Read Khumi Chin MATTHAI 17 Bible Online

MATTHAI 17 - Khumi Chin bible

MATTHAI 17

¹Naibaly Isu ly kani tariurei nai khala y ly Petera ai py, Jakob nini amjo amnau Johan ai py hawi takhra iy, mawi asang parai naira ychei hai kalau;

²naibaly nichi i mo y mymy i meimai awm nai sai ly takhra bo; my i meimai ly kanito kamta angvang iy, mymy i ateaung ly kangvang kamta kaleung bo.

³Naibaly khen cham, Mosi nini Elija ly mymy hawi arum nai nichi teng y, amteng bo.

⁴Naibaly Petera ly pathang i Isu teng y, “Areng awi, kaichi i vui hi y awm ai nai hawi parai; nang ngai baly hi y taichy thomrei kasa pi ai; nang i vui harei, Mosi i vui harei Elija i vui harei,” napi.

⁵Ni ly thui dudu nai thym khala y khen cham, tamai kaleung parai nai ly mymychi ai deng; naibaly khen cham, tamai theung i dengdairei raawi ly, “Hini ly kai i Chapo ngai parai nai ne: kai ly mymy i tlang tleaung y khrikhri pa-rei kakawn parai: mymy i leu tangai u,” napi.

⁶Naibaly abangnaichi ly huni thai kha y khri pa-rei jei i, tabiu meu ryp bo.

⁷Naibaly Isu ly nichi teng y chei iy nam i, “Angthau u, jei u moh,” napi.

⁸Naibaly nichi ly dengtheang i Isu ai leaungrei ny y baly ami ai py niu y.

⁹Naibaly nichi ly mawi i dengdairei kathiu u nai thym khala y Isu ly nichi teng y, “Khumi i Chapo ly kadeichi theung i dengdairei angthau bi y ryrei ly nangchi i atiti niu naichi ly ami teng y py thui u moh,’ nanai leu pei kheng.

¹⁰Naibaly abangnaichi my ly mymy teng y, “Tumbaly Reita patiu nai keungchi ly, ‘Elija jeu manme ai nai tla,’ nanai ly ati mana nai sai mo? nanai deng.

¹¹Naibaly mymy ly, “Elija ly jeu ai nai angchi yb nai ne, ati cheaungkhang py ang sa palai bi ai.

¹²Na i py kang thui pi, Elija ly tym veng bo, naibaly nichi ly mymy ai ma y i, mymy i tlang tleaung y nichi ngaingai sa lawh. Hunai kamta khyp ly Khumi i Chapo py nichi teng y patang teang ai,” nanai pathang.

¹³Hunaibaly mymy ly Baptis sa nai Johan i satang nichi teng y thui pi nai ne, nanai abangnaichi ly pany u bo.

¹⁴Naibaly nichi ly khumi mipuichi teng y tym nai kha y khumi leaungrei ly mymy teng y chei i, mymy i mo y kheukhu di iy,

¹⁵“Areng awi, kai i chapo ai pahen kyh, mymy ly pathu i khrikhri pa-rei patang na; mymy ly tui y py mai y py neangneang atlym nai bo.

¹⁶Naibaly nang khi y abangnaichi teng y kahawi i, nichi ly hawi so pi thai y pasi lawh,” napi.

¹⁷Naibaly Isu my ly, “Aw, vai deung kangthau ym naira by y nai hawi, kateng so y naichi awi, kai ly nangchi teng y mana tanrei kang awm hai ai mo? Mana tanrei kang kham hai thai ai mo? Ni ai ly hi y kai teng y hawi u,” nanai pathang.

¹⁸Naibaly Isu my ni ai jo i, vawinam ly ni i taku theung i nai theu iy, deaungdi ly huni neng khypkhyp y hawi ryp bo.

¹⁹Huni bo y ly abangnaichi ly Isu teng y chei u takhra iy, “Ati mana nai kaichi ly patheu thai y lawh be?” napi.

²⁰Naibaly mymy ly nichi teng y, “Nangchi ly ym naira di nai deaungkho y teu. Meitang khyp kang thui pi, nangchi ly anmawi hm amairei kamta ym naira awm baly, hini mawi ka-sang teng y, ‘Hi i nai huni meingtym y asyh,’ napi ai i asyh ryp ai; nangchi i vui so thai y nai sai py awm ai ny y ai.

²¹[Ne mang ly hini amjy ly chiu sa naira hawi biu hai naira ny y baly patheu thai y leang,”] napi.

²²Naibaly nichi ly Kalili pri y awm nai khala y Isu my nichi teng y, “Khumi i Chapo ai ly khumichi i kiu y patiu hai ai i, ni ai padei u ai;

²³naibaly kani thomrei kani y ly ni ai pathau teang ai,’ napi. Hunaibaly nichi ly khri pa-rei paleung mawn u bo.

²⁴Naibaly nichi ly Kapernaum avang y tym iy Tameuh i achura yhm kalen pui i tangka cheaung nai keungchi ly Petera teng y chei u i, “Nangchi i Sara ly achura yhm kalen pui i tangka cheaung nai ly pei y a?” napi. Ni my ly, “Pei chy,” napi.

²⁵Naibaly ni ly yhm y kun iy Isu my ni teng y, “Simon, nang ly mana dawn mo? Khaileaung pri i samrangchi ly akeu hawi takeang kahm ly amichi teng y la mo? Nichi i chanauchi teng y a? khumi takhrachi teng y a? napi nai thui pi kalym vui bo.

²⁶Naibaly ni my ly, “Khumi takhrachi teng y,” napi iy Isu my ly ni teng y, “Hunai nabaly chanauchi ly lawi ai jau chy.

²⁷Na i py ani my nichi ai atlym hai lawh baly ang y chei ly, naibaly sakawi va i, man angchei nai ngo la iy huni i labeaung taai i tangka tlaurei nga ai; huni ly lo ly, kai i vui hawi nang i vui py nichi teng y pei,” napi.