchi ai, hini meingtym y khumichi ai syn hai ai. Achura yhm py muku tangka, yhmtheaungchi hawi kawi naimy awm ai, nanai ati cheaungkhang sa thai nai ARENG my leu pei bo.

⁸Khaileaung pri y awm nai ngierei, muku tangkachi ly kai i ne.

⁹Achura yhm kangtha ly Achura yhm kangngym tleaung y apu keh ai. Huni meingtym y kai ly kaimy i khumichi ai nang chawn hai iy, tlamsa naira pei ai, napi. Hini ly ati cheaungkhang sa thai nai ARENG my thui nai leu ne.

¹⁰Empara samrang Dari i peang nai pa-nyh saneng, takawrei lo, kani apom phai palyhrei kani y, ati cheaungkhang sa thai nai ARENG i leu ly Hakai teng y tym bi bo.

¹¹Mymy ly “Khumi leaungrei ly Tameuh teng y talam chum nai mawi ai, my i ateaung hawi tapau iy, kreip hang, olive asitui, ti y baly mani mo teicha teinei py ne sy, ateaung hawi abi lawh baly, huni teicha teinei ly katalamra teicha teinei lawm vui ai mo, lawm vui y mo, nanai reita leu pei nai kamta, leu pacheang pi ai nai pathyp pi nai keungchi teng y deng,” napi. Huni molam deng nai khala, pathyp pi nai keungchi my, “Huni teicha teineichi ly katalamra teicha teinei lawn y leang,” nanai pathang u bo.

¹³Naibaly Hakai my, khumi leaung leaungrei ly khumi tlaiveu ai abi nai deaungkho y, chai y tapi rai. Naibaly ni ly huni teicha teineichi ai abi lawh teu baly, hunichi py chai y vui ai a? nanai deng. Pathyp pi nai keungchi my, “Hunichi ly chai y ai,” napi u.

¹⁴Naibaly Hakai my, “Hunai kamta teang, hini pri i khumichi hawi nichi i sa nai leaungsaichi ly chai y nai deaungkho y, maicham salo y talam nai kapathypra ngierei py chai y, nanai ARENG my leu pei bo,” napi.

¹⁵ARENG my, “Nangchi ly nangmychi avum nai leaungsai ai niu u y nai sai a? Achura yhm so y rai khala,

¹⁶nangchi ly chohpui chomaw teaung chungvai nyhrei awm ai nai athang khai nai ly teaung chungvairei naini awm khyh na a. Kreip hang palang chungvai atlo apom phai pangrei nga ai nanai thui u iy, kreip hang khai nai chy-y pui y khen nai khala, palang vuipangrei niu khyh na a.

¹⁷Kai ly nangchi atho sa iy pati nai amti amjang ngiereichi ai ali kabi hawi py, kaleung my cha iy jeirawm hai nai py, ji amai hawi py taphra bo. Na i py nangchi uikheih u y.

¹⁸Vaini ly Achura yhm sangum langdeng pala chum nai kani, takawrei lo, kani apom phai palyhrei kani ne. Huni kani dengdairei mo mang y ati tym ai mo, nanai nangchi khen u.

¹⁹Nangchi teng y chohpui chomaw by y bo i, kreip keungchi, thaidu keungchi hawi olive keungchi py athai y leang rai. Na i py kai ly vai i dengdairei, nangchi ai amtheaung naira pei ai,” napi.

²⁰Huni lo kani apom phai palyhrei kani y my, tlen pa-nyh ARENG i leu ly Hakai teng y,

²¹Juda samrang i bangtang kalen Zarubabela i vui mymy ly “Kai ly kani khusang hawi khaileaung amchyh hai i,

²²pri bawibawichi ai taphra iy, nichi i sa thai naira jum hai ai. Tavai keaungngo ka-richi atang nai keungchi hawi vanrei akhum hai meuh ai; keaungngochi ly dei ai. Keaungngo atang nai risachi py, mychi tengtawi atleh u ai.

²³Kai i miseaung tatang Zerubabela awi, huni kani y kai ly nang ai kang la ai i, kai i jeng y peang hai ai. Nang ly kaimy vawi takhra nai khumi ne,” napi bo. Hini ly ati cheaungkhang sa thai nai ARENG my thui nai leu ne.