Read Khumi Chin MATTHAI 2 Bible Online

MATTHAI 2 - Khumi Chin bible

MATTHAI 2

¹Naibaly samrang Heroda peang nai thym khala y Judai pri i Bethlehem avang y Isu ai tapen i, khen cham, nisi mang i dengdairei khumi kachengchi ly Jerusalem avang y tym u i,

²“Judachi i samrang tapen nai ly ma mang y mo? Kaichi ly nisi mang y mymy i ka-si niu i, mymy ai chiu ai nai kang jeu nai he,” napi.

³Naibaly samrang Heroda hawi Jerusalem avang i khumi bawibawichi py huna nai thai baly paleung bi u bo.

⁴Hunaibaly pathyp pi nai keung kalenchi hawi, khumichi ai Reita patiu nai keungchi bawibawi ai py palau achu iy, Krista ai tapen ai nai meingtym deng.

⁵Naibaly nichi ly mymy teng y, “Judai pri i Bethlehem avang y tapen ai:

⁶amo my ly, ‘Judai pri i Bethlehem avang awi! Nang ly Judai pri i avang theung y theang keh y leang! Kai i khumi Israelachi ai typ nai keung lawn ai nai, Nang theung i dengdairei peang nai keung leaungrei theu ai,’ nanai hina nai tajiu,” napi.

⁷Hunai bo y Heroda ly khumi kachengchi ai kangviu y palau i, ka-si amteng nai neng ly hawihai palai my deng; naibaly mymy ly nichi ai Bethlehem avang y chei hai i,

⁸“Chei u ly, deaungdicho i satang hawihai palai deng u; naibaly nangchi ly mymy ai niu baly, kai py chei iy mymy ai chiu teang thai ai nai kai ai thui pi praw,” napi.

⁹Naibaly nichi ly samrang i leu thai i chei u bo; naibaly khen cham, nisi mang y nichi i ka-si niu nai ly deaungdicho i awm naira kataw y tym y ryrei ly mymychi i mo y leh veangveang.

¹⁰Naibaly nichi ly ka-si ai niu i khri pa-rei amo theu u na.

¹¹Naibaly nichi ly angtheung y kun u iy amhm Mari teng y deaungdicho ai niu, naibaly ambeu iy mymy ai chiu bo: naibaly mymychi i yhmtheaung khai naira paeaung u i, mymy teng y muku, kathan, mura talam iy pei u bo.

¹²Naibaly Heroda teng y ali teang y ai nai Tameuh my nichi i amang mang y thui pi nai deaungkho y, mymychi i pri y lam takhra mang y vawi u bo.

¹³Naibaly nichi vawi nai bo y khen cham, Areng i kani pri i amtaw thau nai leaungrei ly Josepha teng y amang mang y amteng i, “Angthau ly, deaungdicho hawi amhm ai py hawi ly, Aikupta pri y preang la, kang thui pi ali y ryrei ly hu y awm veangveang; Heroda ly deaungdicho ai padei ai nai hau ai bo,” napi.

¹⁴Hunaibaly mymy ly angthau i vum aneng y my deaungdicho hawi amhm ai py hawi i, Aikupta pri y preang bo.

¹⁵ Naibaly Areng my amo i labeaung y, “Kai i chapo ai ly Aikupta pri i dengdairei theu ai nai kapalau bo,” nanai thui nai ly tym thai ai nai, mymy ly Heroda dei y ryrei ly hu y awm veangveang.

¹⁶Hunaibaly Heroda ly khumi kechengchi my ni ai tapawp nai pany baly khrikhri pa-rei kado theu, naibaly khumi kachengchi teng y deng nai neng pany khyp nai kamta khumichi ai pato i, Bethlehem avang hawi huni tengtang bawibawi i saneng nyhrei akui neampacho deaungdi kangpen chauchau padei bo.

¹⁷Hunai thym khala y ly amo Jeremia my,

¹⁸“Ramah avang y tyn thai bo. Vo nai, kadeichi ai paleung si hai nai aawi lyhlyh nai py, Rakili ly chanauchi ai vo hai nai ne; Nichi ly by y nai deaungkho y mymy ai ly awm hai nem thai y,” nanai thui nai ly tym bo.

¹⁹Na i py Heroda dei nai bo y khen cham, Areng i kani pri i amtaw thau nai leaungrei ly Aikupta pri y Josepha teng y amang mang y amteng i,

²⁰“Angthau ly, deaungdicho hawi amhm ai py hawi ly, Israela pri y chei jau: deaungdicho ai padei ai tau naichi ly dei bo,” napi.

²¹Hunaibaly mymy ly angthau i deaungdicho hawi amhm ai py hawi iy, Israela pri y kun bo.

²²Na i py Arkelausa ly ampo Heroda i jeng y Judai pri y peang, nanai thai i, hu y chei ai nai jei bo, naibaly Tameuh my ni i amang mang y thui pi nai deaungkho y Kalili mang y chei vui bo;

²³naibaly amochi i labeaung y thui nai ly, “Ni ai ly Nazaret khumi napi ai,” nanai tym thai ai nai, mymy ly avang harei Nazaret napi naira y chei iy awm bo.