Read Khumi Chin ZEKHARIAH 6 Bible Online

ZEKHARIAH 6 - Khumi Chin bible

ZEKHARIAH 6

¹Takhra paleung mei y amteng hai nai harei kaniu bi bo. Hini neng khala kai ly kheupaja mawi nyhrei sala mang ang theu nai, keaungngo ka-ri palyhrei niu.

²Angchei i keaungngo ka-rira y keaungngo kamlengchi, pa-nyh i keaungngo ka-rira y keaungngo kamnumchi,

³pa-thom i keaungngo ka-rira y keaungngo kangleungchi, palyh i keaungngo ka-rira y keaungngo kariurachi my ryh nai ne.

⁴Naibaly kai ly kani pri amtaw thau nai teng y, “Areng awi, hini keaungngo ka-richi i awm nai sai ly ati thui nai mo?” nanai deng baly,

⁵kani pri amtaw thau naimy, “Hunichi ly ali amjy palyhreichi ne; huni alichi ly khaileaung pri verei y peang nai keung Areng mo i dengdairei vai, theu u naichi ne,” nanai pathang.

⁶Keaungngo kamnumchi my ryh nai keaungngo ka-ri ly tosyh Babulon pri mang y, keaungngo kangleungchi my ryh nai keaungngo ka-ri ly nidym mang y, keaungngo kariurachi my ryh nai keaungngo ka-ri ly tokalawi mang y chei u nai ne.

⁷Ariura nai keaungngochi ly khaileaung pri y chih tamangtang ai nai theu u. Kani pri amtaw thau naimy nichi teng y, “Khaileaung pri verei y chih ai nai chei u,” napi i nichi chei u bo.

⁸Naibaly kani pri amtaw thau naimy kai teng y, “Tosyh mang i Babulon pri y chei nai keaungngochi ly ARENG i kado theu nai ai rym hai bo,” napi.

⁹ARENG ly kai teng y hina nai leu pei bo.

¹⁰Mymy ly “Pri pala naira avum nai Heladai, Tobijah hawi Jedaih kangpreangchi i pei nai langseaungchi la iy, Zephaniah i chapo Josia i yhm y chei hai praw; hunichi bawibawi ly Babulon pri y pri palara i dengdairei vawi u naichi ne.

¹¹Nichi my pei nai muku, tangkachi hawi areng lukhym harei sa iy, Jehozada i chapo pathyp pi nai keung kalen keh Josua i lu y amym hai ba.

¹²Ati cheaungkhang sa thai nai ARENG my, “Sai kadeu” nanai amyn nga nai khumi ly mymy i awm naira y nang chawn iy, ARENG i Achura yhm sa palum teang ai.

¹³Ni ly Achura yhm sa ai nai keung, samrang hawi ataing nai phum-ang nga ai nai khumi ne nai deaungkho y, mymy i chengchi ai peang ai; my i areng atehra sahawi y pathyp pi nai keung leaungrei ly angdo iy, ni hawi vanrei tlamsa naimy amkawm ai.

¹⁴Huni areng lukhym py ARENG i Achura yhm y Heladai, Tobijah, Jedaih hawi Josiachi ai tahm pasang nai ka-ma-ra harei lawm ai,” napi.

¹⁵Kamlora y awm u nai khumichi ly jeu iy, ARENG i Achura yhm sa palum naira y sabawm u ai. Huni Achura yhm sa palum nai cheang nai khala y, nangchi ly nangmychi teng y kai ai ati cheaungkhang sa thai nai ARENG my pato nai ne, nanai pany u ai. Nangchi ly nangmychi i ARENG Tameuh i leu pei naichi ai, hawihai palai tangai u lawh baly hina naichi tym ai.