Read Khumi Chin ZEKHARIAH 8 Bible Online

ZEKHARIAH 8 - Khumi Chin bible

ZEKHARIAH 8

¹Ati cheaungkhang sa thai nai ARENG i leu ly Zekhariah teng y tym.

²“Jerusalem mary i khumichi tlang tleaung y khri pa-rei katamen nai deaungkho y, nichi i paleung ka-echi tlang tleaung y kado theu hai nai ne i py, kai i tamen nai saho y, huni mary ai sabawm ai nai kadeaung nai ne.

³Kai ly kaimy i chai parai nai Jerusalem mary y kavawi teang ai. Huni mary y kaawm ai. Huni mary ly ka-ym awm nai mary nanai py, ati cheaungkhang sa thai nai ARENG i mawi ly mawi kachai nanai py, amyn pathi ai.

⁴Cheaungvawi atawi iy aleaung nai pa-rei miteaung acheang nai, neampachy neampachochi ly Jerusalem lam y ateh u ai.

⁵Lam y py amau u nai deaungdi neampacho neampachychi hawi, kawi naimy awm u teang ai.

⁶“Hinichi ly vai, awm jo nai Juda chengchi i vui ne, nanai thui khyp pajau y teu i py kai, ati cheaungkhang sa thai nai ARENG i vui ly avo pajau nai ne.

⁷Kai ly kaimy i khumichi teng y, nichi tym naira tleirei y atleu i,

⁸Jerusalem mary y awm u ai nai nidym, nisi mang i dengdairei, nichi ai kapahawi ai. Nichi ly kai i khumichi lawm ai. Kai py nichi i Tameuh lawm ai i, nichi ai leu meitang hawi ka-ym awm naimy peang ai.

⁹“Sorai paleung awm u! Nangchi thai u nai leuchi ly kai i Achura yhm sa palum teang ai nai langdeng pala nai neng khala y, amochi thui nai leuchi ne.

¹⁰Huni neng ny y rai khala ly ami py khumichi, tawnbawichi ai kalop so hai pajau y. Ami py mychi i paleung ka-echi teng i nai law tleaung ai nai ngo y. Kai ly khumi cheng tengtawi ajo hai nai ne.

¹¹Na i py vai, kai ly hini khumi cheng awm rai naichi hawi, sai sairei amkawm ai.

¹²Nichi ly mychi i amti amjangchi tlamsa naimy pati u ai. Nichi i kreip keungchi ly athaichi pasu ai. Khaileaung ly amti amjangchi thawn hai iy, kani my py khri pa-rei nai hai ai. Awm rai nai kai i khumichi teng y, hini amtheaung nairachi kapei pi ai.

¹³Aw Juda hawi Israela khumichi awi! Jangni y cheng takhra khumichi ly mychi tengtawi apasawi apatau u nai khala y, ‘Nangchi ly Juda hawi Israela chengchi tlang tleaung y tym nai ka-jeirachi kamta, nangchi i tlang tleaung y tym teang sy!’ nanai thui u reng nai ne. Na i py kai ly nangchi ai atleu ai i, huni cheng takhra khumichi ly mychi tengtawi, ‘Nangchi ly Juda hawi Israela chengchi teng y tym nai amtheaung nairachi kamta, nangchi py ngo u teang sy!’ nanai thui u ai. Hunai deaungkho y sorai paleung awm u; jei u moh,” napi.

¹⁴Ati cheaungkhang sa thai nai ARENG my, “Nangchi i amsi pajochi my kai ai kado theu hai nai khala, kai ly nichi ai hawi y naira kapei ai nai tau bo. Naibaly paleung ka-dawn amtlau y naimy, hunai kamta kasa bo.

¹⁵Na i py vai, kai ly Jerusalem mary i khumichi hawi, Juda khumichi ai amtheaung naira pei ai nai dawn bo. Hunai deaungkho y jei u moh.

¹⁶Nangchi sa ai avo naichi ly amy tengtawi leu kateng katheu ai nai hawi, adyh adawi ai nai molam, meitang naimy tara chih u ai nai ne.

¹⁷Nangchi ly amy tengtawi khrukhra hai ai nai ka-dawnchi so u moh. Vaineng abeu iy ka-chawi naimy pany hai u moh. Ka-chawi thui nai, teng y nai kalop hawi kamjau kamteang sa naichi ai kai ly niu ngai y,” napi.

¹⁸Ati cheaungkhang sa thai nai ARENG ly Zekhariah teng y hina nai leu pei.

¹⁹Palyh lo, pa-ngo lo, saryh lo hawi lo horei khala y sa nai biu hai nai pawichi ly Juda khumichi i vui amo theu naira lawm ai. Nangchi ly kateng lam hawi tlamsa naira ngai ai nai tla,” napi.

²⁰Ati cheaungkhang sa thai nai ARENG my, “Pri kalenchi hawi marychira i khumichi ly Jerusalem mary y jeu u ai nai neng tym ai.

²¹Mary harei i khumichi ly takhra mary harei i khumichi teng y, ‘Kaichi ly ati cheaungkhang sa thai nai ARENG teng y chei i chiu sa iy, mymy teng i amtheaung naira hnei u sina; kaichi hawi vanrei abang u!’ nanai thui ai.

²²Sa thai naira haiho awm nai pri kalen khumichi ly ati cheaungkhang sa thai nai ARENG ai chiu ai nai hawi, mymy teng i amtheaung naira hnei ai nai, Jerusalem mary y jeu u ai.

²³Huni neng kani y Juda khumi leaungrei ai, cheng takhra khumi leaung horeichi my, ‘Tameuh ly nang hawi vanrei awm, nanai kaichi thai bo. Hunai deaungkho y kaichi ly nangchi hawi vanrei, sih hawi amdai ahawi ai nai ngai,’ nanai thui ai,” napi.