Read Khumi Chin MATTHAI 13 Bible Online

MATTHAI 13 - Khumi Chin bible

MATTHAI 13

¹Huni kani y ly Isu ly yhm i dengdairei theu iy, ang peang y ateh.

²Naibaly mymy teng y khumi mipui ka-teng ny y nai achu nai deaungkho y mymy ly paleaung y atang iy ateh; naibaly khumi mipuichi bawibawi ly palang y angdo.

³Naibaly mymy ly nichi teng y pata nai leu y atiti neangneang thui pi i, “Khen cham, ti hei nai khumi ly ti hei ai nai amawi;

⁴naibaly hei nai khala y phyrei ly lam teng y tla i, tavochi my cha krai.

⁵Naibaly phyrei ly thaithi tleaung y khaileaung ampo nai meingtym y tla i, khaileaung tho y nai deaungkho y prau praw ryp;

⁶na i py kani bi asang leng nai kha y ly ang i, tangjyn ngo y nai deaungkho y jei ryp veng.

⁷Naibaly phyrei ly kabeng aleng theung y tla i, kabeng aleng ly len ryh len ryh i vawi pajeang veng.

⁸Naibaly phyrei ly khaileaung kahawira y tla i, vui theu iy phyrei ly chungvairei, phyrei ly vui tariurei, phyrei ly phairei peung.

⁹Kano awm nai khumi ly thai sy,” napi.

¹⁰Naibaly abangnaichi ly mymy teng y ahihawi iy ni teng y, “Nang ly ati mana nai nichi teng y pata nai leu y thui pi mo?” napi.

¹¹Naibaly mymy ly nichi teng y, “Kani pri my peang nai leu kathiuchi ly nangchi ai pany ai nai pei nai ne, nichi ai ly pei nai ny y leang.

¹²Ati mana nai mo nabaly ami py atiti awm nai ngierei teng y ly pei panawi bi ai, naibaly mymy ly bym pa-rei nga ai; na i py ami py atiti by y nai ngierei teng i nai ly mymy i awm yb nai angchi py la pi ra ai.

¹³Hunai deaungkho y kai ly nichi teng y pata nai leu y thui pi; ati mana nai mo nabaly nichi ly khen iy py niu y i, kano y thai iy py pany thai y, dawn nai py pany y.

¹⁴Naibaly Isaia i leu thui yb nai ly nichi i tlang tleaung y tym nai bo he: mymy ly, ‘Nangchi ly kano y thai i py pipi pany thai y ai, Niu mang ly niu u i py dawn naira pipi pany y ai:

¹⁵Ati mana nai mo nabaly hini chengchi i paleung ly kyh chawn veng bo, Nichi i kano py pang panang veng i, Nichi i mei py pasym teang. Ti y baly nichi i mei my niu lawh iy, Nichi i kano my thai lawh ai i, Nichi i paleung my pany thai lawh ai, Naibaly nichi ly hi ali teang lawh iy Nichi ai hawi kaso pi vui lawh na,’ napi.

¹⁶Nangchi i mei ly niu nai deaungkho y taham hawi; nangchi i kano ly thai nai deaungkho y taham hawi.

¹⁷Meitang khyp kang thui pi, amo neangneangchi hawi khumi kahawi neangneangchi py nangchi i atiti niu naichi ly khrikhri pa-rei niu ai nai ngai parai, na i py niu y bo; nangchi i atiti thai naichi py thai ai nai ngai, na i py thai y bo.

¹⁸“Hunaibaly ti hei nai khumi i satang ly tangai u.

¹⁹Ami py kani pri i leu ly thai iy dawn nai pany y pui baly, kamngo sa reng nai keung ly jeu iy, mymy i paleung y hei nai angchih ly lawm pi ry veng, huni ly lam teng y hei nai ne.

²⁰Naibaly thaithi tleaung y hei nai ly hini ne he: mymy ly leu thai iy kawn parai naimy tangai praw ryp:

²¹na i py mymy kypkyp teng y tangjyn ngo y i tanarei chy awm khyh; naibaly huni leu deaungkho y patang naira mo, ana naira mo theu baly mymy ly atlyn praw ryp.

²²Naibaly kabeng aleng theung y hei nai ly hini ne he: mymy ly leu thai bo, na i py khaileaung pri y heng nai khala y dawn nai sai hawi nang naira my tapawp nai saichi my ly leu ai ly achih hai i, athai y bo.

²³Naibaly khaileaung kahawira y hei nai ly hini ne he: mymy ly kano y thai iy pany thai bo: naibaly athai khyp i pyhrei ly chungvairei, pyhrei ly vui tariurei, pyhrei ly phairei athai na,” napi.

²⁴Naibaly mymy ly nichi teng y pata nai leu takhra thui pi bi i, “Kani pri my peang nai ly hlau y ti kahawi hei nai keung hawi pata nai ne:

²⁵na i py khumichi ly i ngym nai sala y mymy i paleung ka-e ly chei iy, choh theung y ly cho myn hei iy tako veng bo.

²⁶Hunaibaly choh ly prau iy vui theu baly choh myn ly amny bo.

²⁷Naibaly yhmkeung i miseaungchi ly chei u i mymy teng y, ‘Areng awi, nang i hlau y ly ti kahawi hei y nai sai a? Choh myn ly ma mang i nai awm lawh mo?’ napi.

²⁸Naibaly mymy ly nichi teng y, ‘Tuni ly paleung ka-e i sa nai na a tu ly,’ napi. Naibaly miseaungchi my ly mymy teng y, ‘Naibaly kaichi my chei iy hunichi ai ly la achu pawn ai nai avo na a?’ napi.

²⁹Na i py mymy ly, ‘Ny y leang; choh myn la achu baly choh akyn rau lawh na.

³⁰Choh tyn nai neng khala y khrairei vanrei cheang palai sy; naibaly choh ly kai i choh tyn nai neng khala y ly choh tyn nai keungchi teng y, Choh myn lo u achu manme ly, leng ai nai taeang u; na i py choh ly kai i choh beu y pakym u achu, kanapi ai,’ napi,” nanai thui.

³¹Naibaly mymy ly pata nai leu takhra nichi teng y thui pi bi i, “Kani pri my peang nai ly anmawi ti amairei ami my la iy mymy i hlau y hei nai kamta atawm;

³²huni ly ti bawibawi tleaung y theang keh; na i py keung cheang nai bo y ly amti amjangchi tleaung y ly len keh lawh i, dengkeaung lawn bo; hunaibaly salo mang i tavochi ly akheang tapai iy huni i changpi y jei,” napi.

³³Mymy ly pata nai leu takhra nichi teng y thui pi bi i, “Kani pri my peang nai ly neampachy my angbo la iy, tako dei ne naira thomrei theung y num be pa-rei phui nai kamta atawm,” napi.

³⁴Huni bawibawi ly Isu my khumi mipuichi teng y pata nai leu y thui pi.

³⁵Amo my, “Pata nai leu y ly kathui pi ai i, Khaileaung palum angchei khala i dengdairei atiti heu nai ly kathui ai,” nanai thui nai ly tym thai ai nai, mymy ly pata nai leu ny y baly nichi teng y ati sai py thui pi y leang.

³⁶Hunai thym khala y ly mymy ly khumi mipuichi ai khai su iy yhm y kun: naibaly abangnaichi ly mymy teng y ahihawi iy, “Hlau y choh myn hei nai pata nai leu kaichi ai thui pi pachai kyh,” napi.

³⁷Naibaly mymy ly pathang i, “Ti kahawi hei nai keung ly Khumi i Chapo ne; hlau ly khaileaung pri ne;

³⁸ti kahawi ly kani pri i chanauchi ne; choh myn ly kamngo sa reng nai keung i chanauchi ne;

³⁹hei nai paleung ka-e ly diabola ne; choh tyn nai ly khaileaung pri tem ai nai neng ne; choh tyn nai keungchi ly kani pri i amtaw thau naichi ne.

⁴⁰Hunaibaly choh myn la achu iy mai y leng nai kamta ly khaileaung pri tem ai nai neng khala y ly awm teang ai.

⁴¹Khumi i Chapo my ly mymy i kani pri i amtaw thau naichi ai pato ai i, mymy i peang naira i dengdairei kamngo sa hai reng nairachi ai hawi, atiti hawi y sa reng nai keungchi bawibawi ai ly patheu ai i, mai pui kangveaung y aphi ai:

⁴²hu y ly vo py vo ai, ho py akachai ai.

⁴³Hunai khala y khumi kahawichi ly Ampo i pri y kanito kamta angvang ai. Kano awm nai khumi ly thai sy.

⁴⁴“Kani pri my peang nai ly hlau y yhmtheaung kangviu y up nai kamta atawm; huni ly ami my niu iy heu ra i, kawn nai deaungkho y mymy i awm nai bawibawi jo iy huni hlau ly van.

⁴⁵“Naibaly kani pri my peang nai ly ka-pai sa nai khumi khawisaleng i lengseaung hawi parai naichi ai hau nai kamta atawm bi;

⁴⁶naibaly mymy ly khawisaleng i lengseaung vang tang parai nai harei niu i, mymy i awm nai bawibawi jo iy van.

⁴⁷“Naibaly kani pri my peang nai ly pangli y tapiu jang iy, amjy cheaungkhang adang achu nai kamta atawm taleang bi.

⁴⁸Huni ly kawi bo nabaly kacheng y ryh; naiblay nichi ly ateh iy kahawi amjy ly pawm y pacheang iy, hawi y nai amjy ly aphi u su bo.

⁴⁹khaileaung pri tem ai nai neng khala y ly hunai kamta khyp awm teang ai; kani pri i amtaw thau naichi ly theu ai i, khumi kahawi theung i nai khumi kamngochi ai ly vawi takhra iy,

⁵⁰mai pui kangveaung y aphi ai; hu y ly vo py vo ai, ho py akachai ai.

⁵¹“Nangchi ly huni bawibawi pany thai bo a? napi.

⁵²Nichi my ly mymy teng y, “Ne chy,” napi. Naibaly mymy ly nichi teng y, “Huna nai ne baly kani pri my peang nai i abang nai khumi ai palawn nai Reita patiu nai keung ngierei ly, yhmkeung my mymy i yhmtheaung dengdairei atiti kangthachi hawi atiti kangngymchi py patheaung nai kamta atawm,” napi.

⁵³Naibaly hina nai ne, Isu ly huni pata nai leu takhra takhra thui pi pajau bo nabaly hu i dengdairei tako vui bo.

⁵⁴Naibaly mymy i awm nai avang y tym i, mychi i achura yhm y nichi ai patiu; hunaibaly nichi ly khri pa-rei lyh i, “Hini khumi ly hini cheng naira hawi hini atiti lyh ai awm parai naichi sa ai nai sa thai naira ly ma mang i nga nai mo?

⁵⁵Hini ly lasama i chapo ny y lawh a? Mymy i amhm ly Mari napi nai ny y lawh a? Mymy i amjo amnauchi py Jakob, Josepha, Simon, Juda napi naichi ny y lawh a?

⁵⁶Mymy i tuichochi py achi teng y awm bebe nai ny y lawh a? Hini khumi ly hini atiti bawibawi ly ma mang i nga nai mo? napi.

⁵⁷Naibaly nichi ly mymy i tlang tleaung y paleung hawi y bo. Na i py Isu ly nichi teng y, “Amo ai ly mymy i avang y hawi mymy i yhm y ny baly palo y nai ly awm vai y leang,” napi.

⁵⁸Naibaly nichi ly ym naira by y nai deaungkho y mymy ly huni meingtym y atiti rengrang neangneang so y leang.