Read Khumi Chin MATTHAI 16 Bible Online

MATTHAI 16 - Khumi Chin bible

MATTHAI 16

¹Naibaly Pharisaichi hawi Saddukaichi chei u iy mymy ai cham ai nai kani pri mang i dengdairei atiti ka-ma-ra patei ai nai hnei u bo.

²Na i py mymy ly nichi teng y, “Nangchi ly dym mang y, ‘Kani saeng akhang rawi nai deaungkho y kani hawi ai ngaw khyh,’ na u.

³Naibaly khawn mang y ly, ‘Vaini ly kani hawi y ai mi, kani saeng theu i khri pa-rei khupanym awm na ly,’ na u lawh. Nangchi ly kani i awm nai sai pany u kawp bo, na i py neng ka-ma-rachi ly pany u kawp y lawh.

⁴Kamngo parai nai hawi pajang sa ryry nai deung kangthauchi ly ka-ma-ra hau u lawh, na i py Jona harei ny y baly nichi teng y ka-ma-ra pipi patei ai ny y,” napi nai pathang. Naibaly mymy ly nichi teng i nai chei vui iy leh bo.

⁵Naibaly abangnaichi ly tako syn ai nai tami veng naimy hu mang vai y tym bo.

⁶Naibaly Isu my nichi teng y “Pharisaichi hawi Saddukaichi i angbo y ly tau tleaung y awm u ly, amkym u,” napi.

⁷Naibaly nichi ly huni leu mychi tangtawi arum u i, “Tako syn y pasi lawh nai deaungkho y na a,” napi.

⁸Naibaly Isu ly huna nai pany iy, “Aw, ym naira di naichi awi, ati mana nai tako by y nai deaungkho y nangmychi tengtawi arum u mo?

⁹Vai py nangchi pany y jojo rai a? Khumi sang pangreichi hawi, tako phi pangrei hawi, nangchi i teaung hu jirei akhui nai py pany u jo y nai sai a?

¹⁰Naibaly khumi sang palyhreichi hawi tako phi saryhrei hawi, nangchi i atlem saipa hu jirei akhui nai py pany u jo y a?

¹¹Tako satang ly nangchi teng y kang thui pi y leang, nanai ati mana nai pany u y lawh? Pharisaichi hawi Saddukaichi i angbo y naini amkym u,” napi.

¹²Hunaibaly mymy ly tako angbo y amkym ai nai ny y i, Pharisaichi hawi Saddukaichi i patiu naira y amkym ai nai nichi ai thui pi, nanai pany u bo.

¹³Naibaly Isu ly Philipi Kaisari ka-peang y tym khala y ly abangnaichi teng y, “Amichi my khumi i Chapo ai ly ami napi mo?” nanai deng.

¹⁴Naibaly nichi my ly, “Phyreichi my ly Baptis sa nai keung Johan na a, ang napi; phyreichimy ly Elija na a, ang napi; phyreichi my ly Jeremia mo, amo ami mo na a, ang napi,” napi.

¹⁵Naibaly mymy ly nichi teng y, “Tumbaly nangchi ly kai ai ami napi mo?” napi.

¹⁶Naibaly Simon Petera my ly, “Nang ly Krista, Tameuh kangheng i Chapo ne,” napi nai pathang.

¹⁷Naibaly Isu my ni teng y, “Simon Bar-Jona, nang ly taham hawi mang: huni satang ly thi hawi ngan ly nang teng y amteng hai nai ny y leang, kani pri mang i Ngaai my amteng hai nai teu.

¹⁸Naibaly kang thui pi, nang ly Petera ne, naibaly hini lengseaung pui tleaung y ly kai i palau takhra kamkawm kapadyh kalau ai i, tavau kho i apai katheu pa-kho my ly huni ai pajau y ai.

¹⁹Kani pri i sawchi py kang pei ai: naibaly khaileaung pri y ati py nangmy kawm nai ngierei ai ly kani pri mang y kawm teang ai: naibaly khaileaung pri y ati py nangmy su nai ngierei ai ly kani pri mang y su teang ai,” napi nai pathang.

²⁰Hunai pajau khala y ly mymy ly Krista ne, nanai ami teng y py thui pi y ai nai abangnaichi ai leu pei kheng.

²¹Huni dengdairei baly mymy ly Jerusalem avang y chei ai nai tla nai sai hawi, miteaung kehchi, pathyp pi nai keung kalenchi, Reita patiu nai keungchi teng y mymy i atiti neangneang patang ai nai saichi py, ni ai padei ai nai saichi py, kani thomrei kani y pathau teang ai nai saichi py Isu ly abangnaichi teng y thui pi amteaung bo.

²²Naibaly Petera ly mymy ai hawi takhra iy, “Areng awi, Tameuh my pei moh sy! Huni ly nang i tlang tleaung y den py tym y ai,” napi nai preng.

²³Naibaly mymy ly hi iy Petera teng y, “Setan! Kai i nithun mang y anaw la; nang ly kai i vui atlym ai naira ne; nang ly Tameuh i atitichi dawn y nai ly, khumi i atitichi dawn lawh nai ne na a hi ly,” napi.

²⁴Hunaibaly Isu ly abangnaichi teng y, “Ami py kai teng y abang ai nai ngai baly amy i kangai khai su iy, amy i kraws apu naimy kai teng y abang sy.

²⁵Ati mana nai mo nabaly ami py amy i hengra aplawi ai nai ngai nai ngierei ly tama ai: ami py kaimy deaungkho y amy i hengra tama nai ngierei ly nga ai.

²⁶Ami py hini khaileaung pri bomrei nga iy, amy i hengra tamo lawh sy, mymy i vui ati amran ai mo? Ti y baly ami my mymy i hengra i jeng y ati pei ai mo?

²⁷Naibaly Khumi i Chapo ly mymy i kani pri i amtaw thau naichi hawi Ampo i nang parai naira apu naimy ang jeu ai, hunai khala y ly khumi leaung leaungrei ai ni i atiti sa nai kamta heung teang ai.

²⁸Meitang khyp kang thui pi, hi i angdo nai phyreichi ly Khumi i Chapo ly mymy i pri peang ai nai jeu nai niu u y ryrei ly dei naira den py pateng ai ny y,” napi.