Read Khumi Chin ZEKHARIAH 12 Bible Online

ZEKHARIAH 12 - Khumi Chin bible

ZEKHARIAH 12

¹Hini leu pei nai ly Israela chengchi i vui ARENG teng i tym nai leu ne. kani khusang ai khiu iy khaileaung ai sa chum baly, khumi angsochi ai hengra pei nai keung ARENG my leu pei nai ly

²“Kai ly Jerusalem mary ai kreip hang khau lawm hai ai. Mary tengpang sahawi i khumi cheng cheaungkhangchi ly huni kreip hang nei iy nei cha ala naichi kamta, atlym u khikha ai. Nichi ly Jerusalem mary ai katanmeuh iy tiu u nai khala, takhra Juda marychi py, katanmeuh naira avum ai.

³Na i py huni neng khala y kai ly Jerusalem mary ai, ji parai nai lengseaung pui kamta lawm hai ai. Huni lengseaung pui ai atho sa iy kateang nai khumichi ly no nga u ai. Khaileaung pri y awm nai khumi cheaungkhangchi ly huni mary ai katanmeuh iy tiu u ai.

⁴Huna nai khala kai ly huni khumichi i keaungngochi ai, kapajei iy keaungngo atang nai risachi ai pathu hai ai. Juda khumichi ai kaimy kry ai. Paleung ka-echi i keaungngochi ai ly mei paju hai ai.

⁵Naibaly ati cheaungkhang sa thai nai ARENG Tameuh ly ‘Jerusalem mary y awm nai mymy i khumichi ai atho pei bo, nanai Juda nupaichi ly mychi tengtawi katheu u ai.’

⁶“Naibaly kai ly Juda nupaichi ai, kangmaru mai kamta py, choh myn jawn nai hlau y kang nai mai kamta py lawm hai ai. Nichi ly mychi tengpang sahawi i awm nai khumi cheng bawibawichi ai tamyh u pawn ai. Jerusalem mary i khumichi ly mychi i mary theung y chymme naimy awm u ai.

⁷“Kai, ARENG ly Juda tavaimichi ai eaung naira pei manme ai. Hinai kamta Davida i katu chanauchi hawi, Jerusalem mary i khumichi nga ai nai tahm awm nai ly takhra Juda chengchi i tahm awm nai tleaung y asang ai ny y.

⁸Huni neng khala Jerusalem mary y awm nai khumichi ai, ARENG ly kry ai. Hunaibaly nichi theung i atho di keh naichi malawn py, Davida kamta atho ham ai. Davida i katu chanauchi ly kani pri i amtaw thau nai kamta py, Tameuh mymy kypkyp py, nichi ai lu sa iy pahawi ai.

⁹Naibaly kai ly Jerusalem mary y tiu nai khumi ngiereichi ai tamyh pawn ai.

¹⁰“Kai ly Davida i kangpreangchi hawi Jerusalem mary i takhra khumichi ai pahen ai nai phailo, chiu sa ai kawp nai phailo hawi angym hai ai. Nichi ly mychi i haisau hawi thun iy padei nai khumi ai khen iy, chapo leaungrei awm khyh nai i vui y vo tangam nai kamta, huni khumi i vui vo tangam u ai. Nichi ly chapo chalu dei nai khumichi kamta, khri pa-rei vo tangam u ai.

¹¹Huna nai khala Jerusalem mary y vo tangam nai ly Mekido adym y Hadad Rimon mary i vui vo tangam nai kamta, khri pa-rei atawm ai.

¹²Huni pri theung y awm nai yhm dengtheung tleitleireichi ly vo tangam u ai. Samrang Davida i kangpreang yhm dengtheung, Nathan i kangpreang yhm dengtheung, Levi kangpreang yhm dengtheung, Shimei i kangpreang yhm dengtheung, takhra yhm dengtheungchi napi nai, huni pri y awm nai yhm dengtheungchi ly paleung si vo tangam u akyhkyh ai. Yhm dengtheung ha hareichira y py, neampachochi takhra, neampachychi takhra vo u ai.