Read Khumi Chin MALAKHI 1 Bible Online

MALAKHI 1 - Khumi Chin bible

MALAKHI 1

¹Hini leu pei nai ly Israela chengchi teng y thui pi ai nai Malakhi teng y, ARENG my pei nai leu ne.

²ARENG ly mymy i khumichi teng y, “Kai ly nangchi ai kang tamen jojo,” napi. Na i py nichi my, “Nang ly kaichi ai tamen nai sai mana patei pi ai mo?” nanai deng u. ARENG my, “Esaw hawi Jakob nini ly amjo amnau ne i py, kai ly Jakob hawi ni i katu chanauchi ai tamen;

³Esaw hawi ni i katu chanauchi ai ly niu ngai y. Kai ly Esaw i mawi aheung khu ka-peang phra hai iy, kasuichi i vui khai su bo,” nanai pathang.

⁴Esaw i katu chanau Edom khumichi my, “Kaichi i mary ly phra pawn teu i py, hunichi ai kaichi my palum teang ai,” nanai thui u lawh teu baly, ati cheaungkhang sa thai nai ARENG ly” Nichi so u palai teang teu sy; huni marychi ai kaimy taphra teang ai. Khumichi ly huni khumichi ai “Kamngo chochi” nanai py, ARENG my kado theu hai jojo nai chengchi, nanai py palau ai,” napi.

⁵Israela chengchi ly mychi kypkyp naimy, hini atitichi niu u nai deaungkho y, “ARENG ly Israela pri angam mang y malawn py, sa thai naira phum-ang awm na lawh ly!” nanai thui u ai.

⁶Ati cheaungkhang sa thai nai ARENG ly pathyp pi nai keungchi teng y, “Chapo ly ampo ai py, miseaung ly yhmkeung ai py, tahm khai bo. Kai ly nangchi i ampo ne. Ati mana nai y nangchi ly kai ai tahm khai u y lawh mo? Kai ly nangchi i yhmkeung ne. Nangchi ly kai ai tahm pateng u y lawh mo? Nangchi ly kai ai khumi amiu y nai sa iy, “Nang ai kaichi my ati mana mei aniu y nai kasa u lawh mo?” nanai deng u bo.

⁷Nangchi mei aniu y nai sa nai leaungsai ly kai i maicham salo y chai y nai teicha teineichi talam nai deaungkho y ne. Naibaly nangchi my, “Kaichi ly nang ai ati mana tahm khai y nai kasa u lawh mo?” nanai deng u bi bo. Nangchi i tahm khai y nai leaungsai ly kai i maicham ai mei aniu y nai sa nai ne.

⁸Nangchi ly mei paju, no nga, ti y baly kheu tleu nai tawnbawichi talam ai nai syn u nai khala, nangchi teng y kamngo by y, nanai apalawn u nai sai a? Hina nai beram hawi sichi ai, samrang i bangtang kalen teng y talam u cham! Ni ly nangchi ai kawn na a? Meimai kahawi py pei na a?” napi.

⁹Nangchi pathyp pi nai keungchi awi, achi ai hawi naira pei ai nai vai, Tameuh teng y hnei u cham. Mymy ly nangchi i chiu sa nai tangai pi ai ny y. Huna nai tym nai py nangmychi i kamngo nai deaungkho y ne.

¹⁰Ati cheaungkhang sa thai nai ARENG my, “Kai i maicham salo y, chai y nai maichi teaung y ai nai khumi leaungrei my Achura yhm katheu pa-khochi kho veng nai awm i khyly, mana tanrei hawi ai mo? Kai ly nangchi ai kawn y leang. Kai teng y nangchi syn nai katalamra py, kang kawn pi y leang.

¹¹Khaileaung katemra y khrairei, khumichi ly kai ai tahm khai nai palo u bo. Nichi ly meingtym tleirei y mui katuichi patawi iy, paleung ka-nora hawi nai kapathyprachi kai teng y talam u. Nichi bawibawi py kai i amyn palo u bo!

¹²Na i py nangchi ly kai i maicham ai chai y napi iy, nangmychi i teicha teinei katalamra ai py, mei aniu y nai sa iy kai ai cheh u bo.

¹³Nangchi my, ‘Hini leaungsaichi sa nai ly kaichi paleih na bo!’ nanai thui u iy, notareang pasui hai iy, kai ai tahm khai u y bo. Nangchi ly nangmychi paviu iy nga nai tawnbawi ai py, kheu tleu nai, ti y baly no nga nai tawnbawi ai py, kai i vui katalamra palawn iy syn u bo. Kai ly hini katalamrachi kawn pi ai, nanai nangchi athang khai u a?

¹⁴Nangmychi i beram kanghuchi theung y, no-na by y nai beramchi awm i py, kai ai tapawp iy vang teng y nai tawnbawi ai talam nai khumi ly amsawi lawi na sy. Ati mana nai mo na baly kai ly nang parai nai samrang ne iy, kai i amyn ai khumi cheng cheaungkhangchi my tahm khai jei u nai deaungkho y ne,” napi.