Read Khumi Chin MATTHAI 18 Bible Online

MATTHAI 18 - Khumi Chin bible

MATTHAI 18

¹Hunai thym khala y ly abangnaichi ly Isu teng y chei u iy, “Kani pri y len keh nai ly ami mo?” napi.

²Naibaly mymy ly deaungdichy leaungrei ai palau i, nichi theung y angdo hai iy,

³“Meitang khyp kang thui pi, nangchi ly adawn ali teang iy deaungdi chychi kamta lawn y baly kani pri y kun u ai nai ly aveng.

⁴Hunaibaly ami py hini deaungdichy kamta tahm apanem nai ngierei ly huni kypkyp ly kani pri y len keh nai ne.

⁵“Naibaly ami py kai i amyn deaungkho y hini deaungdichy kamta leaungrei ai kawn nai ngierei ly kaimy ai kawn nai ne.

⁶Na i py ami py hini kai ai ym nai keung theangchi chy naichi theung y leaungrei ai py atlym hai nai ngierei ai ly, mymy i kaneaung y choh nip naira lengseaung kalen pui awi hai iy, pangli tui kathiura y pala i khyly mymy i vui hawi keh alam ai.

⁷“Atlym hai nairachi deaungkho y khaileaung pri ly taham si! Atlym hai naira awm ai nai angchi yb nai teu, na i py atlym hai naira tym hai nai keung ly taham si!

⁸Naibaly nang i kiu my mo, nang i kheu my mo nang ai atlym hai baly tameang ly, aphi la: kiu kheu angym naimy deungtasarei mai y aphi nai tleaung y kiu angym y nai mo, kheu tabai nai mo heng naira y kun ai nai nang i vui hawi keh alam.

⁹Naibaly nang i mei my nang ai atlym hai baly takhawi piu ly, aphi la: mei angym iy ngari angawm mai y aphi nai tleaung y ly, mei makengrei awm iy heng naira y kun ai nai nang i vui hawi keh alam.

¹⁰“Hini khumi theangchichy naichi theung y leaungrei ai pate y ai nai amkym u; nichi i kani pri i amtaw thau naichi my ly kani pri mang i Ngaai i meimai ly niu u jojo, nanai kang thui pi nai bo he.

¹¹[Khumi i Chapo ly tama naichi ai hau ai nai ang jeu nai ne.]

¹²Nangchi ly mana dawn u mo? Khumi ami py beram chungvairei awm iy, hunichi theung y harei preang vui sy, vui takaw ho ngan takawreichi ai daw jo iy, preang vui nai ai ly hau ai nai mawi y chei y ai a?

¹³Meitang khyp kang thui pi niu ali teang i khyly preang vui y nai vui takaw ho ngan takawreichi tleaung y ly huni ai mymy ly kawn keh ai.

¹⁴Hunai kamta khyp teang hini khumi theangchichy naichi theung y leaungrei tama ai nai py kani pri mang i Ngampo i kangai ny y leang.

¹⁵“Naibaly ngamjo ngamnau my nang i tlang tleaung y atiti hawi y nai sa baly chei ly, ni hawi nangmyni leaung nyhrei ka-thai y ni i tamang nai dawn hai; ni ly ang tangai baly ngamjo ngamnau ai ly nangmy nga teang nai bo.

¹⁶Nai i py mymy ly tangai y baly leu cheaungkhang ly pany nai keung leaung nyhrei mo leaung thomrei mo i labeaung y khaw thai ai nai, khumi takhra leaungrei mo leaung nyhrei mo nang teng y hawi.

¹⁷Naibaly mymy ly hunichi i leu py tangai ngai y baly, palau takhra kamkawmchi teng y tym hai: naibaly mymy ly palau takhra kamkawchi i leu py tangai ngai y baly, ni ly nang i vui Cheng Takhra khumi hawi akeu cheaung nai keung kamta awm sy.

¹⁸Meitang khyp kang thui pi, khaileaung pri y nangchi my ati py kawm nai ngierei ly kani pri mang y kawm teang ai; khaileaung pri y nangchi my ati py su nai ngierei ly kani pri mang y su teang ai.

¹⁹Kang thui pi bi ai, khaileaung pri y nangchi theung y khumi leaung nyhrei myni i atiti hnei naira y myni paleung adyh baly, kani pri mang y awm nai Ngaai my sa pi ai mang.

²⁰Naibaly mani meingtym y py leaung nyhrei mo leaung thomrei mo kai i amyn y achu baly mychi theung y kaawm ai,” napi.

²¹Hunai thym khala y ly Petera chei i mymy teng y, “Areng awi, kai i amjo amnau my kai i tlang tleaung y atiti hawi y nai tleng ma-jirei sa iy kaimy pahen ai nai tla mo? Tlen saryhrei a?” napi.

²²Isu my ly ni teng y, “Tlen saryhrei kang tapi y leang; tlen saryhrei meingtym vui saryhrei, kang napi.

²³“Huni nai deaungkho y kani pri my peang nai ly samrang ami mo mymy i miseaungchi teng y yhmtheaung kry nai sai deng ai tau nai hawi pata nai ne.

²⁴Naibaly mymy ly deng angchei nai khala y, khumi leaungrei, talent meaung kateaungrei kalai awm nai ai ly mymy teng y hawi u bo.

²⁵Naibaly mymy ly pei ai ati sai py by y nai deaungkho y yhmkeung my ly mymy hawi aju hawi chanauchi hawi, mymy i ati awm nai bawibawi py jo iy, pe ai nai leu pei bo.

²⁶Hunaibaly miseaung my ly, ‘Areng awi, kai ai kaneu kyh rai, ki pa-rei kang pe ai mang,’ napi nai ambeu iy chiu bo.

²⁷Hunaibaly miseaung i yhmkeung my ly mymy ai khri pa-rei pahen nai patleaung i, mymy i kalai ly lawi hai bo.

²⁸Na i py huni miseaung ly theu iy mymy i miseaung ahawichi theung y pia vui pangrei nai tangka cho chungvairei mymy ai pe ai awm nai leaungrei ai niu bo: naibaly mymy ly ni ai patiu iy, ‘Nang i kalai ly pe jau; ‘napi nai ni ai tao y taau bo.

²⁹Hunaibaly mymy i miseaung ahawi ly ambeu iy, ‘Kai ai kaneu kyh rai, kang pe ai mang,’ napi nai khri pa-rei takeng bo.

³⁰Na i py mymy ly ngai y i, ni i kalai ki y ryrei ly theaung y paeung bo. Hunaibaly mymy i miseaung ahawichi ly mymy i atiti sa naichi ly niu iy khri pa-rei paleung mawn nai,

³¹mymy i atiti sa naichi bawibawi ly mymychi i yhmkeung teng y thui pi bo.

³²Hunaibaly yhmkeung my ly ni ai palau i mymy teng y, ‘Miseaung kamngo nang ly kai teng y hnei ryry nai deaungkho y nang i kalai bawibawi kang palawi chy bo;

³³kaimy kang pahen nai kamta nang py miseaung ahawi ai pahen teang ai nai tlo y a?’ napi.

³⁴Naibaly ni i yhmkeung ly khri pa-rei kado theu nai, ni i kalai bawibawi ki y ryrei ly patang hai nai keungchi teng y au bo.

³⁵Nangchi leaung leaungrei ly nangchi i paleung y ngamjo ngamnauchi ai hawihai palai pahen y baly kani pri mang i Ngaai my py nangchi i tlang tleaung y hunai kamta ang sa teang ai,” napi.