Read Khumi Chin ZEKHARIAH 1 Bible Online

ZEKHARIAH 1 - Khumi Chin bible

ZEKHARIAH 1

¹Hini leu ly Pasia empara samrang Dari my peang nai pa-nyh saneng, tajarei lo theung y ARENG my amo Zekhariah teng y pei nai leu ne. Zekhariah ly Iddo i katu, Berekhia i chapo ne.

²Ati cheaungkhang sa thai nai ARENG my Zekhariah teng y, “Kai, ARENG ly nangchi i amsi pajochi ai, khri pa-rei kado theu hai bo.

³Na i py vai nangchi ly kai teng y vawi u ali teang; kai py nangchi teng y kang jeu ai.

⁴Nangchi ly nangmychi i amsi pajochi kamta so u moh. Jangni khala i amochi ly nichi teng y hawi y nai saichi anawn u ai nai thui pi teu i py, nichi ly tangai y, dawn dan u y.

⁵Huni amochi hawi nangchi i amsi pajochi ly dei u be veng bo.

⁶Kai ly kaimy i amochi dengdairei, nangchi i amsi pajochi teng y leu pei naichi hawi pany hai nai leuchi kapei pi nai ne. Na i py nichi ly kai i leu ai dawndan u y nai deaungkho y, avo nai kamta pajeng naira avum u. Huna nai khala nichi ly uikheih u. Ati cheaungkhang sa thai nai kai, ARENG ly kaimy i dawn yb nai kamta, nichi ai kamngo vang kamlau parip nai ne, nanai py pany u ai,” nanai nichi teng y thui pi ai nai leu pei nai ne.

⁷Empara samrang Dari i peang nai pa-nyh saneng, Shebet lo napi nai lo holai ha, kani apom phai palyhrei kani y, ARENG ly vum y kai teng paleung mei y amteng pi bo.

⁸Kai ly keaungngo kamsen atang nai khumi leaungrei ai kaniu bo. Ni ly leaunghawi theung y awm nai muratu keungchi sala y angdo naimy awm. Ni i nithun y ly keaungngo kamsen, keaungngo kariura hawi keaungngo kangleung awm.

⁹Kaimy ni teng y, “Areng awi, hini keaungngochi i awm nai sai ly ati mo?,” napi. Ni my, “Nichi ly ati mo, nanai kaimy thui pi ai.

¹⁰ARENG ly khaileaung pri y khen ai nai nichi ai pato nai ne,” nanai pathang.

¹¹Keaungngo atang naichi my kani pri amtaw thau nai teng y, “Kaichi ly khaileaung pri verei y amki be veng bo. Khaileaung pri verei ly jeaungmang iy sabawmra by y nai kaniu u,” nanai amti pi.

¹²Naibaly kani pri amtaw thau nai my, “Aw ati cheaungkhang sa thai nai ARENG, Jerusalem mary hawi Juda marychi ai nang i kado theu nai ly saneng vui saryhrei awm bo; huni marychi ai pahen y naimy, mana tanrei awm jo ai mo?,” napi.

¹³ARENG ly kani pri amtaw thau nai teng y paleung pahawi nai leuchi thui pi nai deaungkho y,

¹⁴kani pri amtaw thau naimy py kai teng y, “Ati cheaungkhang sa thai nai ARENG my, kai ly chai parai nai Jerusalem mary pui ai khri pa-rei tamen iy kapahen nai ne.

¹⁵Kai ly kaimy i khumichi tlang tleaung y tym ai nai kado theu nai kam-yh nai thym y, tlamsa naimy awm ai nga u nai khumi bawibawichi ly kai i khumichi avum nai ngari kamtang panawi ra bo. Naibaly kai ly huni khumichi ai khri pa-rei kado theu hai nai deaungkho y,

¹⁶Jerusalem mary ai pahen nai sai patei ai nai, kavawi ali teang nai ne. Kai i Achura yhm sa palum teang iy, Jerusalem mary pui ai py, sa palum u teang ai nai tla ai,” napi.

¹⁷Kani pri amtaw thau naimy kai teng y, “Ati cheaungkhang sa thai nai ARENG ly mymy i marychi bi-ai ali teang ai nanai py, mymy ly ang jeu ali teang ai i Jerusalem mary ai sabawm iy, mymy i peang nai mary pui palawn vui ai nanai py, amthang hai ba,” nanai ang thui pi bo.

¹⁸Kai ly takhra paleung mei y niu nai hareira y, si taki palyhrei kaniu.

¹⁹Kai ly kaimy hawi vanrei leu arum nai kani pri amtaw thau nai teng y, “Hini taki palyhrei i awm nai sai ly ati mo?,” nanai kadeng cham bo. Huni kani pri amtaw thau nai my, “Huni takichi ly Juda khumi, Israela khumi hawi Jerusalem mary i khumichi ai ahei hai phro nai khaileaung pri i sa thai naira awm nai khumichi ai pata nai ne,” napi.

²⁰Naibaly ARENG ly kai ai, sakichi syn iy kalop sa nai khumi leaung palyhreichi ai patei.

²¹Kai my, “Hini khumichi ly ati sa ai nai jeu u nai mo?,” kanapi. Nimy, “Nichi ly Juda chengchi ai ahei hai iy, tamyh be pawn nai khumichi ai kaso theu hai iy tiu pajau vui ai nai ang jeu u nai ne,” napi.