Read Khumi Chin ZEKHARIAH 13 Bible Online

ZEKHARIAH 13 - Khumi Chin bible

ZEKHARIAH 13

¹Ati cheaungkhang sa thai nai ARENG my, “Huni neng tym nai khala Davida i katu chanau kangpreangchi hawi, Jerusalem mary i khumichi teng y, mychi i kamngo hawi myn y chiu naira i nai chai hai ai nai, tui kho am-eaung ai.

²Huna nai khala kai ly hini pri y awm nai mynchi amyn taphra vui ai i, hunichi ai mo mang y ami py pany u ali bi ai ny y. Amymy ai amo ne, nanai thui nai ngiereichi ai, kaimy tama hai vui ai. Myn y chiu ai ngai nai paleung ka-dawn ai py taphra vui ai.

³Naibaly amimi py ne sy, amo leu thui veangveang nai khumi awm rai baly, ni i amhm ampochi ly ni teng y, nang ly ARENG i leu thui pi pateang nai ne i py, ka-chawi leu naini teaung nai deaungkho y, deira avum ai, nanai thui iy huni khumi thui nai thym khala y my, ni i amhm ampo ly ni ai haisau hawi thun iy padei ai.

⁴Huni neng tym nai khala, mani mo amo py, my i paleung mei y niu nai molam y am-e ai ny y. Amimi py amo i sa nai kamta sa ai ny y; li-tapawp ai nai molam y amo i ateaung py amthyp ai ny y.

⁵Huna nai kamta sa ai nai jeng y, ‘Kai ly amo ny y leang, hlau kalop sa nai ne i, kaimy deungrei hlau kasa nai teu,’ nanai thui ai.

⁶Naibaly khumi leaung leaungrei my, ‘Nang i tangtaang y awm nai tamo ly ati mo?’ nanai deng lawh baly, huni khumi my, ‘Kai i hini tamo ly ahawi leaungrei i yhm y kanga nai ne,’ nanai pathang ai,” napi.

⁷Ati cheaungkhang sa thai nai ARENG my, “Aw haisau, ang thau ly kai i kalop sa pi nai beram typ keung ai tiu ba; ni ai tleh ba. Naibaly beramchi ly ahei phro ai. Kai ly kaimy i khumichi ai tiu ai i,

⁸hini pri i khumi phy thomrei y phy nyhrei ly dei ai.

⁹Naibaly kai ly tangka ai mai hawi pachai nai kamta, dei kamthum phy thomrei y phyrei ai pachai ai. Nichi ai cham iy khen ai. Kai ly muku ai cham nai kamta, nichi ai cham ai. Naibaly nichi ly kai teng y chiu sa u ai, Kai py pathang pi ai. Nichi ly kai i khumichi ne, nanai nichi teng y thui pi ai. Nichi my py kai ly mychi i Tameuh ne, nanai pany u ai,” napi.