Read Khumi Chin MATTHAI 14 Bible Online

MATTHAI 14 - Khumi Chin bible

MATTHAI 14

¹Huni neng khala y ly samrang Heroda ly Isu i satang thai iy mymy i miseaungchi teng y,

²“Huni ly Baptis sa nai Johan na a tu ly; mymy ly kadeichi theung i nai angthau bi nai bo; hunai deaungkho y hina nai sa thai nairachi my ly mymy ai sa hai nai bo to,” napi.

³Heroda ly mymy i amjo amnau Philipa i aju Herodi i molam y Johan ai ly patiu iy kawm i, theaung y paeung bo.

⁴Ati mana nai mo nabaly Johan my ly ni teng y, “Nang ly ni ai lawn ngau y,” napi chum veng bo.

⁵Naibaly mymy ly ni ai padei ai nai ngai i py khumi mipuichi ai jei, nichi ly ni ai amo palawn nai deaungkho y.

⁶Na i py Heroda ai tapen nai neng alyp nai kani tym nai kha y ly Herodi i chaniu ly nichi i mo y lam i, Heroda ai amo theu hai.

⁷Hunai deaungkho y mymy ly ni i ati py hnei nai ngierei ly pei ai nai vaineng abeu khei bo.

⁸Naibaly amhm my ni ai pachei nai kamta, “Baptis sa nai Johan i lu ly saibi tleaung y hi y kai teng y pei,” napi.

⁹Naibaly samrang ly paleung mawn i py mymy i vaineng abeu nai saichi hawi, mymy hawi biu o ahawi naichi deaungkho y huni pei ai nai thui pi bo:

¹⁰hunaibaly mymy ly khumichi pato i theaung y Johan i lu tameang hai.

¹¹Naibaly nichi ly ni i lu ly saibi y syn i anglo teng y pei, naibaly mymy ly amhm teng y leh hai bo.

¹²Naibaly ni teng y abangnaichi my ly mymy i veu kalawm i up iy, Isu teng y chei i thui pi.

¹³Naibaly Isu ly huna nai thai i, hu i dengdairei paleaung mang daichi ka-vym meingtym y chei takhra bo. Na i py khumi mipuichi ly pany iy avang i dengdairei kacheng mang mymy ai hui u bo.

¹⁴Hunaibaly mymy ly kacheng y angkhyh kha y khumi mipui ka-teng ny y nai niu iy, khri pa-rei pahen i nichi i no naichi ai hawi sa pi bo.

¹⁵Naibaly kani dym bo nabaly abangnaichi ly mymy teng y ahihawi iy, “Hini ly daichi ka-vym meingtym ne, kani py patyh veng bo; khumi mipuichi ai ly avang takhra takhra y chei u iy, mymychi i vui cha ai nai sai van ai nai chei hai khyh,” napi.

¹⁶Na i py Isu my ly nichi teng y, “Nichi ly chei ai nai aly by y; nangmychi my nichi cha ai nai atiti pei u,” napi.

¹⁷Naibaly nichi my ly mymy teng y, “Kaichi ly hi y tako phi pangrei hawi ngo amai nyhrei awm kalei khyh,” napi.

¹⁸Naibaly mymy ly, “Hi y kai teng y jeu hai u,” napi.

¹⁹Naibaly mymy ly khumi mipuichi ai acha kangheng tleaung y ateh ai nai leu pei; naibaly ni my ly tako phi pangrei hawi ngo amai nyhrei la i, kani mang y khen iy kawn nai leu thui, naibaly theng baw theng baw i abangnaichi teng y tako phi pei iy, abangnaichi my ly khumi mipuichi teng y paji.

²⁰Naibaly nichi bawibawi ly cha i kajeu kawi u bebe, nichi i cha nai kamthom akhui nai py teaung holai nyhrei kawi teang.

²¹Cha naichi ly neampachychi hawi deaungdichi ai thui y naimy neampacho ka-cheang ryry naimy sang pangrei tahm awm.

²²Naibaly mymy ly khumi mipuichi ai amprei hai nai sala y, mymy chei y rai kha y ho mang vai y angpeang man ai nai abangnaichi ai ly paleaung y atang hai praw.

²³Naibaly khumi mipuichi ai amprei hai nai bo y mymy ly chei takhra iy chiu sa ai nai mawi y lyn kalau; naibaly kani dyn bo nabaly mymy tlairei hu y awm.

²⁴Na i py paleaung ly ang um pareaung y awm i, ali paka ma nai deaungkho y tui sampyh my paleaung khri pa-rei ali hai.

²⁵Naibaly mymy ly khutawi y rai kha y ang tleaung y nichi mang y tako tapai i,

²⁶abangnaichi ly mymy ai ang tleaung y tako nai niu khala y ly, “Tavau khumi na a hu ly,” napi nai paleung dah na i jei nai athorei my aeu u bo.

²⁷Na i py Isu my ly nichi ai preng praw i, “Paleung awmnem naimy awm u; kai teu na a; jei u moh,” napi.

²⁸Naibaly Petera ly pathang i, “Areng awi! Nang ne baly ang tleaung y nang teng y kang jeu ai nai leu pei kyh,” napi.

²⁹Naibaly mymy ly, “Jeu bei,” napi. Naibaly Petera ly paleaung i dengdairei kathiu iy Isu teng y tapai nai tui tleaung y tako bo.

³⁰Na i py ni ly ali theu nai niu iy jei i, tup amteaung nai kha y, “Areng! Kai ai sabawm kyh,” nanai aeu bo.

³¹Naibaly Isu my kiu jaha praw iy, ni ai amkaw i ni teng y, “Nang ym naira di nai awi, ati mana nai ym thai y nai awm lawh a?” napi.

³²Naibaly nini ly paleaung y atang hawi iy ali ly anawn ryp.

³³Naibaly paleaung y awm naichi ly, “Nang ly Tameuh i Chapo ne khyp nai bo,” nanai mymy ai chiu u bo.

³⁴Naibaly nichi ly hu mang vai y angpeang iy Kenesaret pri i kacheng y tym u i,

³⁵huni meingtym i khumichi ly mymy ai ma bo nabaly, huni ahawi tengtang meingtym tleirei y khumi pato iy, no nai bawibawichi ai mymy teng y hawi u bo;

³⁶naibaly nichi ly mymy i kanih tawn y nam thai khyh ai nai takeng u; naibaly nam nai ngiereichi ly hawi ryp hawi ryp bo.